Read Caribbean Javanese 2 Yohanes 1 Bible Online

2 Yohanes 1 - Caribbean Javanese bible

2 Yohanes 1

¹Sangka aku pinituwa, marang ibu sing dipilih lan anak-anaké sing pada tak trésnani ing sak njeruhné kabeneran. Ora mung aku waé sing nrésnani kowé kabèh, nanging uga sak kabèhé wong sing wis pada weruh kabeneran.

²Awit sangka kabeneran sing tetep manggon ing kita lan bakal ngantyani kita nganti sak lawas-lawasé.

³Kawelasan, kabetyikan lan katentreman sangka Gusti Allah, Bapak lan sangka Yésus Kristus, Putrané Bapak, bakal ngantyani kita sak njeruhné kabeneran lan katrésnan.

⁴Aku bungah banget weruh, yèn ana anak-anakmu sing pada urip ing sak njeruhné kabeneran, tyotyok karo pepakon sing wis kita tampani sangka Bapak.

⁵Lan saiki penjalukku marang kowé, ibu, aja kok anggep aku nulis pepakon anyar kanggo kowé, nanging sing tak tulis iki miturut pepakon sing wis kita duwèni kawit wiwitan: supaya kita pada trésna-tinrésnan.

⁶Lan katrésnan kuwi, kita kudu urip miturut pepakoné. Lan pepakon kuwi, ya kuwi supaya kowé pada urip sak njeruhné katrésnan, kaya enggonmu wis pada krungu kawit wiwitan.

⁷Awit wis okèh tukang nasarké sing pada njedul lan ndlajahi sak lumahé bumi, sing ora ngakoni yèn Yésus Kristus wis teka dadi manungsa. Kuwi tukang nasarké lan antikristus.

⁸Pada sing ati-ati, supaya kowé aja nganti pada kélangan apa sing wis pada tak garap, supaya enggonmu pada nampani upahmu sampurna.

⁹Saben wong sing nyimpang lan ora manggon ing piwulangé Kristus, kuwi ora pada nduwèni Gusti Allah. Sapa sing manggon ing piwulang kuwi, pada nduwèni Bapak lan Putra pisan.

¹⁰Yèn kowé pada katekan wong sing ora nggawa piwulang kuwi, aja kok tampa ing omahmu, lan aja mbagèkké slamet.

¹¹Awit sapa sing mbagèkké slamet wong kuwi, olèh bagéan penggawéané sing ala.

¹²Senajan okèh sing kudu tak tulis marang kowé, aku ora gelem nulis nganggo kertas lan mangsi, nanging pengarep-arepku bakal teka déwé, terus rerembukan adu-arep karo kowé kabèh, supaya kabungahan kita bisa sampurna.

¹³Salam marang kowé kabèh sangka anak-anaké sedulurmu wadon sing dipilih.