Read Caribbean Javanese Wahyu 20 Bible Online

Wahyu 20 - Caribbean Javanese bible

Wahyu 20

¹Aku terus weruh ana mulékat medun sangka swarga nggawa kuntyi jurangé pati lan ranté gedé ing tangané;

²mulékat mau nyekel naga, si ula sing sangka jaman wiwitan, ya kuwi iblis utawa sétan. Terus diranté 1000 taun suwéné,

³terus diuntyalké menyang jurangé pati, terus ketutupan lan ing sak nduwuré diségel, supaya iblis kuwi aja nasarké para umat menèh, sak durungé genep 1000 taun mau; sakwisé mengkono bakal dityulké sak untara waktu.

⁴Aku terus weruh dampar-dampar lan sing pada nglungguhi; lan pada dikèki pangwasa kanggo ngadili. Aku uga weruh nyawané wong-wong sing wis diketok guluné awit sangka paseksiné bab Yésus lan awit sangka tembungé Gusti Allah; sing ora pada nyembah kéwan kuwi uga retyané, lan sing ora nampani tenger ing batuké lan ing tangané, kuwi kabèh pada urip menèh lan mèlu ngratoni, bareng karo Kristus suwéné 1000 taun.

⁵Nanging wong-wong mati liyané kuwi ora pada urip menèh sak durungé genep 1000 taun mau. Kuwi tanginé wong mati sing kaping pisan.

⁶Rahayu lan sutyi wong sing dikèki panduman ing tanginé wong mati sing kaping pisan kuwi. Wong kuwi pada ora dikwasani menèh karo pati sing kaping pindo, nanging bakal pada dadi imamé Gusti Allah lan Kristus, lan bakal mèlu ngratoni bareng karo Panjenengané nganti 1000 taun suwéné.

⁷Sakwisé genep 1000 taun kuwi mau, sétan terus bakal dityulké sangka paukuman,

⁸lan bakal metu nasarké para bangsa ing kéblat papat, ya kuwi Gok lan Magog, pada dikumpulké diajak maju perang, tyatyahé kaya wediné ing segara.

⁹Terus pada ngebyuki rata sak ubengé jagat, lan ngepung panggonané para wong sutyi lan kuta sing ditrésnani kuwi. Nanging terus ana geni mudun sangka langit, ngobong wong-wong mau,

¹⁰nanging iblis, sing nasarké wong-wong mau, terus dityemplungké ing segara geni lirang, ya kuwi panggonané kéwan lan nabi palsu mau, lan kuwi bakal pada kesiksa awan wengi sak lawas-lawasé.

¹¹Aku terus weruh dampar gedé putih lan Panjenengané, sing njagong ing kono. Bumi lan langit pada entèk sangka ngarepé lan wis ora ketemu menèh dunungé.

¹²Aku terus weruh wong mati, gedé tyilik, pada ngadek ing ngarep dampar kuwi. Kabèh kitab terus pada mbukak lan ana kitab liyané sing uga mbukak, ya kuwi kitab panguripan. Wong-wong mati mau terus pada diadili perkarané miturut penggawéané karo apa sing ketulis ing kitab-kitab mau.

¹³Segara terus masrahké wong-wong mati sing nang njeruhné, uga pati lan kratoné pati kuwi pada masrahké wong-wong mati sing nang kono, lan kuwi kabèh pada diadili perkarané miturut penggawéané déwé-déwé.

¹⁴Pati lan kratoné pati terus pada dijegurké ing segara geni. Kuwi pati sing kaping pindo: Segara geni.

¹⁵Saben wong sing jenengé ora ketulis ing kitab panguripan mau, kuwi dijegurké nang segara geni.