Read Caribbean Javanese Wahyu 15 Bible Online

Wahyu 15 - Caribbean Javanese bible

Wahyu 15

¹Aku terus weruh tanda liyané ing langit sing gedé lan apik: ana mulékat pitu pada nggawa bebendu pitu sing pungkasan, awit kuwi sing mungkasi bebenduné Gusti Allah.

²Aku terus weruh rupané kaya segara katya tyampuran geni, lan wong-wong sing wis menang enggoné perang karo kéwan kuwi uga retyané, lan angka pitungané jenengé, pada ngadek ing pinggir segara katya mau. Lan kuwi pada nyekel harepé Gusti Allah.

³Wong-wong kuwi pada ngidungké kidungé Moses, abdiné Gusti Allah, lan kidungé Tyempé, uniné: “Gedé lan apik penggawéané Panjenengan, duh Gusti, Gusti Allah sing Mahakwasa! Adil lan bener kabèh awit Panjenengan, duh Ratuné kabèh bangsa!

⁴Duh Gusti, sapa sing ora wedi, lan ora ngluhurké asma Panjenengan? Awit mung Panjenengan piyambak sing sutyi; awit kabèh bangsa pada arep nemoni lan nyembah sujut marang Panjenengan, awit wis ketara beneré kabèh pengadilan Panjenengan.”

⁵Sakwisé mengkono aku terus weruh griya sutyi, Tarupé Paseksi, ing swarga, kebukak.

⁶Mulékat pitu sing nggawa bebendu pitu mau, pada metu sangka griya sutyi, nganggo mori alus putih resik lan meling lan dadané sabukan emas.

⁷Kéwan siji ing antarané kéwan papat mau terus ngelungké bokor emas pitu marang mulékat pitu mau, kabèh kebak isi nesuné Gusti Allah sing urip langgeng sak lawas-lawasé.

⁸Griya sutyi mau terus kebak kebul awit sangka kaluhurané lan pangwasané Gusti Allah, lan ora ana wong siji-sijia sing bisa mlebu ing griya sutyi kuwi, sak durungé bebendu pitu sing digawa karo mulékat pitu mau rampung.