Read Caribbean Javanese Para Rèkter 5 Bible Online

Para Rèkter 5 - Caribbean Javanese bible

Para Rèkter 5

¹Ing dina kuwi Débora lan Barak anaké Abinoam pada ngidung mengkéné:

²Awit para suradaduné Israèl pada maju perang, lan awit bangsa kuwi pada masrahaké awaké karo éklas Pinujia GUSTI!

³Duh para ratu, pada ngrungokna! Lan uga para penggedé, pada ngrungokna! Yèn kula, kula bakal ngidung ngadep ing ngarepé GUSTI, lan ngidungké kidung kanggo GUSTI, Gusti Allahé Israèl.

⁴Duh GUSTI, waktu Panjenengan mlaku sangka kuta Seir, lan Panjenengan mlaku maju sangka panggonané bangsa Edom, bumi terus gonjang-ganjing, langit ya banjur ngetokké banyu mendung uga pada nètèské banyuné.

⁵Gunung-gunung, ya kuwi Sinai, pada horek ing ngarepé GUSTI, Gusti Allahé Israèl.

⁶Waktu jamané Samgar anaké Anat, lan jamané yaèl dalan gedé wis ora ana menèh, lan wong sing pada mlaku, kepeksa metu dalan sing ménggak-ménggok.

⁷Para wong sing manggon ing désa-désa wong Israèl pada meneng waé, ya pada meneng, nganti tekané kowé ngadek, Débora, dadi ibu ing Israèl.

⁸Waktu wong pada milih allah anyar, terus tukul perang ing ngarepé gapura, lan tamèng utawa tumbak ora kétok ing tengahé wong 40.000 ing Israèl.

⁹Atiku nuju marang para penggedéné suradadu Israèl marang para sing pada gelem tandang karo éklas ing antarané bangsa iki. Pinujia GUSTI!

¹⁰Kowé, sing pada numpak kimar wédok putih, sing pada njagong ing karpèt, sing pada mlaku ing ndalan, kabarana perkara kuwi!

¹¹Ing panggonané nimba banyu, miturut swarané wong sing pada ngidung, ing kono wong ngidungké penggawéané GUSTI sing adil, penggawéané sing adil kanggo désa-désané wong Israèl. Ing waktu kuwi umaté GUSTI pada medun menyang gapura.

¹²Tangia, tangia, Débora! Tangia, tangia memujia kidungan! Hé Barak, ngadeka lan para mungsuhmu pada giringen! Hé anaké Abinoam!

¹³Terus para wong luhur sing bisa utyul pada medun, umaté GUSTI pada medun dadi suradadu kanggo Panjenengané.

¹⁴Sangka taler Efraim wong-wong sing manggon ing Amalèk, pada medun menyang ing legokan, pada ngetutké kowé, hé, taler Bényamin karo suradadu-suradadumu. Sangka taleré Makir sing mudun para penggedéné perang, lan sangka taler Sébulon wong-wong sing pada nggawa teken sing digawé nglumpukké wong.

¹⁵Para pengarepé taler Isakar uga pada mbarengi Débora, lan kaya Isakar mengkono uga Naftali ya mbarengi Barak. Pada nututi dèwèké lan nyerang mlebu ing legokan. Nanging suradaduné taler Rubèn okèh sing pada gojak-gajek.

¹⁶Kenèng apa kowé kok pada tenguk-tenguk ing tengahé kandang-kandang. Karo ngrungokké sulingan sing kanggo ngundangi kumpulan? Sangka suradaduné taler Rubèn okèh sing mung mikir-mikir!

¹⁷Wong Giléad pada ayem waé ing sabrangé laut Yordan, nanging taler Dan, kena apa kok pada nunggoni prau-prauné? Taleré Asyèra tenguk-tenguk ing pinggir segara, meneng waé ing lekuk-lekuké segara.

¹⁸Nanging taler Sébulon kuwi bangsa sing wani ngetohké nyawané, mengkono uga taler Naftali ing puntuk-puntuk ing ara-ara.

¹⁹Para ratu pada ngluruk lan maju perang, ing waktu kuwi para ratu ing Kanaan pada perang, ing sak tyedaké Taanak ing sumberé kali Megido, nanging pada ora olèh slaka sing direbut.

²⁰Lintang-lintang ing langit pada maju perang, pada nglawan Siséra sangka langit.

²¹Kali Kison ngéntérké mungsuh, Kison, kali sing kesuwur wiwit jaman mbiyèn, Hé nyawaku, majua karo sak rosamu!

²²Ing waktu kuwi tratyaké jaran pada pating ketoplak, awit playuné jaran-jaran pada sliweran.

²³“Kuta Meros sepatanana!”, mengkono tembungé Mulékaté GUSTI, “para wong sing manggon ing kono kenaa ing bendu sak entèkké, awit pada ora teka ngréwangi GUSTI, ngréwangi GUSTI dadi suradadu.”

²⁴Kaberkahan Yaèl bojoné Hèbèr bangsa Kèni kuwi, ngungkuli para wong wadon liyané, dèwèké kaberkahan ngungkuli para wong wadon ing njeruh tarup.

²⁵Sing dijaluk wong kuwi banyu, nanging mèlek sing dikèkké, sing disuguhké kèju mèlek ing mangkok sing apik.

²⁶Tangané jikuk patoké, tangané tengen njikuk ameré tukang. Siséra dipalu, sirahé diremuk, pilingané diremuk dipantèk nganti tembus.

²⁷Wong gedé kuwi ambruk ing sandingé sikilé, mati ngglétak, ambruk mati ing sandingé sikilé, ing panggonané ambruk ya ana kono kuwi enggoné mati, dientèkké.

²⁸Ibuné Siséra ngungak sangka jendéla, lan mbengok sangka sak mburiné ruji-rujiné jendéla: “Kenèng apa krétané perang ora teka-teka, kenèng apa; swarané krétané durung krungu?”

²⁹Abdi wadon sing pinter déwé ing antarané para abdi, nyauri lan dèkné ya nyauri déwé mengkéné:

³⁰“Apa ora ijik pada olèh sing direbut lan didum-dumké, prawan siji utawa loro kanggo saben wong, sing direbut sandangan werna-werna sak lembar rong lembar kanggo Siséra, sing direbut sandangan tenunan werna-werna sak lembar rong lembar kanggo guluku?”

³¹Kaya mengkéné anggèné kabèh mungsuh Panjenengan, bakal entèk, duh GUSTI! Nanging wong sing nrésnani Panjenengané kuwi dadi srengéngé sing njedul karo kamulyané. Negara kono terus tentrem patang puluh taun suwéné.