Read Caribbean Javanese Wahyu 8 Bible Online

Wahyu 8 - Caribbean Javanese bible

Wahyu 8

¹Bareng Tyempé kuwi mbukak ségel sing kaping pitu, ing swarga terus dadi sepi setengah jam suwéné.

²Terus aku weruh mulékat pitu sing nemoni Gusti Allah, pada dikèki trompèt pitu.

³Terus ana mulékat liyané sing nuju lan ngadek tyedak mesbèh karo nggawa pedupan emas. Terus pada dikèki dupa okèh supaya dienggo kurban bebarengan karo pandongané para sutyi ing mesbèh emas ing ngarepé dampar kuwi.

⁴Beluké dupa kemebul tyampur karo pandongané para sutyi kuwi sangka tangané mulékat mau nang ngarepé Gusti Allah.

⁵Mulékaté terus njupuk pedupan emas kuwi, diisèni geni sangka mesbèh, lan kuwi terus diuntyalké ing bumi. Terus ana swara gemblegeré gluduk bebarengan karo bledèk lan lindu.

⁶Mulékat pitu sing nggawa trompèt pitu terus pada tata-tata arep ngunèkné trompèté.

⁷Mulékat sing kaping pisan terus ngunèkné trompèté, terus ana udan ès, lan geni, tyampuran getih; lan kabèh mau diuntyalké menyang bumi; nganti sak prateloné bumi lan sak prateloné wit-witan kobong lan sak kabèhé sesuketan ijo pada gosong.

⁸Mulékat sing kaping pindo terus ngunèkné trompèté terus ana rupané kaya gunung gedé sing murup, dijegurké ing segara. Nganti sak prateloné segara kuwi dadi getih,

⁹lan kéwan ing segara sing nduwé nyawa sak prateloné pada mati lan sak prateloné prau-prau pada entèk.

¹⁰Mulékat sing kaping telu terus ngunèkné trompèté, terus ana lintang gedé tiba sangka langit, murup kaya ontyor, lan nibani sak prateloné kali-kali lan sumber-sumberé banyu.

¹¹Lan lintang mau jenengé Pait. Terus sak prateloné sak kabèhé banyu dadi pait, njalari okèh wong sing pada mati awit sangka banyuné sing wis dadi pait.

¹²Mulékat sing kaping papat terus ngunèkné trompèté, terus sak prateloné srengéngé lan sak prateloné mbulan lan sak prateloné lintang-lintang kekantem, nganti sak prateloné kuwi kabèh pada dadi peteng, lan sak prateloné awan ora padang, lan wenginé ya mengkono uga.

¹³Aku terus weruh, lan krungu ana manuk garuda mabur nang tengah langit lan ngomong karo swara banter: “Tyilaka, tyilaka, tyilaka wong sing manggon ing bumi, awit sangka swara trompèté mulékat telu liyané, sing ijik bakal ngunèkné trompèté.”