Read Caribbean Javanese Wahyu 21 Bible Online

Wahyu 21 - Caribbean Javanese bible

Wahyu 21

¹Aku terus weruh langit anyar lan bumi anyar, awit langit sing kaping pisan lan bumi sing kaping pisan wis entèk, lan segara uga wis ora ana menèh.

²Lan aku uga weruh kuta sutyi, Yérusalèm sing anyar, mudun sangka swarga, sangka Gusti Allah, sing dityawiské kaya pengantèn wadon sing dipatyaki ngladèni marang mantèn lanang.

³Aku terus krungu swara banter sing ngomong sangka dampar kuwi: “Delengen, tarupé Gusti Allah nang tengahé manungsa, lan Panjenengané bakal manggon ing antarané manungsa. Kuwi bakal pada dadi umaté, lan Gusti Allah piyambak bakal nunggal lan dadi Gusti Allahé.

⁴Panjenengané bakal ngusapi sak kabèhé luh sangka mripaté, lan bakal ora ana pati menèh; sedih lan sambat uga kasusahan ya wis ora ana menèh; awit samubarang sing lawas wis pada ilang.”

⁵Panjenengané sing njagong ing dampar terus ngomong: “Delengen, samubarang kabèh Tak dadèkké anyar!” Tembungé menèh: “Kowé nulisa, awit tembungé iki kena dipertyaya lan bener.”

⁶Lan aku diomongi menèh, ngéné: “Samubarang kabèh wis kelakon. Aku iki Alfa lan Oméga, sing Wiwitan lan sing Pungkasan. Wong sing ngelak bakal Tak wènèhi ngombé tanpa mbayar sangka sumberé banyu panguripan.

⁷Sapa sing menang, bakal nampa iki kabèh, lan Aku bakal dadi Gusti Allahé, lan wong kuwi bakal dadi anak-Ku.

⁸Nanging para wong sing jirèh, sing pada ora pertyaya, sing pada nandangi ala, sing kulina pada matèni, lonté-lonté, sing pada nggawé tenungan, sing pada nyembah brahala lan sak kabèhé wong tukang ngapus, kuwi pada olèh pandumané ing segara geni lirang sing murup mulat-mulat; ya kuwi pati sing kaping pindo.”

⁹Mulékat tunggalé mulékat pitu sing nggawa mangkok pitu isi kebak bebendu pitu sing pungkasan kuwi terus teka, Panjenengané terus ngomongi aku: “Mrénéa, kowé Tak duduhi pengantèn wadon, bojoné Tyempé.”

¹⁰Terus, ing sak njeruhné roh, aku dityekel Panjenengané menyang gunung sing gedé lan duwur, aku diduduhi kuta sing sutyi, ya kuwi Yérusalèm sing mudun sangka swarga, sangka Gusti Allah.

¹¹Kuta kuwi kebak kamulyan-Né Gusti Allah lan semloroté kaya watu-watu sing apik banget, kaya watu-watu yaspis, bening kaya kristal.

¹²Bèntèngé gedé lan duwur, ana gapurané rolas; lan ing sak nduwuré gapura-gapura mau ana mulékaté rolas, lan ana tulisan jenengé taler Israèl rolas.

¹³Ing sisih wétan ana gapurané telu, ing sisih lor telu, ing sisih kidul telu, ing sisih kulon telu.

¹⁴Ing bèntèngé kuta kuwi ana dasaré watu rolas, ing kono ana tulisan jenengé para rasulé Tyempé tyatyahé rolas.

¹⁵Mulékat sing ngomongi aku kuwi nggawa piranti ngukur sangka emas, kanggo ngukur kuta kuwi, lan gapurané lan bèntèngé.

¹⁶Kuta kuwi pesagi, dawané pada karo ambané. Nanging enggoné ngukur kuta kuwi nganggo piranti ngukur mau: kurang luwih 12.000 ukuran;[7] dawané lan ambané lan duwuré kuwi pada.

¹⁷Bèntèngé uga diukur ketemu 144 éluh, miturut ukurané manungsa, sing ya dadi ukurané mulékat.

¹⁸Bèntèng kuwi dibangun sangka watu-watu yaspis; lan kutané kuwi sangka emas tulèn, kaya katya murni.

¹⁹Dasarané bèntèng kuta pada digambari karo watu-watu apik werna-werna. Dasarané sing kaping pisan kuwi yaspis, sing kaping pindo safir, sing kaping telu akat, sing papat smarak,

²⁰sing kaping lima oniks, sing kaping enem kormalin, sing kaping pitu krisolit, sing kaping wolu akwamarin, sing kaping sanga topas, sing sepuluh krisopas, sing nomer sewelas turkoois, lan sing rolas ametis.

²¹Gapurané rolas kuwi rupa mutiara rolas; saben gapura ujut mutiara siji, lan dalan-dalané kuta kuwi sangka emas tulèn, kaya katya sing bening.

²²Ing kono aku ora weruh griya sutyi; awit Gusti Allah, Gusti sing Mahakwasa kuwi griya sutyi, mengkono uga Tyempé.

²³Kuta kuwi ora mbutuhké pepadangé srengéngé lan mbulan, awit kamulyan-Né Gusti Allah sing madangi lan Tyempé sing dadi dimaré.

²⁴Para bangsa bakal pada mlaku ing pepadangé lan para ratu ing bumi pada masrahké kesugihané;

²⁵gapurané bakal ora ditutup ing sedina muput, awit ing kono bakal ora ana wengi menèh.

²⁶Uga kahurmatan lan kamulyané para bangsa uga bakal digawa dipasrahké.

²⁷Nanging sembarang sing reget bakal ora bisa mlebu mrana, utawa wong sing nindakké penggawé ala utawa goroh; kejaba mung wong-wong sing jenengé pada ketulis ing kitab panguripan duwèké Tyempé.