Read Caribbean Javanese Ibrani 5 Bible Online

Ibrani 5 - Caribbean Javanese bible

Ibrani 5

¹Awit saben imam gedé, sing dipiji sangka antarané manungsa, kuwi ditetepaké kanggo manungsa kanggo lantarané manungsa karo Gusti Allah, supaya masrahké pisungsung lan kurban awit dosa.

²Panjenengané kudu bisa mèlu ngrasaké kahanané para wong sing ora ngerti lan sing kesasar, awit Panjenengané déwé uga kebak ing keringkihané,

³sing kudu pasrah kurban tebusané dosa, ora mung kanggo para umat, nanging uga kanggo dèkné déwé.

⁴Lan ora ana wong sing nggunakké kehormatan kuwi kanggo awaké déwé, nanging dityeluk karo Gusti Allah kaya sing wis kelakon kanggo Harun.

⁵Mengkono uga Kristus ora mulyakké Panjenengané piyambak awit dadi Imam Gedé, nanging dimulyakaké karo Panjenengané sing omongi: “Kowé kuwi Putra-Ku! Kowé wis Tak dadèkké Putra ing dina iki,”

⁶ya kaya tembungé Gusti ing ayat liyané menèh, “Kowé kuwi dadi Imam kanggo sak lawas-lawasé, miturut pernatané Mèlkisèdèk.”

⁷Nalika uripé sak-tyara manungsa, Panjenengané wis ngomongké pandonga lan panyuwun karo sambat lan nangis marang Bapak, sing kwasa nylametké sangka pati, lan awit sangka kesutyiané Panjenengané wis dirungokké.

⁸Senajan Panjenengané kuwi Putra, senajan mengkono wis sinau mbangun turut karo enggoné ngalami sangsara,

⁹lan sakwisé Panjenengané disampurnakké, terus dadi sumberé keslametan sing langgeng kanggo sak kabèhé wong sing manut marang Panjenengané,

¹⁰lan Panjenengané dityeluk dadi Imam Gedé karo Gusti Allah, miturut pernatané Mèlkisèdèk.

¹¹Kanggo perkara kuwi okèh sing kudu pada Tak omongké, nanging angèl didunungké, awit kowé wis pada rendet yèn ngrungokké.

¹²Awit senajan kowé kuduné wis pada dadi guru, yèn ditliti sangka waktuné, nanging kowé ijik perlu diwulangi menèh bab dasar-dasaré tembungé Gusti Allah lan kowé ijik mbutuhké banyu mèlek, duduk pangan sing akas.

¹³Awit saben wong sing ijik butuh banyu mèlek, kuwi durung ngerti piwulang bab sing bener, awit ijik dadi bayi sing ijik nyusu.

¹⁴Nanging pangan sing akas kuwi kanggo para wong déwasa, sing nduwé pangertèn sing wis dilatih kanggo mbédakké sing betyik lan sing ala.