Read Caribbean Javanese Wahyu 22 Bible Online

Wahyu 22 - Caribbean Javanese bible

Wahyu 22

¹Aku terus diduduhi kali banyuné panguripan, sing bening kaya kristal, sing mili metu sangka damparé Gusti Allah lan damparé Tyempé.

²Ing tengahé dalané kuta kuwi, ya kuwi ing sak kiwa-tengené kali, ana wit panguripan sing ngetokké woh kaping rolas, saben sasi sepisan; lan godongé wit kuwi mau dienggo maraské para bangsa.

³Ing kana bakal ora ana bebendu menèh. Damparé Gusti Allah lan Tyempé bakal ing tengahé, lan para abdiné bakal pada ngabekti marang Panjenengané,

⁴lan bakal pada nyawang rupané lan bakal ketulis jenengé ing batuké.

⁵Ing kana bakal ora ana menèh wantyi mbengi, lan ora mbutuhké pepadangé dimar utawa pepadangé srengéngé, awit Gusti Allah bakal madangi, lan wong-wong mau bakal pada mréntah dadi ratu langgeng ing sak lawas-lawasé.

⁶Aku terus diomongi ngéné: “Tembungé kuwi mau bener lan nyata. Lan Gusti Allah sing dadi Gusti rohé para nabi, wis ngutus mulékaté supaya nduduhké marang para abdiné apa sing mesti bakal gelis kelakon.”

⁷“Sak temené Aku bakal gelis teka. Rahayu wong sing netepi tembungé nubuaté kitab iki!”

⁸Lan aku, Yohanes, sing wis weruh lan krungu perkara kuwi mau kabèh. Sakwisé krungu lan weruh, aku terus nyembah ing sikilé mulékat, sing wis nduduhké kuwi mau kabèh marang aku, perlu nyembah.

⁹Nanging tembungé marang aku: “Aja mengkono! Awit aku iki abdi, pada kaya kowé lan sedulur-sedulurmu tunggal pertyaya, para nabi, lan sak kabèhé sing pada netepi tembungé kitab iki. Nyembaha marang Gusti Allah!”

¹⁰Aku terus diomongi menèh: “Tembungé kitab iki aja kok ségel, awit wantyiné wis tyedak.

¹¹Sapa sing nggawé duraka, terusna nggawé duraka, sapa sing reget, terusna ngregeti awaké; lan sapa sing mlaku bener, terusna mlaku bener; sapa sing sutyi, terusna nyutyèkké awaké!”

¹²“Sak temené Aku bakal gelis teka, lan nggawa upah-Ku, kanggo mbales marang saben wong miturut penggawéané.

¹³Aku iki Alfa lan Oméga, Sing Wiwitan lan Sing Mungkasi, Sing Wiwitan lan Sing Pungkasan.

¹⁴Rahayu wong sing pada ngumbah sandangané. Kuwi sing bakal pada nduwé wewenangé kanggo panguripan, lan mlebu ing kuta, liwat gapura-gapurané.

¹⁵Nanging asu lan para tukang tenung, lan para lonté, wong sing matèni, lan sing pada nyembah brahala, lan saben wong sing seneng lan nglakoni goroh, kuwi pada ing sak njabané kuta.

¹⁶Aku, Yésus, wis ngutus mulékat-Ku supaya nggawé paseksi kanggo kuwi kabèh marang kowé kanggo pasamuan-pasamuan. Aku iki tukulané, ya kuwi turunané Daved lintang panjer ésuk sing semlorot.”

¹⁷Roh lan pengantèn wadon pada nyebut: “Tekaa!” Lan sapa sing krungu, kuwi ngomonga: “Teka!” Lan sapa sing ngelak, nyedaka lan sapa sing gelem, njupuka banyu panguripan tanpa mbayar.

¹⁸Aku ngekèki paseksi marang saben wong sing ngrungokké tembung nubuat tembungé ing kitab iki: “Yèn ana wong sing nambahi apa-apa ing tembungé iki, Gusti Allah bakal nambahi bebendu marang wong kuwi, kaya sing ketulis ing kitab iki.

¹⁹Lan yèn ana wong sing ngurangi tembungé kitab nubuat iki, Gusti Allah bakal njupuk pandumané sangka wit panguripan lan sangka kuta sutyi, kaya sing ketulis ing kitab iki.”

²⁰Panjenengané sing ngekèki paseksi kuwi mau kabèh ngomong ngéné: “Ya, Aku gelis teka!” Amin, ya Gusti Yésus, Panjenengan supaya teka!

²¹Kawelasané Gusti Yésus nunggal ing kowé kabèh! Amin.