Read Caribbean Javanese Wahyu 4 Bible Online

Wahyu 4 - Caribbean Javanese bible

Wahyu 4

¹Sakwisé mengkono aku weruh: Jan tenan, lawangé swarga ana sing menga lan ana swara sing mbiyèn aku wis krungu, ngomongi aku kaya swarané trompèt, ngéné: “Kowé munggaha mréné bakal Tak duduhké apa sing sakwisé iki mesti kudu kelakon.”

²Sak nalika kuwi aku dikwasani karo Roh. Ing swarga ana dampar, lan ana sing njagong ing dampar kuwi.

³Panjenengané sing njagong ing dampar kuwi sawangané kaya watu-watu yaspis lan Sardis; lan ing sak ubengé dampar ana kluwungé sing kétok semlorot kaya jamrut.

⁴Lan ing sak ubengé dampar mau ana damparé patlikur dijagongi karo pinituwa patlikur, pada nganggo jubah putih lan nganggo makuta emas.

⁵Sangka dampar mau ana klélap sing metu lan swara gluduk sing gemleger, lan ing ngarepé dampar ana ontyor pitu sing pada murup: ya kuwi Rohé Gusti Allah pitu.

⁶Uga ing ngarepé dampar ana segara katya kristal; ing tengahé dampar lan ing sak ubengé ana kéwan papat pada kebak mripat ing ngarep lan ing mburiné.

⁷Kéwan mau sing kaping pisan kaya singa, sing kaping pindo kaya pedèt, sing kaping telu kuwi praupané kaya manungsa, lan sing kaping papaté kaya manuk garuda mabur.

⁸Kéwan papat mau siji-sijiné nduwé swiwi enem, ing sisih njaba lan njeruhné pada kebak mripat, lan awan wengi tanpa lèrèn enggoné ngomong ngéné: “Sutyi, sutyi, sutyi, Gusti Allah sing Mahakwasa, sing ndisik, sing saiki, lan sing bakal teka.”

⁹Saben-saben kéwan mau pada nyanyi pamuji lan panghurmatan lan maturkesuwun marang Panjenengané sing njagong ing dampar lan sing urip langgeng ing sak lawas-lawasé,

¹⁰para pinituwa patlikur mau terus pada nyembah ing ngarepé sing njagong ing dampar kuwi, lan ngabekti marang Panjenengané sing urip tekan sak lawas-lawasé. Lan pada nyèlèhké makutané ing ngarepé dampar kuwi karo ngomong,

¹¹“Duh Gusti, Gusti Allah kula, Panjenengan sing pantes nampa pamuji lan panghurmatan lan pangwasa. Awit Panjenengan wis nitahké samubarang; lan awit sangka karep Panjenengan, samubarang kuwi ana lan dititahké.”