Read Caribbean Javanese 3 Yohanes 1 Bible Online

3 Yohanes 1 - Caribbean Javanese bible

3 Yohanes 1

¹Sangka aku pinituwa, marang Gayus sing ditrésnani, sing tak trésnani ing sak njeruhné kabeneran.

²Sedulurku sing ditrésnani, pandongaku supaya kowé pada betyik ing sembarang perkara lan diberkahi kuwarasan, semono uga nyawamu.

³Awit aku bungah banget, nalika ana sedulur teka, ngekèki paseksi bab enggonmu pada urip ing sak njeruhné kabeneran, awit uripmu pantyèn ya mengkono.

⁴Kanggo aku, ora ana kabungahan sing gedéné ngungkuli kabungahanku yèn aku krungu, yèn anak-anakku pada urip sak njeruhné kabeneran.

⁵Sedulurku sing tak trésnani, kowé netepi enggonmu dadi wong pertyaya, yèn kowé nindakké samubarang kanggo para sedulur tunggal pertyaya, senajan kuwi pada wong bangsa liyané.

⁶Wong-wong kuwi ing ngarepé pasamuan wis pada ngekèki paseksi bab katrésnanmu. Betyik tenan penggawéanmu, yèn pada kok bantu kanggo nerusaké mlakuné, karo tyara sing ndadèkké senengé Gusti Allah.

⁷Awit enggoné pada lelungan kuwi awit sangka asma-Né, tanpa nampani apa-apa sangka wong-wong kapir.

⁸Kita pada kuwajipan nampani wong-wong sing kaya mengkono kuwi, supaya kita pada dadi kantya tunggal gawé kanggo apa sing bener.

⁹Aku wis nulis setitik marang pasamuan, nanging Diotrèfès, sing kepéngin dadi penggedé ing pasamuan, kuwi ora gelem nampa kita.

¹⁰Mulané, mbésuk yèn aku teka bakal tak élingké sing dadi penggawéané, awit wis ngundat-undat nganggo tembung kasar marang kita; lan ora trima mengkono waé, malah wong mau ora mung emoh nampani para seduluré tunggal pertyaya sing teka waé, nanging sapa sing arep nampani wong-wong mau pada dipenggak, lan ditundung sangka pasamuan.

¹¹Sedulurku sing ditrésnani, aja mèlu-mèlu marang sing ala, nanging nuladanana sing betyik. Sapa sing gawé betyik, kuwi asalé sangka Gusti Allah, nanging sapa sing gawé sing ala, kuwi ora tau weruh marang Gusti Allah.

¹²Kanggo Démétrius wis diseksèni betyik karo wong kabèh, malah diseksèni karo kabeneran déwé. Lan menèh kita ya pada ngekèki paseksi betyik kanggo wong kuwi, lan kowé weruh, yèn paseksi kita kuwi nyata.

¹³Okèh perkara sing kudu tak tulis marang kowé, nanging aku ora gelem nulis marang kowé nganggo mangsi lan pèn.

¹⁴Pengarep-arepku bakal gelis nemoni kowé, lan rerembukan adu-arep.

¹⁵Katentreman anaa ing kowé! Salam sangka para kantyamu. Salamku marang para kantya siji-sijiné.