Read Caribbean Javanese Ibrani 1 Bible Online

Ibrani 1 - Caribbean Javanese bible

Ibrani 1

¹Sakwisé jaman mbiyèn Gusti Allah ngomong marang para leluhur kita nganti bola-bali lan karo tyara werna-werna lantaran para nabi,

²ing jaman pungkasan iki Panjenengané wis ngomong marang kita lantaran Putrané, sing wis ditetepaké dadi ahli warisé samubarang kabèh; lan ya lantaran Panjenengané, Gusti wis nyiptaké jagat gumelar iki.

³Panjenengané dadi semloroté kamulyané Gusti Allah lan gambar kahanané Gusti Allah sing sak temené lan nyangga samubarang kabèh karo tembungé sing kebak pangwasa. Sakwisé rampung enggoné ngresiki dosa, Panjenengané njagong ing sak tengené sing Mahaluhur ing nduwur;

⁴ngungkuli sak kabèhé mulékat, pada kaya asma-Né sing wis dikèkké marang Panjenengané sing luwih gedé tenimbang jenengé para mulékat mau.

⁵Awit sapa ta tunggalé para mulékat sing tau diomongi ngéné, “Kowé kuwi putra-Ku! Kowé wis Tak dadèkké anak ing dina iki?” Lan “Aku bakal dadi Bapaké, lan Panjenengané bakal dadi Putra-Ku?”

⁶Apa menèh nalika Panjenengané ngekèkké Putrané mbarep marang jagat, Panjenengané ngomong, “Sak kabèhé mulékaté Gusti Allah kudu nyembah Panjenengané.”

⁷Kanggo para mulékat Panjenengané ngomong, “Sing ndadèkké para mulékaté dadi lésus lan para abdiné dadi geni sing mulat-mulat.”

⁸Nanging kanggo Putrané, “Duh, Gusti Allah, dampar Panjenengan kuwi langgeng sak lawasé, teken kraton Panjenengan kuwi tekené kabeneran.”

⁹“Panjenengan kuwi trésna marang keadilan lan sengit marang duraka, mulané, duh Gusti Allah, Gusti Allah Panjenengan wis njebati Panjenengan nganggo lengané kebungahan, ngliwati para kantya Panjenengan.”

¹⁰Lan menèh, “Duh Gusti, wiwitané Panjenengan sing ndasari bumi, lan langit kuwi gawéané tangan Panjenengan.

¹¹Kabèh kuwi bakal entèk, nanging Panjenengan tetep langgeng lan kabèh kuwi bakal pada lungset kaya jubah;

¹²lan bakal Panjenengan gulung kaya jubah, lan bakal diganti karo liyané, nanging Panjenengan kuwi tetep pada, lan taun-taun Panjenengan tanpa wates.”

¹³Sapa tunggalé para mulékat sing naté diomongi ngéné, “Lungguha ing tengen-Ku, nganti mungsuh-mungsuhmu pada Tak dadèkké antyik-antyiké tlapakanmu?”

¹⁴Kabèh kuwi mau apa ora pada roh-roh sing ngladèni, sing diutus ngladèni marang wong-wong sing bakal nampa keslametan?