Read Caribbean Javanese Ibrani 8 Bible Online

Ibrani 8 - Caribbean Javanese bible

Ibrani 8

¹Tegesé kabèh sing kita rembukan kuwi ngéné: kita pada nduwé Imam Gedé sing kaya mengkono, sing njagong ing sak tengené damparé sing Mahaluhur ing swarga,

²lan sing ngladèni pangabekti ing panggonan sing sutyi, ya kuwi ing sak njeruhné tarup sing sejati, gawéané Gusti lan duduk gawéané manungsa.

³Jalaran saben imam gedé dipasrahi masrahké kurban lan pisungsung, mulané imam gedé perlu nduwé sing kudu dipasrahké.

⁴Yèn Panjenengané ing bumi iki, Panjenengané babar pisan ora bakal dadi imam, awit ing kéné wis ana sing pada masrahké pisungsung miturut angger-anggeré Torèt.

⁵Enggoné pada ngladèni ing tarup kuwi kanggo gambar lan ayang-ayangé apa ing swarga, kaya sing diomongké marang Moses, nalika arep nggawé tarup: “gatèkna,” mengkono tembungé: “Kabèh kuwi kudu kok nggawé miturut tyonto sing wis Tak duduhké marang kowé ing nduwuré gunung kuwi.”

⁶Nanging saiki Panjenengané wis nampa penggawéan sing luwih gedé, awit Panjenengané dadi Lantarané perjanjian sing luwih mulya, sing didasari janji sing uga luwih mulya.

⁷Awit yèn perjanjian sing wiwitan kuwi tanpa tyiri, sing kaping pindo ora bakal digolèkké panggonan menèh.

⁸Nanging Panjenengané nyalahké wong-wong kuwi nalika ngomong: “Sak temené, bakal tekan ing wantyiné,” mengkono tembungé Gusti, “Aku bakal nentokké perjanjian anyar karo turuné Israèl lan turuné Yéhuda,

⁹ora kaya perjanjian sing wis Tak tata karo para leluhuré wong-wong kuwi, nalika Aku nuntun wong-wong kuwi tak tuntun metu sangka negara Egipte. Awit wong-wong kuwi pada ora setia marang perjanjian-Ku, lan Aku nampik wong-wong kuwi,” mengkono tembungé Gusti.

¹⁰“Ya iki perjanjian sing bakal Tak tata karo turuné Israèl sakwisé wantyiné kuwi,” mengkono tembungé Gusti. “Aku bakal ngekèkké angger-angger-Ku ing pikirané, lan Tak tulis ing atiné, terus Aku bakal dadi Gusti Allahé lan wong-wong kuwi bakal dadi umat-Ku.

¹¹Lan wong-wong kuwi ora bakal pada mulangi menèh marang pepadané warga utawa marang pepadané sedulur karo ngomong: Manuta marang Gusti! Awit sing tyilik uga sing gedé, kabèh bakal pada kenal marang Aku.

¹²Awit Aku bakal ngekèki kawelasan kanggo kesalahané lan ora bakal ngélingi marang dosa-dosané.”

¹³Nalika Panjenengané ngomong bab perjanjian anyar, ya ndunungké yèn sing wiwitan kuwi perjanjian sing wis dadi lawas. Lan apa sing wis dadi lawas lan ora kanggo kuwi wis tyedak ilangé.