Read Caribbean Javanese Ibrani 4 Bible Online

Ibrani 4 - Caribbean Javanese bible

Ibrani 4

¹Awit sangka kuwi, hayuk pada sing ati-ati, supaya aja nganti ana wong ing tengahmu sing dianggep kèri, senajan perjanjian bab mlebu ing panggonané Panjenengané ijik kanggo.

²Awit kita uga pada dikabari kabar kabungahan, pada kaya wong-wong kuwi, nanging tembung sing diwartakké kuwi tanpa guna kanggo wong-wong mau, jalaran ora bebarengan ing pertyaya karo wong-wong sing pada ngrungokké.

³Awit, kita sing pada pertyaya, bakal mlebu ing panggonan palèrènan, kaya sing diomongké karo Panjenengané, “Sak nalika Aku sumpah sak njeruhné nesu-Ku: Wong-wong kuwi mesti pada ora bakal mlebu ing panggonan palèrènan-Ku.” Senajan penggawéané wis rampung wiwit jagat digawé.

⁴Awit bab dina kaping pitu kuwi wis tau ana tembungé ngéné: “Lan ing dina kaping pitu Gusti Allah mandek sangka penggawéané kabèh.”

⁵Ing tembungé kuwi, kita matya: “Wong-wong kuwi bakal ora mlebu ing panggonan palèrènan-Ku.”

⁶Dadi, wis tyeta yèn ana sak untara wong sing bakal mlebu ing panggonan palèrènan kuwi, nanging wong-wong sing wis luwih ndisik dikabari kabar kabungahan kuwi ora mlebu, awit ora pada mbangun turut.

⁷Mulané, Panjenengané nemtokké dina menèh, ya kuwi “dina iki”, nalika Panjenengané ngomong lantaran Daved suwé sakwisé kuwi, kaya sing wis disebut ing ngarep mau, “Ing dina iki, yèn kowé pada krungu swarané, aja pada mangkotké atimu!”

⁸Jalaran, yèn Yosua wis nglebokké wong-wong kuwi ing panggonan palèrènan, mesti sakwisé mengkono Gusti Allah ora bakal ngomongi dina liyané menèh.

⁹Dadi ijik ana dina palèrènan, dina kaping pitu kanggo umaté Gusti Allah.

¹⁰Awit sapa sing wis mlebu ing panggonan palèrènané Gusti Allah, wong kuwi déwé wis lèrèn sangka sak kabèhé penggawéané, pada kaya Gusti Allah enggoné mandek sangka penggawéané.

¹¹Mulané luwih betyik kita ngupaya mlebu ing palèrènan kuwi, supaya aja nganti ana sing tiba awit nuladani marang pambruntakan sing kaya mengkono.

¹²Awit tembungé Gusti Allah kuwi urip lan kuwat lan luwih landepé tenimbangané sak kabèhé pedang sing landepé kiwa-tengen. Nunjem jeru nganti misahké nyawa lan roh, ros-rosan lan sungsum; bisa ngadili pikiran lan angen-angené ati kita.

¹³Ora ana sing urip siji waé sing ketutup ing ngarepé Gusti, jalaran samubarang kabèh kétok kebukak lan ngeblak ing ngarepé mripaté Gusti, sing nuntut supaya kita pada ngekèki tanggung jawap kita.

¹⁴Awit kita pada nduwé Imam Gedé, sing wis munggah ngliwati sak kabèhé langit, ya kuwi Yésus, Putrané Gusti Allah, mulané kita pada ngantepana pengaku pertyaya kita.

¹⁵Awit Imam Gedé kita kuwi duduk imam gedé sing ora bisa ngrasakaké sak kabèhé keringkihané kita. Nanging malah sing pada karo kita, Panjenengané wis ngalami digoda nanging ora nggawé dosa.

¹⁶Awit kuwi hayuk pada mara karo kendel marang damparé kawelasan, supaya kita pada olèh kabetyikan lan nemu kawelasan sing njalari kita ditulungi ing wantyiné.