Read Caribbean Javanese Para Rèkter 10 Bible Online

Para Rèkter 10 - Caribbean Javanese bible

Para Rèkter 10

¹Sakwisé Abimèlèk sing ngadek dadi rèkter ngluwari Israèl kuwi Tola anaké Puah anaké Dodo, wong sangka taler Isakar, omahé ing Samir ing pegunungan Efraim.

²Lan enggoné ngadili Israèl lawasé telulikur taun, terus mati, dikubur ing Samir kono.

³Sakwisé Tola sing ngadek dadi rèkter Yair wong Giléad, enggoné ngadili Israèl suwéné rolikur taun.

⁴Anaké lanang telung puluh, sing pada numpak kimar lanang telung puluh, lan pada nduwèni kuta telung puluh, sing saiki diarani Hawot-Yair, pernahé ing tanah Giléad.

⁵Terus Yair mati, lan dikubur ing Kamon.

⁶Wong Israèl pada mblarah nglakoni sing ala ing ngarepé GUSTI; pada ngabekti marang para Baal lan Astorèt, marang para allahé wong Aram, para allahé wong Sidon, para allahé wong Moab, para allahé turunané Amon lan para allahé wong Filistèn, pada nyingkur marang GUSTI lan ora ngabekti marang Panjenengané.

⁷Nesuné GUSTI terus mulat-mulat marang wong Israèl, nganti pada dipasrahké ing tangané wong Filistèn lan turunané Amon.

⁸Ing taun kuwi uga bangsa kuwi nindes lan nglarani wong Israèl; enggoné pada nindes kabèh wong Israèl sing pada manggon ing sabrangé laut Yordan, ing tanah Amori sing peneré ing tanah Giléad suwéné nganti wolulas taun.

⁹Lan wong turunané Amon mau malah ya terus pada nyabrang ing laut Yordan, arep ngluruk perang nglawan taleré Yéhuda, taleré Bényamin lan turunané Efraim, nganti wong Israèl pada banget kepèpèté.

¹⁰Wong Israèl terus pada sambat marang GUSTI tembungé: “Kula wis pada nggawé dosa marang Panjenengan, awit pada nyingkur Gusti Allah kula lan ngabekti marang Baal.”

¹¹Nanging GUSTI terus ngomong marang wong Israèl: “Apa duduk Aku sing wis ngluwari kowé sangka tangané wong Egipte, wong Amori, turunané Amon, wong Filistèn,

¹²wong Sidon, taleré Amalèk lan taleré Maon, sing nindes kowé, waktu kowé pada sambat marang Aku?

¹³Nanging kowé pada nyingkur marang Aku lan ngabekti marang allah liyané, mulané Aku ora bakal ngluwari kowé menèh.

¹⁴Pada lungaa sambata marang para allah sing pada kok pilih, kuwi bèn pada ngluwari kowé, yèn kowé pada kepèpèt.”

¹⁵Semauré wong Israèl marang GUSTI: “Kula wis pada nggawé dosa, Panjenengan kapakké sak karep Panjenengan. Mung saiki muga Panjenengan tulungi.”

¹⁶Terus pada nyingkirké allah-allahé liyané sangka tengahé lan pada ngabekti marang GUSTI. GUSTI ora bisa menggak ati-Né weruh kasangsarané wong-wong mau.

¹⁷Terus wong turunané Amon pada diklumpukké lan pada manggon ing Giléad, nanging wong Israèl pada nglumpuk lan manggon ing Mispa.

¹⁸Para penggedéné bangsa ing Giléad pada rerasanan: “Sapa ta sing wani miwiti perang nglawan turunané Amon kuwi? Kuwi sing bakal pantes dadi penggedéné sakkèhé wong Giléad.”