Read Caribbean Javanese Para Rèkter 2 Bible Online

Para Rèkter 2 - Caribbean Javanese bible

Para Rèkter 2

¹Mulékaté GUSTI terus lunga sangka Gilgal menyang ing Bokim lan ngomong: “Aku wis nuntun mlakumu metu sangka negara Egipte, lan kowé pada Tak lebokké ing negara sing wis Tak janjèkké karo sumpah marang para leluhurmu karo tembungé: Aku ora bakal mbatalké perjanjianku karo kowé ing sak lawas-lawasé,

²nanging kowé kuwi aja nggawé perjanjian karo wong negara kéné, mesbèhé malah burbrahana. Nanging kowé pada ora nggatèkké marang tembung-Ku. Kepriyé kowé kok pada mengkono?

³Aku malah uga wis ngomong: Wong kuwi bakal pada ora Tak tundungi sangka ngarepmu, malah kuwi bakal pada dadi mungsuhmu lan kabèh allahé bakal pada dadi jiret kanggo kowé.”

⁴Bareng Mulékaté GUSTI wis ngomong mengkono marang wong Israèl kabèh, wong-wong kuwi terus pada nangis banter.

⁵Mulané panggonan kuwi dijenengké Bokim. Wong-wong mau terus pada masrahaké kurban marang GUSTI ing kono.

⁶Sakwisé Yosua nglilani wong Israèl lunga, terus pada budal siji-siji menyang tanah pandumané, lan pada ngenggoni negara kono.

⁷Nanging bangsa mau tetep pada ngabekti marang GUSTI selawasé uripé Yosua lan selawasé uripé para pinituwa sing ijik luwih dawa umuré nganti sakwisé Yosua, lan sing pada menangi kabèh mujijaté GUSTI sing ditindakké marang Israèl.

⁸Lan Yosua anaké Nun, abdiné GUSTI kuwi mati, umuré 110 taun,

⁹terus dikubur ing tanah pandumané Timnat-Heres, ing pegunungan Efraim, sak loré gunung Gaas.

¹⁰Bareng wong sak barakané kuwi kabèh wis pada diklumpukké karo para leluhuré, terus tukul golongan liyané, sing ora kenal marang GUSTI lan ora ngerti bab apa sing ditindakké karo Panjenengané marang wong Israèl.

¹¹Wong Israèl terus pada nglakoni sing ala ing ngarepé GUSTI, pada ngabekti marang para Baal.

¹²Pada nyingkur marang GUSTI, Gusti Allahé para leluhuré, sing wis ngetokké sangka negara Egipte, pada miturut marang allah liyané, tunggalé para allahé para bangsa ing sak ubengé, lan pada sujut marang kuwi, nganti nggawé nesuné atiné GUSTI.

¹³Mengkono enggoné pada nyingkur GUSTI, lan Baal lan Astorèt pada disembah.

¹⁴Nganti nesuné GUSTI mulat-mulat marang wong Israèl, mulané pada dipasrahké marang ing tangané rampok lan dipasrahké marang pangwasané para mungsuhé ing sak ubengé, nganti pada ora bisa ngadepi mungsuhé mau.

¹⁵Menyanga ngendi waé ngluruk pada dilawan karo tangané GUSTI, nganti nemoni memala, netepi apa sing dipréntahké karo GUSTI karo sumpah, sak nalika pada banget susahé.

¹⁶Ing kono GUSTI terus ngedekké rèkter; sing pada ngluwari sangka tangané rampok.

¹⁷Nanging para rèkter mau uga pada ora diperduli, awit pada nglonté ngetutké allah liyané karo pada disujuti. Wong bangsa Israèl pada nyimpang sangka dalan sing dilakoni para leluhuré sing pada nggatèkké pepakoné GUSTI, lan pada nglakoni sing ora pantes.

¹⁸Saben-saben yèn GUSTI ngangkat rèkter kanggo dèwèké, GUSTI terus nunggal karo rèkter kuwi lan ngluwari umaté sangka tangané mungsuhé, selawasé uripé rèkter mau, awit GUSTI melas ngrungokké sambaté, awit sangka wong sing pada nggawé angèl lan nindes.

¹⁹Nanging yèn rèkter kuwi mati, terus pada nandangi ala menèh, luwih ala tenimbang karo leluhuré, pada miturut allah liyané karo pada dibektèni lan disujuti; pada ora mandek babar pisan tumindak lan mlakuné sing ala kuwi.

²⁰Yèn nesuné GUSTI mulat-mulat marang wong Israèl, tembungé mengkéné: “Awit bangsa iki nerak perjanjian-Ku, sing wis Tak omongké marang para leluhuré, lan pada ora nggatèkké marang tembung-Ku,

²¹mulané Aku ora gelem nerusaké nundungi bangsa siji-sijia sangka ngarepé, sing ijik dikarèkaké karo Yosua waktu matiné,

²²supaya bangsa-bangsa kuwi kena Tak kanggokké njajal wong Israèl, apa bakal pada tetep mlaku ing dalan sing diduduhké GUSTI kaya para leluhuré apa ora.”

²³Mengkono dadiné bangsa-bangsa kuwi mau pada dijarké manggon karo GUSTI lan ora gelis ditundungi lunga, lan ora dipasrahké marang tangané Yosua.