Read Caribbean Javanese Para Rèkter 13 Bible Online

Para Rèkter 13 - Caribbean Javanese bible

Para Rèkter 13

¹Wong Israèl pada mblarah enggoné nglakoni sing ala ing ngarepé GUSTI, mulané terus dipasrahké karo GUSTI ing tangané wong Filistèn suwéné patang puluh taun.

²Ing waktu kuwi ana sakwijiné wong sangka Sora, tunggalé turunané Dan, jenengé Manoak, bojoné gabuk, ora nduwé anak.

³Lan Mulékaté GUSTI terus ngétok marang wong wadon mau lan diomongi mengkéné: “Kowé kuwi pantyèn gabuk, ora nduwé anak, nanging kowé bakal meteng lan nduwé anak lanang.

⁴Saiki, awakmu jaganen, aja ngombé anggur utawa ombèn-ombèn sing mendemi lan aja mangan apa-apa sing haram.

⁵Awit kowé bakal meteng lan nduwé anak lanang; kuwi sirahé ora kena kedemok karo péso tyukur, awit botyah kuwi wiwit ing wetengé ibuné bakal dadi nasir pilihané Gusti Allah, lan bakal miwiti ngluwari Israèl sangka tangané wong Filistèn.”

⁶Wong wadon mau terus mlebu lan omong marang sing lanang tembungé: “Waktu mau ana abdiné Gusti Allah nemoni kula, rupané kaya mulékaté Gusti Allah, kula wedi banget. Kula ora takon tekané sangka ngendi, lan kula ora dikèki ngerti asmané.

⁷Nanging tembungé marang kula: kowé bakal meteng lan nduwé anak lanang; mulané kowé aja ngombé anggur utawa saben sing mendemi lan aja mangan apa-apa sing haram, awit botyah kuwi bakal dadi nasir pilihané Gusti Allah wiwit ing wetengé ibuné nganti tekan ing dinané patiné.”

⁸Manoak terus ndedonga marang GUSTI tembungé: “Duh Gusti, kula njaluk muga abdiné Gusti Allah kongkonan Panjenengan kuwi iki nemoni kula wong loro lan mulangké marang kula apa sing perlu kula lakoni kanggo botyah sing bakal lair kuwi.”

⁹Gusti Allah terus nuruti penjaluké Manoak, nanging Mulékaté GUSTI terus nemoni wong wadon kuwi menèh, waktu ijik lungguh ing kebon, nanging Manoak bojo lanangé nalika ora ing kono.

¹⁰Ing kono wong wadon kuwi gelis-gelis mlayu marang sing lanang mengkéné: “Wong lanang sing nemoni kula kepungkur kuwi ngétok marang kula menèh.”

¹¹Manoak terus ngadek, ngetutké bojoné. Bareng wis ketemu karo wong lanang mau, terus ngomong: “Apa Panjenengan kuwi sing wis ngekèki tembungé marang bojo kula iki?” Semauré: “Ya bener.”

¹²Manoak terus ngomong: “Mbésuk yèn tembungé Panjenengan kuwi kedadian, kaya kepiyé mengko tyarané uripé botyah kuwi lan solah tingkahé?”

¹³Semauré Mulékaté GUSTI marang Manoak: “Kabèh sing wis Tak omongaké marang wong wadon kuwi, kudu didohi.

¹⁴Aja mangan apa-apa sing asal-usulé sangka wit anggur; anggur lan samubarang sing mendemi ora kena diombé lan aja mangan saben sing haram. Apa sing wis dipréntahké marang dèwèké kuwi lakonana kabèh.”

¹⁵Manoak terus ngomong marang Mulékaté GUSTI: “Supaya kula pada dililani ngendek marang Panjenengan ing kéné, kula bakal ngolahké tyempé kanggo Panjenengan.”

¹⁶Nanging semauré Mulékaté GUSTI marang Manoak: “Senajan Aku kok jaluk mandek, kurbanmu bakal ora Tak pangan. Nanging yèn kowé arep masak kuwi kanggo kurban obongan, kuwi pasrahna marang GUSTI.” Awit Manoak ora ngerti, yèn Piyambaké kuwi Mulékaté GUSTI.

¹⁷Manoak terus ngomong marang Mulékaté GUSTI: “Jeneng Sampéyan kuwi sapa, supaya kula bisaa ngluhurké Sampéyan, yèn tembungé Sampéyan kuwi kedadian.”

¹⁸Nanging Mulékaté GUSTI terus ngomong marang Manoak: “Kenèng apa kowé takon asmaku? Jeneng kuwi apa ora nggumunaké?”

¹⁹Manoak terus njupuk tyempé karo kurbané panganan, dipasrahké marang GUSTI ditumpangké ing watu. Panjenengané terus nindakké mujijat sing dideleng Manoak lan bojoné.

²⁰Bareng karo urupé geni sing murup sangka mesbèh menyang langit, Mulékaté GUSTI tekan menyang nduwur ing sak njeruhné urupé geni mesbèh mau. Bareng Manoak lan bojoné pada weruh sing mengkono kuwi, terus pada sendeku rainé sujut ing bumi.

²¹Wiwit ing waktu kuwi Mulékaté GUSTI wis ora ngétok menèh marang Manoak lan bojoné. Ing kono Manoak ngerti yèn kuwi Mulékaté GUSTI,

²²Manoak terus omong marang bojoné: “Mesti aku lan kowé bakal pada mati, awit wis pada weruh Gusti Allah.”

²³Nanging bojoné nyauri: “Yèn GUSTI gelem ndadèkké mati marang kita, mesti ora nganti nampani kurban obongan lan kurban panganan sangka tangan kita, lan kita ora diduduhi kuwi mau kabèh, lan ora dikrungoni sing kaya mengkéné ing waktu saiki.”

²⁴Sakwisé mengkono wong wadon mau nglairké anak lanang, sing dijenengaké: Simson. Botyahé mundak-mundak gedéné lan diberkahi karo GUSTI.

²⁵Atiné terus wiwit diobahké karo Rohé GUSTI ing Mahané-Dan sing manggon ing antarané Sora lan Esytaol.