Read Caribbean Javanese Titus 1 Bible Online

Titus 1 - Caribbean Javanese bible

Titus 1

¹Sangka Paulus, abdiné Gusti Allah lan rasulé Yésus Kristus, kanggo ngrumati pertyayané para pilihané Gusti Allah lan kaweruh ing bab kabeneran, kaya sing kebukak ing pangabekti kita.

²Lan didasari pengarep-arep marang urip langgeng sing sak durungé wiwitané jaman wis dijanjèkké karo Gusti Allah sing ora goroh.

³Ing wantyiné sing dikarepké, Panjenengané wis nggelar tembungé ing kabaré Injil, sing wis dipertyayakké marang aku tyotyok karo préntahé Gusti Allah, Juruslamet kita.

⁴Marang Titus, anakku tenan ing pertyaya: Kawelasan lan katentreman sangka Gusti Allah Bapak lan Kristus Yésus, Juruslamet kita, anaa ing kowé.

⁵Kowé tak tinggal ing Kréta, supaya nata apa sing ijik perlu ditata lan supaya ngangkat pinituwa-pinituwa ing saben kuta, kaya sing wis tak welingaké marang kowé.

⁶Ya kuwi para wong sing tanpa tyiri, sing bojoné siji, sing anak-anaké pada pertyaya lan ora didakwa awit uripé sembranan lan ora ketata.

⁷Awit pamongé pasamuan kuwi dadi juru-pernatané griyané Gusti Allah, mulané kudu tanpa tyiri, ora gemunggung, ora gampang nesu, ora seneng mendem-mendeman, ora brangasan, ora srakah,

⁸nanging seneng ngekèki pondokan, seneng marang sing betyik, wityaksana, adil, sutyi, bisa ngwasani uripé déwé

⁹lan ngantepi tembung sing bener, sing tyotyok karo piwulang sing bener, supaya bisa wulangi wong karo piwulang kuwi lan bisa nyadarké wong sing pada nglawan.

¹⁰Awit wis okèh wong sing uripé pada ora ketata, luwih menèh sangka wong sing mbiyèn netepi agama Ju; kuwi pada nasarké wong nganggo tembung-tembung omong kosong.

¹¹Wong-wong sing kaya mengkono kuwi kudu dibingkem, awit kuwi nggawé késruhé brayat okèh karo piwulangé sing ora apik, supaya pada olèh untungé sing ngisin-isinké.

¹²Ana tunggalé wong-wong kuwi, ya kuwi nabiné déwé, kuwi tau ngomong ngéné: “Dasar wong Kréta kuwi tukang goroh, kéwan galak lan wong murka sing kesèt.”

¹³Paseksi mengkono kuwi bener. Awit sangka kuwi welèhna sing tenan, supaya pertyayané dadi waras,

¹⁴lan aja menèh-menèh nggatèkké marang dongèng-dongèngané wong Ju lan angger-anggeré manungsa sing nyingkur kabeneran.

¹⁵Kanggo wong sing sutyi, samubarang kabèh kuwi resik, nanging kanggo wong sing reget lan sing ora pertyaya, ora ana barang siji waé sing resik, awit pikirané lan pikirané ati reget.

¹⁶Wong-wong kuwi ngakuné pada kenal marang Gusti Allah, nanging karo tindak-tanduké, pada nyélaki Panjenengané. Pada ngregeti lan ora gelem manut lan ora bisa nindakké samubarang sing betyik.