Read Caribbean Javanese Para Rèkter 15 Bible Online

Para Rèkter 15 - Caribbean Javanese bible

Para Rèkter 15

¹Sakwijiné dina ing waktuné panèn gandum, Simson ngéndangi bojoné karo nggawa olèh-olèh tyempé, tembungé: “Kula bakal nemoni bojo kula ing kamaré.” Nanging bapaké bojoné ora nglilani mlebu.

²Tembungé bapaké mau: “Aku ngira, yèn kowé mesti sengit banget marang dèwèké, mulané tak wènèhaké marang kantyamu. Adiké apa ora luwih ayu tenimbang karo dèwèké, mbok kuwi waé jukuken dadi gantiné.”

³Simson terus ngomong marang wong kono: “Sepisan iki aku ora bisa disalahké karo wong Filistèn, yèn aku nindakké sing ala marang wong-wong kuwi.”

⁴Simson terus lunga nyekel asu alasan 300, buntuté terus pada ditalèni loro-loro lan saben buntuté loro dipasang ontyor ing tengahé.

⁵Ontyoré terus pada disumeti lan asuné alasan terus pada digetak menyang kebon gandumé wong Filistèn sing durung dipanèn, uga kebon-keboné saitun.

⁶Wong Filistèn terus pada ngomong: “Sapa ta sing nindakké kuwi?” Terus ana sing semaur: “Kuwi Simson, mantuné wong Timna, awit bojoné direbut diwènèhké marang kantyané.” Wong Filistèn terus pada teka lan wong wadon mau diobong uga bapaké.

⁷Ing kono tembungé Simson marang wong mau: “Yèn kowé pada nduwé pokal gawé kaya mengkono, aku iki bakal ora lèrèn-lèrèn sak durungé mbaleské awakku marang kowé.”

⁸Wong mau balung-balungé terus pada digepuki sak kuwaté. Dèkné terus lunga lan manggon ing guwa watu ing gunung Etam.

⁹Bangsa Filistèn terus pada ngluruk lan manggon ing tanah Yéhuda lan kasebar tekan ing Lehi.

¹⁰Wong Yéhuda pada ngomong: “Kenèng apa kowé pada ngluruk aku?” Semauré wong Filistèn: “Aku pada ngluruk arep mbanda Simson lan bakal nindakké pada kaya sing ditindakké marang kita.”

¹¹Terus ana wong Yéhuda 3000 pada marani ing guwa watu ing Etam lan ngomong marang Simson: “Sampéyan apa ora weruh, yèn wong Filistèn kuwi pada ngwasani kita? Kenèng apa kok sampéyan nindakké mengkéné marang kita?” Semauré Simson marang wong mau: “Penggawéku marang dèwèké kuwi pada uga karo sing dadi tumindaké marang aku.”

¹²Tembungé wong Yéhuda marang Simson: “Teka kita mréné kuwi bakal nggawa sampéyan, terus kita pasrahaké marang tangané wong Filistèn.” Tembungé Simson marang wong kuwi: “Kowé pada sumpaha marang aku yèn kowé déwé bakal ora nyerang aku.”

¹³Wong mau terus pada ngomong marang rèkter Simson, semauré: “Ora, mung bakal kita gawa waé, terus kita pasrahaké marang tangané, nanging ora kula patèni.” Simson terus digawa karo ditalèni tali anyar loro lan digawa metu puntuk watu kuwi.

¹⁴Sak tekané ing Lehi terus dipapak karo wong Filistèn karo disuraki. Simson kedunan karo Rohé GUSTI, nganti tali ing tangané dadi kaya waé gagang damèn sing kobong kena geni, lan bandané pada lebur udar sangka tangané.

¹⁵Lan dèkné olèh balung rahangé kimar sing anyar, terus dielungké tangané balungé dijikuk lan digawé nyerang wong 1000 nganti pada mati.

¹⁶Simson ngomong: “Karo rahangé kimar bangsa kimar kuwi tak ajar, karo rahangé kimar wong 1000 tak getyek.”

¹⁷Sakwisé ngomong mengkono balung rahangé mau dibuwang. Panggonan ing kono terus diarani Ramat-Lehi.

¹⁸Waktu Simson ngelak banget, sambat marang GUSTI: “Panjenengan wis ngekèki keslametan gedé mengkéné lantaran tangané abdi Panjenengan, ing saiki apa kula bakal mati ngelak, lan tiba ing tangané wong ora sunat kuwi?”

¹⁹Gusti Allah terus mbengkah gampèng ing Lehi lan kuwi terus metu banyuné. Simson terus ngombé, nganti pulih dadi kuwat menèh lan seger dèkné. Mulané sumber kuwi diarani Sumber Pesambat, sing ijik ing Lehi tekan sepréné.

²⁰Simson enggoné ngadili bangsa Israèl waktu dijajah wong Filistèn suwéné rong puluh taun.