Read Caribbean Javanese 1 Yohanes 5 Bible Online

1 Yohanes 5 - Caribbean Javanese bible

1 Yohanes 5

¹Saben wong sing pertyaya yèn Yésus kuwi Kristus, kuwi lairé sangka Gusti Allah, lan saben wong sing trésna marang Panjenengané sing nglairké, kuwi ya trésna marang sing dilairké Panjenengané.

²Enggon kita mengertèni yèn kita pada nrésnani para anaké Gusti Allah, ya kuwi yèn kita pada trésna marang Gusti Allah lan netepi pepakon-Né.

³Awit iki katrésnan marang Gusti Allah, ya kuwi yèn kita pada netepi pepakon-Né. Pepakon-Né ora abot,

⁴awit kabèh sing lair sangka Gusti Allah kuwi ngalahké jagat. Lan iki kemenangan sing ngalahké jagat, ya kuwi: pertyaya kita.

⁵Sapa ta sing ngalahké jagat, kejaba wong sing pertyaya yèn Yésus kuwi Putrané Gusti Allah?

⁶Iki Panjenengané sing tekané karo banyu lan getih, ya kuwi Yésus Kristus, ora mung karo banyu waé, nanging karo banyu lan getih. Nanging Roh kuwi sing ngekèki paseksi, awit Roh kuwi kabeneran.

⁷Awit ana telu sing pada ngekèki paseksi [ing swarga: Bapak, Sang Pitutur lan Roh Sutyi; lan telu-teluné kuwi siji.

⁸Lan ana telu sing dadi seksi ing bumi]:[1] Roh lan banyu lan getih lan telu-teluné kuwi siji.

⁹Yèn kita pada nganggep paseksiné manungsa, mesti paseksiné Gusti Allah kuwi ngungkuli. Awit iki paseksiné Gusti Allah, ya kuwi: Panjenengané nyeksèni kanggo Putra-Né.

¹⁰Sapa sing pertyaya marang Putrané Gusti Allah, kuwi nduwèni paseksi mengkono ing atiné; sapa sing ora pertyaya marang Gusti Allah, kuwi nganggep Panjenengané goroh, awit ora ngandel marang paseksi sing wis dikèkké Gusti Allah kanggo Putrané.

¹¹Lan paseksiné ya kuwi: Gusti Allah wis ngekèkké urip sing langgeng, lan urip kuwi manggon ing Putrané.

¹²Sapa sing nduwèni Putra, kuwi nduwèni urip. Sapa sing ora nduwèni Putrané Gusti Allah, kuwi ora nduwèni urip.

¹³Kabèh kuwi mau tak tulis marang kowé, supaya kowé sing pada pertyaya marang asma-Né Putrané Gusti Allah, pada ngertia yèn kowé kabèh pada nduwèni urip langgeng.

¹⁴Enggon kita kendel ing pertyaya marang Panjenengané, Panjenengané mesti nuruti pandonga kita, yèn kita njaluk apa-apa marang Panjenengané, sing tyotyok karo karepé.

¹⁵Lan yèn kita pada ngerti yèn Panjenengané nuruti apa waé, sing kita jaluk, dadiné kita pada ngerti uga, yèn kita wis nampa apa sing kita jaluk marang Panjenengané.

¹⁶Yèn ana wong sing ngerti seduluré tunggal pertyaya nglakoni dosa, ya kuwi dosa sing ora nekakké pati, kuwi ndedongaa marang Gusti Allah, banjur Panjenengané bakal ngekèki urip marang wong kuwi, ya kuwi sing pada gawé dosa sing ora nekakké pati. Ana dosa sing nekakké pati: Yèn kanggo kuwi, aku ora ngongkon ndongakké.

¹⁷Sak kabèhé sing ala kuwi dosa, nanging ana dosa sing ora nekakké pati.

¹⁸Kita ngerti, yèn saben wong sing lair sangka Gusti Allah kuwi ora gawé dosa, nanging diayomi karo Panjenengané, sing lair sangka Gusti Allah, nganti si duraka ora bisa nggepok wong mau.

¹⁹Kita ngerti, yèn asal-usulé kita sangka Gusti Allah lan sak jagat kabèh dipréntah karo kwasa duraka.

²⁰Nanging kita pada weruh, yèn Putrané Gusti Allah wis teka lan wis ngekèki pangertèn marang kita, supaya kita kenal marang sing Sejati; lan kita manggon ing Sejati, ing njeruhné Putrané Yésus Kristus. Panjenengané kuwi Gusti Allah Sing Sejati lan urip sing langgeng.

²¹Anak-anakku, pada sing ati-ati marang sak kabèhé brahala.