Read Caribbean Javanese 1 Pétrus 5 Bible Online

1 Pétrus 5 - Caribbean Javanese bible

1 Pétrus 5

¹Para pinituwa ing tengahmu kuwi tak pituturi, awit aku iki dadi kantya pinituwa lan seksi sangsarané Kristus, sing bakal pada olèh panduman kamulyan yèn mbésuk bakal dibukakké:

²Kumpulan wedusé Gusti Allah ing kowé kuwi engonen, aja awit kepeksa, nanging karo sak legané ati sing tyotyok karo karepé Gusti Allah, lan aja awit sangka nguber untungé, nanging awit kuwajipané ngladèni.

³Kowé aja tumindak kaya arep ngwasani wong-wong sing dipertyayakké marang kowé, nanging dadia tulada kanggo kumpulan kuwi.

⁴Mbésuk yèn Pangon Gedé teka, kowé bakal pada nampani makutané kamulyan sing ora bisa rusak.

⁵Semono uga kowé, hé para nom-noman, pada nuruta marang para wong tuwa, siji lan sijiné pada andap asor, awit: “Gusti Allah nglawan marang wong sing gemunggung, nanging ngekèki kawelasan marang wong sing andap asor.”

⁶Awit kuwi pada ngasorna awakmu ing sak ngisoré tangané Gusti sing rosa, supaya kowé pada diluhurké ing waktu sing wis ditemtokké.

⁷Sak kabèhé sumelangmu pasrahna marang Panjenengané, awit Panjenengané sing ngrumati kowé kabèh.

⁸Pada sadara ing pikiran lan ngati-ati, jalaran mungsuhmu iblis kuwi, klinteran kaya singa nggeruh-nggeruh nggolèki manungsa sing kena dipangan.

⁹Lawanen karo pertyaya sing kuwat, jalaran kowé pada mengertèni yèn sedulurmu tunggal pertyaya ing sak ubengé jagat, kabèh ya pada katekan ing sangsara kaya mengkono.

¹⁰Nanging Gusti Allah sumberé sak kabèhé kawelasan, sing wis nyeluk kowé kabèh ing Kristus marang kamulyan-Né sing langgeng, bakal nyampurnakké, njejekké, nguwatké lan ngukuhké kowé, sakwisé kowé pada ngalami sangsara sak untara waktu.

¹¹Ya Panjenengané kuwi sing nduwé pangwasa langgeng sak lawas-lawasé! Amin.

¹²Enggon-ku nulis tyekak marang kowé iki lantaran Silvanus, sing tak anggep sedulur tunggal pengandel sing kena dipertyaya, perlu ngomongi lan nyadarké kowé, yèn iki kawelasan sing tenan sangka Gusti Allah. Mulané pada ngadeka sing jejek ing sak njeruhné kawelasan kuwi mau!

¹³Salam marang kowé kabèh, sangka sedulurmu sing dipilih ing Babilon lan uga Markus, anakku.

¹⁴Pada salam-salamana karo ambungan sing sutyi. Katentreman anaa ing kowé kabèh ing njeruhné Kristus. Amin.