Read Caribbean Javanese Wahyu 9 Bible Online

Wahyu 9 - Caribbean Javanese bible

Wahyu 9

¹Mulékat sing kaping lima terus ngunèkné trompèté, aku terus weruh ana lintang sing tiba ing bumi sangka langit, lan lintangé dikèki kuntyiné telengé jurang peteng.

²Lawangé telengé jurang peteng terus mbukak, terus ana bulek kemebul sangka telengé kuwi kaya bulekké pawon gedé, banjur srengéngé lan awang-awang pada dadi peteng karo bulekké telengé.

³Sangka mendung kuwi metu walangé okèh pada méntylok ing bumi lan pada dikèki kekuwatan kayadéné kekuwatané kalajengking ing bumi.

⁴Lan pada dikongkon, supaya aja pada ngrusak suket-suket ing bumi, utawa marang saben tetukulan lan wit-witan, kejaba mung marang manungsa ing batuké ora ana tyapé Gusti Allah.

⁵Walang-walangé ora dililani matèni manungsa, nanging mung nyèksa waé suwéné limang sasi, lan enggoné nyèksa kuwi kaya kalajengking, ing wantyi ngentup wong.

⁶Ing waktu kuwi wong-wong bakal nggolèki pati, nanging ora bisa, lan pada kepéngin mati, nanging pada adoh karo pati.

⁷Lan rupané walang-walang kuwi mau kaya jaran sing tata-tata arep perang, ing endasé ana sing kaya makuta emas, rainé kaya praupané manungsa,

⁸lan rambuté kaya rambuté wong wadon, lan untuné kaya untuné singa,

⁹lan dadané kaya nganggo tutup wesi, swarané swiwiné kaya gembruduké kréta-kréta sing digèrèt jaran okèh, sing pada mblayu menyang peperangan.

¹⁰Buntuté kaya kalajengking, lan uga ana entupé, nanging buntuté kuwi gunané kanggo nglarani manungsa suwéné limang sasi.

¹¹Sing dadi ratuné ya kuwi mulékat telengé jurang peteng, sing jenengé ing basa Ibrani Abadon, lan ing basa Yunani Apolion.[5]

¹²Kasangsarané sing kaping pisan wis kliwat. Saiki ijik ana kasangsarané kaping pindo sing bakal nekani.

¹³Mulékat sing kaping enem terus ngunèkné trompèté, aku terus krungu swara sing metu sangka sungu papat ing mesbèh emas ing ngarepé Gusti Allah,

¹⁴sing ngomong marang mulékat sing kaping enem sing nggawa trompèt mau ngéné: “Mulékat papat sing pada dibanda ing sak tyedaké kali Efrat kuwi utyulana.”

¹⁵Mulékat papat sing pada dityawiské ngentèni jam, dina, sasi lan taun sing wis ditetepaké kuwi terus diutyuli, supaya pada matèni sak prateloné umat manungsa.

¹⁶Lan tyatyahé suradadu jaran kuwi 200.000.000; aku krungu pira tyatyahé.

¹⁷Kanggo jaran-jarané lan sing pada numpaki ing wahyu iki kétoké ngéné: Pada nganggo tutup dada, rupané abang kaya geni lan biru lan kuning lirang; endasé jaran kaya-kaya sirahé singa, lan tyangkemé ngetokké geni, lan kebul lan lirang.

¹⁸Sak prateloné umat manungsa pada dipatèni karo bebendu telu kuwi, ya kuwi geni, lan kebul lan lirang sing pada metu sangka tyangkemé.

¹⁹Awit kwasané jaran-jaran mau ing tyangkemé lan buntuté; awit buntuté kuwi kaya ula; pada ana endasé, kuwi kanggo nekakké karusakan.

²⁰Nanging wong-wong liyané sing ora mati awit sangka bebendu kuwi mau, pada ora mratobat sangka penggawéané tangané: Pada ora marèni enggoné pada nyembah roh-roh reget lan brahala-brahala emas, slaka, tembaga, watu lan kayu sing ora bisa weruh, krungu utawa mlaku.

²¹Lan wong-wong kuwi pada ora mratobat sangka enggoné matèni, nenung, bédang, lan nyolong.