Read Caribbean Javanese Wahyu 12 Bible Online

Wahyu 12 - Caribbean Javanese bible

Wahyu 12

¹Terus ana tanda gedé kétok ing langit: Ana wong wadon nganggo salin srengéngé, lan mbulan ing ngisoré sikilé lan nganggo makuta lintang rolas ing sirahé.

²Wong wadon mau terus meteng lan sak njeruhné sambat arep nglairké kuwi njerit awit krasa lara.

³Terus ing langit kétok tanda liyané: Lah, ana naga gedé abang mbranang, endasé pitu, lan ana sunguné sepuluh, lan ing endasé ana makuta pitu.

⁴Buntuté nyèrèt sak prateloné lintang-lintang ing langit, terus ditibakké ing bumi. Naga mau mapan ing ngarepé wong wadon sing arep nglairké kuwi, karepé arep nguntal anaké, yèn wis lair.

⁵Wong wadon mau terus nglairké anak lanang, sing bakal ngengon para bangsa karo gepuk wesi; dadakan anak mau direbut lan diplayoké menyang ngarepé Gusti Allah lan ing damparé.

⁶Wong wadon mau mlayu menyang ara-ara samun, ing panggonan sing wis dityawiské karo Gusti Allah, supaya dirumati ing kono suwéné 1260 dina.

⁷Ing swarga terus ana peperangan. Mikaèl lan para mulékaté pada perang nglawan naga mau, lan naga kuwi dibantu karo para mulékaté,

⁸nanging naga lan mulékaté pada kalah; nganti pada ora dililani manggon ing swarga.

⁹Naga gedé, si ula sing sangka jaman wiwitan, sing diarani iblis utawa sétan, sing nasarké sak isiné jagat, kuwi diuntyalké ing bumi, bareng karo para mulékaté.

¹⁰Aku terus krungu swara sing banter ing swarga, ngéné, “Saiki keslametan lan pangwasa lan pemrintahané Gusti Allah kita, lan pangwasané Panjenengané sing Dijebatani, wis kebukak, awit sing ndakwa sedulur-sedulur tunggal pertyaya, awan wengi nggugat ing ngarepé Gusti Allah kita, kuwi wis diuntyalké mengisor.

¹¹Lan enggoné ngalahké karo getihé Tyempé, lan karo tembung paseksiné. Awit pada ora ngéman marang nyawané déwé nganti tekan ing pati.

¹²Mulané pada seneng-senenga, hé swarga lan hé kowé kabèh sing pada ngenggoni, tyilaka kowé, hé bumi lan segara! awit iblis wis ngeduni kowé, karo nesu banget, awit weruh, yèn wantyiné mung kari sedilut.”

¹³Nalikané naga mau éling, yèn wis diuntyalké menyang bumi terus ngoyak wong wadon sing wis nglairké anak lanang mau.

¹⁴Wong wadon mau terus dikèki swiwi garuda gedé sak pasang, supaya mabur menyang panggonané, ya kuwi ing ara-ara samun, ing kono wong wadon kuwi diopèni, adoh sangka ula, suwéné sak mangsa lan rong mangsa lan setengah mangsa.

¹⁵Ula mau terus nyemburké banyu dadi kaya kali sangka tyangkemé, ditujokké marang wong wadon mau, supaya kéntér.

¹⁶Nanging wong wadon kuwi ditulungi karo bumi. Bumi kuwi ngangapké tyangkemé, lan nguntal kali sing disemburké sangka tyangkemé naga mau.

¹⁷Naga mau terus nesu banget marang wong wadon kuwi, terus lunga merangi turunané liyané, sing pada netepi pepakoné Gusti Allah lan ngantepi paseksiné Yésus,

¹⁸naga mau terus ngadek ing pinggir segara.