Read Caribbean Javanese Ibrani 3 Bible Online

Ibrani 3 - Caribbean Javanese bible

Ibrani 3

¹Mulané, para sedulur sing sutyi, sing pada olèh pandumané panggilan suwargan, pada nggatèkna marang Yésus, Rasul lan imam gedé sing kita akoni,

²sing setia marang Panjenengané sing wis ditetepaké, kayadéné Moses uga setia ing griyané Gusti Allah sak kabèhé.

³Jalaran Panjenengané wis bisa dikèki kamulyan sing ngungkuli Moses, pada kayadéné sing mbangun omah luwih kajèn tenimbang omah gawéané.

⁴Awit saben omah digawé karo tukangé mbangun omah; nanging juru sing nggawé samubarang kabèh kuwi Gusti Allah.

⁵Moses pantyèn temen enggoné dadi peladèn ing griyané Gusti Allah ing sak kabèhé, dadi peladèn, supaya ngekèki paseksi kanggo apa sing bakalé bakal diomongké,

⁶nanging Kristus sing dadi Putrané kuwi ngwasani tanggung jawap karo setia kanggo omahé; lan omahé kuwi kita, angger kita pada kuwat ing pertyaya lan ing pengarep-arep sing kita unggulké nganti tekan pungkasané.

⁷Jalaran sangka kuwi, kaya sing diomongké karo Roh Sutyi, “Ing dina iki, yèn kowé pada krungu swara-Né,

⁸aja pada ngakokké atimu, kaya nalika pada mbruntak, ing jaman pantyoba ing ara-ara samun,

⁹ing kono para leluhurmu pada njajal marang Aku, karo njajal Aku, senajan pada weruh penggawéan-penggawéan-Ku, suwéné patang puluh taun.

¹⁰Ya perkara kuwi sebabé Aku nesu marang wong-wong kuwi lan ngomong: Wong-wong kuwi tansah nyasar atiné, lan pada ora weruh dalan-Ku,

¹¹sak nalika Aku sumpah sak njeruhné nesu-Ku: Wong-wong kuwi ora bakal pada mlebu ing panggonan palèrènan-Ku.”

¹²Para sedulur, pada sing ati-ati, supaya ing tengahmu aja ana sing kanggonan ati ala lan ora pertyaya terus murtad sangka Gusti Allah sing urip.

¹³Nanging pada éling-élingna ing sedina-dina sak njeruhné ijik bisa diarani “dina iki”, supaya tunggalmu aja ana sing dadi wangkot atiné, awit sangka panggodané dosa.

¹⁴Jalaran kita wis pada olèh panduman ing Kristus, angger kita pada kentyeng ing mantepé pertyaya kita sing wiwitan, nganti tekan ing pungkasané.

¹⁵Nalika naté diomongké, “Ing dina iki, yèn kowé krungu swarané, aja pada mangkotké atimu, kaya nalika pada mbruntak.”

¹⁶Sapa ta sing nangèkké nesuné Gusti Allah, senajan pada krungu swara-Né? Apa kuwi duduk wong-wong sing pada metu sangka Egipte dituntun karo Moses?

¹⁷Lan sapa sing dibendoni karo Panjenengané suwéné patang puluh taun? Apa duduk wong-wong sing pada nglakoni dosa lan sing layoné pada pating glémpang ing ara-ara samun?

¹⁸Sapa sing wis disumpahi yèn bakal ora pada mlebu ing panggonan palèrènan-Né? Apa duduk wong-wong sing pada ora mbangun turut kuwi?

¹⁹Dadiné kita pada weruh, yèn wong-wong kuwi pada ora bisa mlebu awit pada ora pertyaya.