Read Caribbean Javanese 2 Pétrus 3 Bible Online

2 Pétrus 3 - Caribbean Javanese bible

2 Pétrus 3

¹Para sedulur sing ditrésnani, layang iki wis sing kaping pindo, sing tak tulis marang kowé. Ing layang loro kuwi, aku mbudidaya nangèkké pangertèn sing murni karo pepéling-pepéling,

²supaya kowé pada éling marang tembungé sing mbiyèn wis diomongké karo para nabi sing sutyi, lan marang tembungé Gusti lan Juruslamet, lantaran para rasulmu marang kowé kabèh.

³Sing perlu banget kudu kok mangertèni, ya kuwi yèn ing dina pungkasan bakal ana para wong sing teka moyoki, ya kuwi wong sing mlakuné pada nuruti hawa-nepsuné,

⁴lan sing pada nduwé tembung ngéné: “Endi perjanjian bakal tekané kuwi? Jalaran wis wiwit nalika para mbah kita, samubarang kabèh ajek waé kaya nalika digawé.”

⁵Wong-wong kuwi sengaja ora gelem ngerti, yèn awit sangka pitutur-pituturé Gusti Allah wiwit mbiyèn wis ana langit lan uga ana bumi, sing dadiné sangka banyu lan awit banyu.

⁶Lan awit sangka banyu kuwi bumi waktu semono wis entèk, klelep karo banjir bandang.

⁷Nanging karo tembungé kuwi mau uga, langit lan bumi sing saiki bakal diobong karo geni, nanging saiki ijik dijaga nganti ing dina pengadilan lan entèkké para wong mblarah.

⁸Mung waé para sedulur sing ditrésnani, perkara siji iki ora kena kok lalèkké, ya kuwi yèn kanggo Gusti sedina kuwi kaya waé 1000 taun, lan 1000 taun kuwi kaya waé sedina.

⁹Gusti ora ngrendet enggoné netepi perjanjian-Né, senajan ana sakwijiné wong sing ngarani ngrendet. Panjenengané nyabari kowé, awit karepé aja nganti ana wong sing nemu tyilaka, nanging supaya wong kabèh pada mbalik lan mratobat.

¹⁰Nanging dina tekané Gusti kuwi tekané kaya tyarané maling; ing dina kuwi langit bakal entèk karo swara gembleger medèni lan pérangan-pérangané bakal lebur kobong, uga bumi lan kabèh ing kono bakal entèk.

¹¹Mulané yèn samubarang kabèh iki bakal lebur karo tyara mengkono kuwi, awit kuwi kasutyian lan pangabekti sing kudu kok tindakké ing uripmu,

¹²ing sak njeruhné kowé pada ngentèn-entèni lan nggeliské tekané dinané Gusti Allah. Ing dina kuwi langit bakal lebur karo geni lan pérangan-pérangané luluh awit murupé.

¹³Nanging tyotyok karo perjanjian-Né, kita pada ngentèn-entèni marang langit anyar lan bumi anyar sing ana kabenerané.

¹⁴Mulané para sedulur sing ditrésnani, sak njeruhné kowé pada ngentèn-entèni marang kuwi mau, pada mbudidayaa supaya ketemu tanpa tyiri lan tanpa reget ing ngarepé Gusti karo tentrem-rahayu.

¹⁵Lan kesabarané Gusti kita kuwi anggepen kelunggaran kanggo kowé kabèh supaya pada olèh keslametan, ya kaya sing wis ketulis karo Paulus sedulur kita sing ditrésnani nulis marang kowé, miturut kawityaksanan sing dikèkké marang piyambaké.

¹⁶Perkara kuwi ditindakké ing layangé kabèh, nalika ngomongké perkara-perkara iki. Ing sak njeruhné layang-layangé kuwi ana bab sing angèl dingertèni, terus wong-wong sing ora ngerti lan ora kuwat pertyayané, njungkir-walikké perkara kuwi mau, njalari karusakané déwé, pada kaya sing ditindakké kanggo tulisan-tulisan liyané.

¹⁷Nanging kowé kabèh, para sedulur sing ditrésnani, sak durungé wis pada mengertèni perkara kuwi. Mulané pada sing ati-ati, supaya aja nganti kesèrèt karo kesasaré wong-wong sing ora ngerti pepakon, lan aja kélangan gondèlanmu sing kuwat.

¹⁸Malah pada mundak-mundaka ing kawelasan lan ing pangertèn marang Gusti lan Juruslamet kita, Yésus Kristus. Panjenengané sing dikèki kamulyan saiki nganti tekan sak lawas-lawasé.