Read Caribbean Javanese Yakobus 2 Bible Online

Yakobus 2 - Caribbean Javanese bible

Yakobus 2

¹Para sedulurku, kowé kabèh kuwi wong sing pertyaya marang Yésus Kristus, Gusti kita sing mulya, enggonmu nglakokké pertyayamu aja nganggo nyawang rupané wong.

²Jalaran yèn ana wong sing mlebu ing kumpulanmu nganggo ali-ali emas, nganggo sandangan apik-apik lan uga ana wong mlarat sing mlebu nganggo penganggo èlèk,

³terus kowé pada ngajèni marang wong sing nganggo apik-apik mau, terus ngomong ngéné: “Sampéyan kula njaluk njagong ing panggonan sing apik kuwi”, nanging kanggo wong sing mlarat diomongi ngéné: “Sampéyan ngadek ing kono waé!” utawa: “Sampéyan lungguh ngisor kéné tyedak antyik-antyiké sikil kula”,

⁴apa kowé ora wis pada mbédak-mbédakké sak njeruhné atimu lan tumindak dadi rèkter sing ala pikirané?

⁵Rungokna ta, para sedulur sing tak trésnani, Gusti Allah apa ora wis milih wong-wong sing dianggep mlarat karo ndonya iki pada dadi sugih ing pertyaya lan pada dadi ahli warisé Kraton sing wis dijanjèkké marang sing pada nrésnani Panjenengané?

⁶Nanging kowé kuwi wis pada ngrèmèhké wong-wong mlarat. Malah apa duduk wong-wong sugih sing pada nindes lan nyèrèt kowé marang pengadilan?

⁷Apa duduk wong-wong kuwi sing pada ora ngajèni asma sing mulya, sing njalari kowé pada dadi duwèké Gusti Allah?

⁸Yèn kowé netepi angger-angger sing apik sing ketulis ing Kitab: “Kowé trésnaa marang sak pepadamu kaya marang awakmu déwé,” dadi kowé nandangi betyik.

⁹Nanging, yèn kowé pada nyawang rupané wong, kowé nglakoni dosa lan awit sangka angger-angger kuwi, terus nyata yèn kowé nglakoni panerak.

¹⁰Jalaran sapa sing ngupaya netepi sak kabèhé angger-angger kuwi, nanging nglalèkké sak pérangan waé, wong kuwi kesalahan marang sak kabèhé.

¹¹Jalaran Panjenengané sing ngomong: “Kowé aja mlaku bédang,” kuwi uga ngomong: “Kowé aja matèni.” Dadi senajan kowé ora mlaku bédang, nanging yèn kowé matèni, kuwi kowé uga dadi wong sing nerak angger-angger.

¹²Ngomonga lan tumindaka kaya wong sing bakal diadili perkarané karo angger-angger sing merdékakké wong.

¹³Awit pengadilan sing tanpa welas bakal nandangi kanggo wong sing ora nglakoni kawelasan. Nanging kawelasan kuwi bakal ngluwihi pengadilan.

¹⁴Para sedulurku, apa gunané yèn ana wong ngaku pada nduwèni pertyaya, nanging ora ana penggawéané? Apa pertyayané bisa nggawé slameté wong kuwi?

¹⁵Yèn ana sedulur lanang utawa wadon sing ora nduwé sandangan lan kekurangan pangan sedina-dinané,

¹⁶terus ana tunggalmu sing ngomong ngéné: “Lungaa, tak sangoni slamet, nganggoa sandangan sing anget lan mangana sing warek”, nanging ora ngekèki wong kuwi apa sing dadi kebutuhané, kuwi apa gunané?

¹⁷Mengkono uga kanggo pertyaya: Yèn pertyaya kuwi ora dibarengi penggawé, pertyaya kuwi sejatiné mati.

¹⁸Nanging bisa uga ana sing ngomong ngéné: “Kowé nduwé pertyaya, aku nduwé penggawé.” Aku bakal nyauri: “Tyoba duduhna pertyayamu sing tanpa penggawé kuwi marang aku lan aku bakal nduduhké marang kowé pertyayaku sangka penggawé-penggawéku.”

¹⁹Kowé pertyaya yèn mung ana Gusti Allah siji? Kuwi betyik! Nanging demit-demit uga pertyaya bab kuwi lan pada gemeter.

²⁰Hé, wong bodo, apa kowé saiki gelem ngakoni, yèn pertyaya tanpa penggawé kuwi pertyaya sing kosong?

²¹Abraham, bapak leluhur kita, apa ora awit sangka penggawé-penggawéné enggoné dibeneraké, nalika piyambaké ngurbanké Isak, anaké, ing mesbèh?

²²Kowé pada weruh, yèn pertyaya kuwi tumindaké bebarengan karo penggawé-penggawéné, lan awit sangka penggawé-penggawé kuwi pertyaya dadi sampurna.

²³Karo mengkono kedadian tenan tembungé sing tegesé ngéné: “Abraham pertyaya marang Gusti Allah, nanging ya pertyayané kuwi sing njalari Abraham dianggep bener.” Awit sangka kuwi Abraham disebut: “Kantyané Gusti Allah.”

²⁴Dadi kowé pada weruh, yèn manungsa enggoné dibeneraké jalaran sangka penggawé-penggawéné, ora mung sangka pertyayané waé.

²⁵Mengkono uga Rahab, lonté kuwi, apa ora awit sangka penggawéané enggoné dibeneraké, nalika ndelikké para tukang ngindik ing omahé, terus mitulungi, metu dalan liyané?

²⁶Awit kayadéné awak tanpa roh kuwi mati, mengkono uga pertyaya tanpa penggawé kuwi ya mati.