Read Caribbean Javanese Ibrani 13 Bible Online

Ibrani 13 - Caribbean Javanese bible

Ibrani 13

¹Katrésnané seduluran kuwi pada rumatana!

²Kowé aja pada lali ngekèki pondokan marang wong, jalaran sangka mengkono kuwi ana sakwijiné wong tanpa dingertèni wis ngekèki suguhan marang para mulékat.

³Pada élinga marang para wong ukuman, jalaran kowé déwé uga wong ukuman. Lan pada élinga marang wong sing pada dianiaya, awit kowé déwé ya ijik urip ing ndonya iki.

⁴Kowé kabèh pada ngajènana marang nikahan lan aja pada ngregeti peturon, awit Gusti Allah bakal ngadili para lonté lan sing mlaku bédang.

⁵Kowé aja pada kesemsem banda lan pada marema karo apa sing kok duwèni. Awit Gusti Allah wis ngomong: “Aku ora bakal négakké kowé lan kowé ora pisan-pisan bakal tak tinggalké.”

⁶Awit sangka kuwi karo yakin kita bisa ngomong, “Gusti kuwi pitulunganku. Aku bakal ora wedi. Manungsa bisa nindakké apa marang aku?”

⁷Pada élinga marang para pemimpinmu, sing wis nggelarké tembungé Gusti Allah marang kowé. Pada gatèkna pungkasané uripé lan pada nuladanana pertyayané.

⁸Yésus Kristus kuwi tetep, ora malih, ya wingi, dina iki lan ing sak lawas-lawasé.

⁹Kowé aja nganti pada kena disasarké karo piwulang werna-werna liyané. Sing betyik ya kuwi yèn atimu dikuwatké karo kawelasan, lan ora awit karo pernatan bab pangan sing ora maédahi marang wong sing nuruti kuwi.

¹⁰Kita pada nduwé mesbèh, lan wong-wong sing pada ngladèni tarup kuwi ora kena mangan apa sing sangka mesbèh kono.

¹¹Kanggo kéwan-kéwan sing getihé digawa mlebu menyang panggonan Mahasutyi karo imam gedé kanggo kurban mbirat dosa, kuwi pada diobong ing sak njabané tarup.

¹²Ya kuwi sebabé Yésus wis ngalami sangsara ing sak njabané gapura kanggo nyutyèkké umat duwèké karo getihé piyambak.

¹³Awit sangka kuwi, hayuk pada ngadep Panjenengané ing sak njabané tarup lan mèlu ngrasaké diasorké bareng Panjenengané.

¹⁴Awit ing kéné kita pada ora nduwé kuta sing tetep; kita pada nggolèki kuta ing jaman sing bakal kelakon.

¹⁵Awit kuwi, lantaran Panjenengané, hayuk kita pada tansah pasrah kurban maturkesuwun marang Gusti Allah, ya kuwi sing rupa tetembungan sing ngluhurké asma-Né.

¹⁶Lan aja lali nindakké kabetyikan lan ngekèki pitulungan, jalaran ya kurban-kurban sing mengkono kuwi sing ndadèkké senengé Gusti Allah.

¹⁷Pada mbangun-turuta lan tunduka marang para pemimpinmu, awit kuwi sing pada njaga marang nyawamu, kaya wong sing pada kudu tanggung jawap marang Gusti, supaya enggoné pada nglakoni karo bungah, ora karo nggresah, awit kuwi ora bakal maédahi kanggo kowé.

¹⁸Dongaa kanggo kita, jalaran kita pada yakin, yèn nduwé pikiran ati sing betyik, awit ing sak kabèhé perkara kita pada ngarepké urip sing betyik.

¹⁹Spésial kanggo kowé aku ngomong, kowé pada nglakonana, supaya aku gelis dililani bali nunggal karo kowé.

²⁰Supaya Gusti Allahé katentreman, sing karo getih perjanjiané sing langgeng wis nangèkké sangka antarané wong mati, Pangon Gedé kanggo para wedus, ya kuwi Yésus, Gusti kita,

²¹muga Gusti nyambutgawé ing kowé karo samubarang kabèh sing betyik kanggo nindakké karepé, lan nindakké ing urip kita apa sing ndadèkké senengé Gusti, lantaran Yésus Kristus. Panjenengané kuwi sing dimulyakaké nganti sak lawas-lawasé! Amin.

²²Aku ngomong marang kowé, para sedulur, tembung-tembung pepéling iki pada tampanana karo éklasé ati, senajan layangku marang kowé iki mung tyekak.

²³Ngertènana, Timotius, sedulur kita, wis budal. Yèn wis teka, aku arep gelis bebarengan niliki kowé kabèh.

²⁴Salamku tekakna marang sak kabèhé pemimpinmu lan marang para sutyi. Para sedulur tunggal pertyaya ing Italia ngirimké keslametan marang kowé kabèh.

²⁵Kawelasan nunggal karo kowé kabèh.