Read Caribbean Javanese Titus 3 Bible Online

Titus 3 - Caribbean Javanese bible

Titus 3

¹Wong-wong pada élingna, supaya pada manut marang pemrintah lan para sing nggawa pangwasa, mbangun-turuta lan pada gelem tandang marang kabèh penggawé betyik.

²Aja pada ora ngajèni, aja pada tukaran, nanging pada sing rukun lan sing alus marang kabèh wong.

³Awit mauné urip kita ya bodo, wangkot, nasar, dikwasani karo kekarepan èlèk werna-werna lan kesenengané kadonyan, urip ing sak njeruhné sing ala lan nduwé niat èlèk, rusuh, sengit-sengitan.

⁴Nanging bareng kabetyikané Gusti Allah, Juruslamet kita, wis kebukak lan katrésnan-Né marang manungsa,

⁵ing wantyiné kuwi Panjenengané nylametké kita, ora awit sangka penggawé betyik sing wis kita lakoni, nanging awit sangka kabetyikan-Né. Sangka didusi lair anyar menèh lan dianyarké karo Roh Sutyi.

⁶Gusti Allah wis ngesokké Roh Sutyi nganti lubèr marang kita lantaran Yésus Kristus, Juruslamet kita,

⁷supaya kita, sing wis dibeneraké karo kawelasan-Né, pada pantes nampa warisan urip langgeng, tyotyok karo pengarep-arep kita.

⁸Iki tembung sing bener lan karepku supaya kowé karo yakin luwih ngantepké, supaya wong-wong sing wis pada pertyaya marang Gusti Allah, pada ngupaya karo temen-temen nglakoni penggawé betyik. Kuwi sing apik lan migunani kanggo manungsa.

⁹Nanging singkirana bantahan sing ora ana tegesé, perkara keturunan-keturunan, uga padudon lan tukaran bab angger-anggeré Torèt, awit kabèh kuwi ora ana gunané lan tanpa guna.

¹⁰Wong sing njalari tyongkrèh, yèn wis kok pituturi pisan, pindo, kuwi adohana.

¹¹Kowé mengertèni, yèn wong sing kaya mengkono kuwi nyasar tenan lan ngukum dèkné déwé karo dosané.

¹²Sakwisé aku kongkonan Artèmas utawa Tikikus mréné nemoni kowé, ngupayaa bisané kowé nemoni aku ing Nikapolis, awit wis tak niyati arep manggon ing kono sak suwéné waktu bediding iki.

¹³Sénas juru Torèt lan Apolos, pada tulungana sak tyukupé, supaya mlakuné aja nganti kekurangan siji apa waé.

¹⁴Lan wong-wong kita wis bèn ta pada sinau nglakoni penggawéan sing migunani, supaya bisa nyukupi kebutuhané urip sing bakuh, supaya uripé aja nganti tanpa guna.

¹⁵Wong kabèh sing bebarengan karo aku pada kirim slamet. Salamku marang wong-wong sing pada trésna marang kita sak njeruhné pertyaya. Kawelasan supaya nunggal ing kowé kabèh!