Read Caribbean Javanese Ibrani 7 Bible Online

Ibrani 7 - Caribbean Javanese bible

Ibrani 7

¹Awit Mèlkisèdèk kuwi ratu Salèm lan imamé Gusti Allah sing Mahaluhur, sing metuki lan mberkahi Abraham, nalika Abraham mulih sangka peperangan ngalahké para ratu.

²Abraham uga masrahké sak prasepuluhé samubarang marang Panjenengané. Asma Mèlkisèdèk kuwi tegesé ratuné keadilan, lan uga ratu Salèm,[1] ya kuwi ratuné katentreman,

³Panjenengané kuwi tanpa bapak, tanpa ibu, tanpa turunan, ora ana dina lairé, lan uripé ora ana pungkasané, lan awit Panjenengané dipadakké karo Putrané Gusti Allah, Panjenengané tetep dadi imam ing selawasé.

⁴Pada gatèkna, tenan luhuré Panjenengané kuwi, nganti Abraham leluhur kita, ngekèki sak prasepuluh sangka sak kabèhé sing direbut sing betyik déwé.

⁵Miturut angger-anggeré Torèt, para turuné Lèwi sing pada nampa pangkat imam, kuwi sing diwajipké nglumpukké pisungsung prasepuluhan sangka umat Israèl, ya kuwi para Seduluré, senajan wong-wong kuwi uga tyedak turunané Abraham.

⁶Nanging Mèlkisèdèk, sing ora tunggal turun karo wong-wong kuwi, njupuk prasepuluhan sangka Abraham lan mberkahi Panjenengané sing wis nduwé perjanjian kuwi.

⁷Pantyèn wis ora kena dibantah, yèn sing luwih asor diberkahi karo sing luwih luhur.

⁸Imam-imam sing pada nampani prasepuluhan kuwi wong-wong sing kena karo pati, nanging Mèlkisèdèk sing uga nampani prasepuluhan kuwi diseksèni yèn Panjenengané kuwi tetep urip.

⁹Malah kena diomongké, yèn lantaran Abraham, Lèwi sing pantes nampani prasepuluhan kuwi ya pasrah pisungsung prasepuluhan,

¹⁰awit Lèwi ijik ing njeruhné leluhuré nalika Mèlkisèdèk metuki leluhuré mau.

¹¹Awit sangka kuwi, yèn lantaran imamané Lèwi kasampurnan kuwi bisa digayuh - jalaran awit imamané kuwi, umat Israèl wis nampani Torèt - apa sebabé nanging ijik ana imam gedé liyané sing perlu ditetepaké miturut pernatané Mèlkisèdèk, sing ora disebut miturut pernatané Harun?

¹²Awit, yèn pernatané imamané kuwi ganti, wis sak mestiné angger-anggeré Torèt ya bakal ganti.

¹³Awit Panjenengané, sing dikarepké ing kéné iki, mlebu taler liyané, sangka taler iki ora ana sing tau ngladèni ing mesbèh.

¹⁴Awit wis dingertèni wong kabèh, yèn Gusti kita kuwi turunané sangka Yéhuda; nanging kanggo taler iki Moses ora tau ngomongi apa-apa bab imam-imam.

¹⁵Lan bab kuwi mundak ketara menèh, yèn ana imam liyané sing ditetepaké kaya Mèlkisèdèk,

¹⁶sing dadi imam ora didasari pernatané manungsa, nanging didasari kekuwatané urip sing ora bisa lebur.

¹⁷Awit kanggo Panjenengané ana paseksi ngéné: “Kowé kuwi dadi Imam ing sak lawas-lawasé, miturut pernatané Mèlkisèdèk.”

¹⁸Ing sakwijiné, pernatan sing ditetepaké ndisik kuwi dibatalké, yèn pernatan kuwi ora pada nduwèni kekuwatan lan awit sangka kuwi tanpa guna,

¹⁹- awit angger-anggeré Torèt kuwi babar pisan ora ngéntukké kasampurnan - nanging ing sisih liyané, pengarep-arep sing luwih apik ditukulké, sing nyedekké kita marang Allah.

²⁰Lan bab iki enggoné dadi ora tanpa sumpah. Wong-wong liyané kuwi enggoné dadi imam pantyèn tanpa sumpah,

²¹nanging Panjenengané iki nganggo sumpah, awit Allah sing ngomong marang Panjenengané, “Gusti wis sumpah lan Panjenengané ora bakal gela: Panjenengan kuwi Imam ing sak lawas-lawasé” -

²²Awit sangka kuwi Yésus wis dadi tanggané perjanjian sing luwih betyik.

²³Sing pada dadi imam kuwi tyatyahé okèh, awit pada ora bisa tetep enggoné dadi, jalaran alangan karo pati.

²⁴Nanging, awit Panjenengané tetep dadi sak lawas-lawasé, kaimaman-Né ora bisa diendek marang wong liyané.

²⁵Mulané Panjenengané uga bisa nylametaké rahayu karo sampurna marang sak kabèhé wong sing nemoni ing ngarepé Allah lantaran Panjenengané. Jalaran Panjenengané urip ing selawasé kanggo Lantarané wong-wong mau.

²⁶Awit ya Imam Gedé sing kaya mengkono kuwi sing kita butuhaké, ya kuwi sing bener, tanpa salah, tanpa reget, sing pisah sangka para wong dosa lan munggah ngungkuli langit ing swarga,

²⁷Panjenengané ora kaya para imam gedé liyané, sing saben dinané kudu masrahké kurban kanggo dosané déwé lan sakwisé kuwi banjur kanggo dosané umat. Awit perkara kuwi wis ditindakké karo Panjenengané sepisan kanggo selawasé, nalika Panjenengané ngurbanké Panjenengané piyambak.

²⁸Awit angger-anggeré Torèt kuwi netepaké para wong sing ngalami keringkihané dadi imam gedé, nanging sumpah, sing diutyapké sakwisé angger-anggeré Torèt, netepaké Putra, sing wis didadèkké sampurna ing sak lawas-lawasé.