Read Caribbean Javanese Titus 2 Bible Online

Titus 2 - Caribbean Javanese bible

Titus 2

¹Nanging kowé, kabarna apa sing tyotyok karo piwulang sing bener.

²Para wong lanang sing wis tuwa supaya pada urip kajèn, prasaja, wityaksana lan mantep ing pertyaya, ing katrésnan lan katemenan.

³Mengkono uga para wong wadon sing wis tuwa, kuwi pada ngétokna enggoné dadi wong sing ngabekti, aja seneng ngarani ala, aja kebanda ngombé anggur, nanging bisa mulangi sing betyik,

⁴lan karo mengkono bisa mulangi wong-wong wadon sing ijik nom, supaya pada trésna marang bojoné lan marang anak-anaké,

⁵urip karo wityaksana lan sutyi, sregep nata brayat omahé, betyik atiné lan manut marang bojoné, supaya tembungé Gusti Allah aja nganti dadi tyatyatan.

⁶Mengkono uga para wong lanang nom-noman, pada pituturana, supaya pada bisa ngwasani awaké ing kabèh perkara.

⁷Kowé déwé dadia tulada ing bab nindakké penggawé betyik. Enggonmu mulangi karo tyara jujur lan temen,

⁸tetembunganmu sing bener lan tanpa tyiri, terus wong sing nglawan pada dadi kisinan, awit ora ana perkara-perkara ora betyik sing kena kanggo ngèlèk-èlèk kita.

⁹Para batur pada pituturana supaya manut marang bendarané ing kabèh perkara lan pada nggawéa senengé atiné lan aja mbantah,

¹⁰aja tylemer, nanging tansah ngétokké temen lan setia. Sangka mengkono ing kabèh perkara, pada ngluhurké piwulangé Gusti Allah, Juruslamet kita.

¹¹Awit kawelasané Gusti Allah sing nylametké manungsa kabèh kuwi wis kebukak.

¹²Kuwi mulangi marang kita, supaya kita ninggal dalan nyasar lan kepénginan kadonyan lan supaya kita urip karo wityaksana, adil lan ngabekti ing ndonya saiki iki.

¹³Sak njeruhné ngentèn-entèni kaleksanané pengarep-arep kita sing kebak berkah keslametan lan tekané kamulyané Gusti Allah sing Mahaluhur lan Juruslamet kita Yésus Kristus.

¹⁴Yésus Kristus wis masrahké uripé kanggo kita lan ngluwari kita sangka sak kabèhé sing ala lan nyutyèkké dadi umat duwèké Piyambak, sing sregep ing penggawé betyik.

¹⁵Kuwi kabèh omongna, wong-wong pada pituturana lan welèhna karo wibawamu ing sak kabèhé. Aja nganti ana wong sing ngrèmèhké kowé.