Read Caribbean Javanese Para Rèkter 12 Bible Online

Para Rèkter 12 - Caribbean Javanese bible

Para Rèkter 12

¹Wong Efraim pada diklumpukké, terus pada menyang ing Safon, lan pada ngomong marang Yéfta: “Sampéyan ngluruk perang nglawan turunané Amon kuwi kenèng apa kok ora ngajak kula? Mulané omahé sampéyan bakal kula obong kabèh karo sampéyan kabèh!”

²Yéfta terus nyauri marang wong-wong mau: “Aku lan bangsaku wis pada ing sak njeruhné peperangan ramé karo turunané Amon; aku terus ngundang kowé, nanging kowé pada ora teka ngluwari aku sangka tangané.

³Bareng aku weruh, yèn ora ana sing teka nulungi, dadiné aku ngetohké nyawaku ngluruk wong turunané Amon, lan GUSTI ngekèkké turunané Amon ing tanganku. Kenèng apa kowé saiki kok pada ngluruk aku ngajak perang?”

⁴Yéfta terus nglumpukké sakkèhé wong Giléad, terus perang nglawan Efraim, nganti Efraim dikalahké karo wong Giléad. Awit wong kuwi pada ngomong: “Kowé kuwi wong sing pada mblayu sangka taleré Efraim!” - panggonané wong Giléad kuwi ing tengah-tengahé wong Efraim lan Manasé -

⁵Wong Giléad kuwi pada ngenggoni sabrangané laut Yordan, kanggo nyegat wong Efraim. Yèn ana wong Efraim sing mblayu, terus nembung arep nyabrang, wong Giléad terus pada nakoni: “Apa kowé wong Efraim?” Nanging yèn nyauri: “Duduk”,

⁶terus dikongkon ngomong: “Syibolèt.” Yèn enggoné ngutyapké: sibolèt, dadi ketara yèn ora tètèh pangutyapé, terus dityekel lan dipatèni ing sabrangané laut Yordan kono. Ing waktu semono wong Efraim sing dipatèni ana 42.000.

⁷Yéfta enggoné dadi rèkter ing Israèl suwéné nem taun. Yéfta wong Giléad terus mati lan dikubur ing salah sakwijiné kuta ing tanah Giléad.

⁸Sakwisé Yéfta terus sing dadi rèkter ing Israèl kuwi Ebsan, sangka Bètléhèm.

⁹Anaké lanang telung puluh. Anaké wadon telung puluh dirabèké olèh wong lanang taler liyané lan anaké lanang telung puluh dirabèké olèh wong wadon sangka taler liyané. Piyambaké ngwasani wong Israèl suwéné pitung taun.

¹⁰Ebsan terus mati, lan dikubur ing Bètléhèm.

¹¹Sakwisé Ebsan sing dadi rèkter ing Israèl kuwi Elon, wong Sébulon. Enggoné ngwasani wong Israèl lawasé sepuluh taun.

¹²Elon wong Sébulon mau terus mati lan dikubur ing Ayalon, ing tanah Sébulon.

¹³Sakwisé Elon sing dadi rèkter ing Israèl kuwi Abdon anaké Hilèl, wong Piraton.

¹⁴Piyambaké duwé anak lanang patang puluh lan putuné lanang telung puluh, sing pada numpak kimar lanang. Enggoné ngwasani bangsa Israèl suwéné wolung taun.

¹⁵Abdon anaké Hilèl wong Piraton mau terus mati lan dikubur ing Piraton ing tanah Efraim, ing pegunungané wong Amalèk.