Read Caribbean Javanese Para Rèkter 17 Bible Online

Para Rèkter 17 - Caribbean Javanese bible

Para Rèkter 17

¹Ing pegunungan Efraim ana sakwijiné wong, jenengé Mika.

²Dèwèké ngomong marang ibuné: “Duwité slaka ibu, 1100 sing ilang dijukuk karo wong, nganti sampéyan ngutyapké sumpah - kula déwé krungu tembungé sampéyan - kuwi ing kula, kula sing jikuk.” Semauré ibuné: “Diberkahi anakku karo GUSTI.”

³Sakwisé kuwi duwit slaka 1100 kuwi terus dibalèkaké marang ibuné. Nanging ibuné ngomong: “Duwit kuwi tak sutyèkké kanggo GUSTI, tak pasrahké marang anakku, supaya dikanggokké kanggo nggawé retya ukir-ukiran lan retya tyitakan. Mulané saiki duwit kuwi tak balèkké marang kowé.”

⁴Nanging duwit karo wongé dibalèkaké marang ibuné, wong wadon kuwi terus njupuk duwité slaka 200 lan diwènèhké marang tukang slaka; duwit kuwi digawé retya ukir-ukiran lan tyitakan lan terus didèkèkké ing omahé Mika.

⁵Mika kuwi nduwé omah brahala. Terus digawèkké klambiné imam lan retya; salah sijiné anaké lanang didadèkké imam.

⁶Ing waktu semono ing Israèl ora ana ratuné, angger wong nindakké apa sing dianggep bener miturut panemuné déwé-déwé.

⁷Ana sakwijiné wong enom sangka Bètlehèm-Yéhuda, sangka taler Yéhuda; dèwèké klebu wong Lévi lan manggon ing kono dadi wong neka.

⁸Wong mau terus budal sangka kuta Bètlehèm-Yéhuda, arep neka ing ngendi waé janji olèh panggonan; enggoné mlaku tekan ing pegunungan Efraim, ing omahé Mika.

⁹Terus ditakoni karo Mika mau: “Sampéyan sangka ngendi?” Semauré: “Kula kuwi wong Lévi sangka Bètlehèm-Yéhuda, kula mlaku bakal neka ing ngendi waé angger olèh panggonan.”

¹⁰Omongé Mika marang wong mau: “Hayuk sampéyan kula njaluk manggon nunggal karo kula, bakal kula anggep bapak lan imam kula, saben taun sampéyan bakal kula kèki duwit slaka sepuluh, sandangané sak pengadek lan mangan.”

¹¹Wong Lévi mau ngrujuki gelem manggon dadi siji karo wong mau. Wong nom mau dianggep kaya salah sijiné anaké déwé.

¹²Mika netepi wong Lévi mau, wong nom kuwi, dadi imamé lan manggon ing omahé Mika.

¹³Semauré Mika: “Saiki aku weruh, yèn GUSTI bakal ngekèki katentreman marang aku, awit ana wong Lévi dadi imamku.”