Read Caribbean Javanese Wahyu 5 Bible Online

Wahyu 5 - Caribbean Javanese bible

Wahyu 5

¹Aku terus weruh kitab gulungan ing tangané tengen Panjenengané sing njagong ing dampar mau, sing ketulis ing njeruh lan ing njaba lan diségel nganggo ségel pitu.

²Aku weruh mulékat sing rosa-rosa mbengok karo swara banter: “Sapa sing pantes ngudari gulungan kitab kuwi lan mbukaki ségelé?”

³Nanging ing swarga lan ing bumi lan sak ngisoré bumi, ora ana sing bisa ngudari gulungan kitab mau lan ndeleng njeruhné.

⁴Aku terus nangis kelara-lara, awit ora ana wong sijia waé sing dianggep pantes ngudari gulungan kitab kuwi utawa ndeleng njeruhné.

⁵Terus ana salah sijiné pinituwa sing ngomong marang aku: “Kowé aja nangis! Delengen, singa sing sangka turunané Yéhuda, ya kuwi tukulané Daved sing wis menang, nganti Panjenengané bisa ngudari gulungan kitab kuwi lan mbukaki ségelé pitu.”

⁶Aku terus ndeleng ing tengahé dampar lan kéwan papat kuwi lan ing tengahé para pinituwa mau ana Tyempé ngadek kétoké kaya wis dibelèh, sunguné pitu lan mripaté pitu: ya kuwi Rohé Gusti Allah pitu sing diutus menyang sak lumahé bumi.

⁷Panjenengané kuwi terus nyedek lan nampani gulungan kitab sangka tangané tengen Panjenengané sing njagong ing dampar.

⁸Nalika Panjenengané njupuk gulungan kitab, kéwan papat lan pinituwa patlikur kuwi terus nyembah ing ngarepé Tyempé kuwi, karo pada nyekel harep lan bokor emas, isi dupa kebak; ya kuwi pandongané para sutyi.

⁹Lan pada ngidungké kidung anyar, tembungé: “Panjenengan wis pantes nampani gulungan kitab kuwi lan mbukaki ségelé; awit Panjenengan wis dibelèh lan karo getihé Panjenengan, Panjenengan wis nebus wong-wong sangka saben taler lan basa lan umat lan bangsa kanggo Gusti Allah.

¹⁰Lan Panjenengan ndadèkké wong-wong kuwi salah sijiné kraton lan imam-imam kanggo Gusti Allah kita, lan pada arep ngwasani dadi ratu ing bumi.”

¹¹Aku terus weruh lan krungu swarané mulékat okèh ing sak ubengé dampar, lan kéwan papat lan para pinituwa; tyatyahé pirang-pirang atus èwu lan pirang-pirang yuta,

¹²tembungé karo swara banter, “Tyempé sing wis dibelèh kuwi wis bisa nampani pangwasa lan kasugihan, lan kawityaksanan lan kekuwatan, lan kehormatan lan kamulyan lan pamuji.”

¹³Aku terus krungu sak kabèhé sing urip ing swarga lan ing bumi lan sak ngisoré bumi lan ing segara, uga sing urip ing njeruhné, pada ngomong: “Pamuji lan kehormatan lan kamulyan lan pangwasa kanggo Panjenengané sing njagong ing dampar lan Tyempé, nganti sak lawasé!”

¹⁴Kéwan papat kuwi pada ngomong: “Amin!” Lan para pinituwa mau pada sujut lan nyembah.