Read Caribbean Javanese Yakobus 3 Bible Online

Yakobus 3 - Caribbean Javanese bible

Yakobus 3

¹Para sedulurku, ing tengahmu aja okèh sing kepéngin dadi guru; jalaran kowé pada weruh, yèn kita dadi guru, bakal pada diadili perkarané karo ukuran sing luwih abot.

²Awit kita kabèh pada kesalahan ing perkara okèh; sapa sing ora kesalahan ing tetembungané, kuwi wong sampurna, sing bisa ngwasani awaké sekujur.

³Kita pada masang kendali ing tyangkemé jaran, terus nuruti kekarepan kita, karo mengkono kita uga bisa ngwasani awaké sekujur.

⁴Lan menèh, delengen kapal-kapal, senajan gedé banget lan disurung karo angin banter, nanging kena dikongkon karo kemudi sing tyilik banget, miturut kekarepané juru mudi.

⁵Mengkono uga ilat, senajan dadi pérangané awak sing tyilik, nanging kena kanggo ngomongké perkara-perkara sing gedé. Delengen, senajan mung sak pelik, geni kuwi bisa ngobong alas sing gedé.

⁶Ilat kuwi ya geni, kaya waé jagaté sing duraka lan dadi golongané awak kita, sing bisa ngregeti awak sekujur lan ngobong urip kita; nanging ilat kuwi déwé diobong karo geniné neraka.

⁷Sak kabèhé kéwan alas, bangsa manuk, lan kéwan-kéwan mbrangkang lan kéwan-kéwan segara, kuwi bisa digawé nurut lan wis kelakon digawé ora giras karo manungsa,

⁸nanging ora ana wong sijia waé sing bisa nggawé manuté ilat; ilat kuwi sing ala kaya kéwan galak sing ora kena dikwasani lan kebak ratyun sing matèni.

⁹Karo ilat kita memuji Gusti, Bapak kita, lan karo ilat kita nyepatani manungsa, sing digawé miturut rupané Gusti Allah,

¹⁰sangka tutuk siji ngetokké berkah lan bebendu. Sing mengkono kuwi, para sedulurku ora kena kelakon.

¹¹Apa ana sumber sing metu banyuné énak lan pait sangka sumber siji?

¹²Para sedulurku, wit anjir apa bisa nguwohké saitun utawa wit anggur nguwohké anjir? Mengkono uga sumber banyu asin ora bisa ngetokké banyu énak.

¹³Sapa tunggalmu sing wityaksana lan pinter? Kuwi dunungna penggawéané karo tyarané urip sing betyik awit kawityaksanan sing tukul sangka alusé pikiran.

¹⁴Yèn kowé pada nduwé rasa mèri lan mung mikir awakmu déwé, kowé aja pada gemunggung lan aja goroh, kuwi nglawan kabeneran!

¹⁵Kuwi duduk kawityaksanan sing mudun sangka nduwur, nanging sangka ndonya iki, sangka kamanungsan, sangka demit-demit.

¹⁶Awit angger ana mèri lan mung mikir awaké déwé, mesti bakal ana kerusuhan lan sak rupané penggawé ala.

¹⁷Nanging kawityaksanan sing sangka nduwur, kuwi sing ndisik déwé murni, terus seneng rukun, alus ing pikiran, mbangun turut, sugih kawelasan lan nguwohké kabetyikan, ora pilih-sih lan ora lamis.

¹⁸Nanging woh sing dadiné sangka kabeneran kuwi disebaraké sak njeruhné katentreman kanggo wong-wong sing pada mbangun katentreman.