Read Caribbean Javanese Rut 4 Bible Online

Rut 4 - Caribbean Javanese bible

Rut 4

¹Boas wis munggah menyang ing gapura, terus njagong ing kono. Ketepakan wong sing wajip nebus sing diutyapké Boas pinuju liwat. Boas terus ngaruh-aruhi: “Hé sanak sedulurku, hayuk sampéyan njagong ing kéné!” Sing ditakoni terus mara njagong.

²Boas terus ngajak para pinituwané kuta wong sepuluh, tembungé: “Hayuk, sampéyan pada njagonga ing kéné!” Terus pada njagong.

³Tembungé Boas marang sing wajip nebus mau: “Lemah tinggalané sedulur kita Elimèlèk kuwi ditawakké Naomi sing mentas mulih sangka negara Moab.

⁴Kula terus mikir: apiké uga bab kuwi kula pasrahké marang sampéyan mengkéné: Hayuk lemah kuwi sampéyan jikuk ing ngarepé para sedulur sing pada njagong kuwi lan para pinituwané bangsa kita. Yèn sampéyan sing bakal nebus, hayuk sampéyan tebus; yèn sampéyan ora gelem nebus, hayuk kula sampéyan kèki ngerti, supaya kula ngerti, awit ora ana sing wajip nebus kejaba sampéyan, lan sakwisé sampéyan: kula.” Semauré sing ditari: “Ya kula sing bakal nebus.”

⁵Nanging Boas ngomong menèh: “Lemah mau yèn sampéyan jikuk sangka tangané Naomi, nanging kudu uga Rut wong wadon Moab, randané sing wis ninggal ndonya kuwi kudu sampéyan jikuk, supaya nguripké malih jenengé sing wis mati kanggo lemah pandumané.”

⁶Sing wajip nebus terus ngomong: “Yèn mengkono kula ora bisa nebus, awit bakal ngrusakaké lemah panduman kula déwé. Pengarep-arep kula, muga sampéyan gelem nebus sing pantyèn kudu kula tebus, awit kula ora bisa nebus.”

⁷Dèk jaman mbiyèn yèn ing negara Israèl ana wong nebus utawa ngijolké, supaya ndadèkké kuwaté saben perkara, kuwi adaté mengkéné: Wong nyopot sepatuné lan dipasrahké marang liyané. Mengkono tyarané wong netepaké perkara ing Israèl.

⁸Sing wajip nebus mau terus omong marang Boas: “Hayuk sampéyan jikuk kanggo sampéyan déwé.” Lan sepatuné ditinggal.

⁹Boas terus omong marang para pinituwané lan marang wong okèh: “Sampéyan kabèh pada dadi seksi ing dina kuwi, yèn kula nuku samubarang tinggalané Kilyon karo Mahlon, tuku kula sangka tangané Naomi;

¹⁰mengkéné uga Rut wong Moab, randané Mahlon kuwi ya kula jikuk dadi bojo kula, supaya nguripké malih jenengé sing wis ninggal kanggo ing lemah pandumané. Karo mengkéné jenengé wong kuwi ora entèk sangka turunané kulawargané lan sangka warga kutané. Sampéyan pada dadia seksi ing dina iki.”

¹¹Kabèh wong ing gapura kabèh para pinituwané terus pada ngomong: “Ya kula pada dadi seksi, GUSTI muga gelem ndadèkké marang wong wadon sing bakal manggon ing omah sampéyan kuwi, kedadian pada karo Rahèl lan Léa, sing loro-loroné wis pada mbangun umat Israèl, sampéyan dikuwatké ing Efrata lan jeneng sampéyan bakal kajèn ing Bètléhèm.

¹²Turun-turunané sampéyan pada kaya turunané Pèrès, anaké Yéhuda sing patutan sangka Tamar, lantaran para anak sing bakal dikèki GUSTI marang sampéyan patutan karo wong wadon nom kuwi!”

¹³Boas terus ngepèk Rut dadi bojoné lan terus pada turu tyampur. GUSTI ya terus ngekèki kawelasan marang Rut, nganti bisa meteng lan nduwé anak lanang.

¹⁴Mulané para wong wadon pada ngomong marang Naomi: “Pinujia GUSTI, awit ing dina kuwi karo sak legané ati ngekèki tukang tebusan marang sampéyan, muga jenengé dadia kesuwur ing Israèl.

¹⁵Lan dèwèké sing bakal nyegeraké ati sampéyan lan ngrumati sampéyan ing waktu sampéyan wis uwanen, awit mantu sampéyan sing trésna marang sampéyan wis nglairké jabang bayi, wong wadon sing ajiné ngliwati anak lanang pitu.”

¹⁶Naomi terus nyandak bayi mau, dipangku lan dirumati.

¹⁷Lan tangga-teparoné wadon terus pada ngekèki jenengé marang bayiné, semauré: “Naomi wis dikèki anak lanang.” Bayiné terus dijenengaké Obèd. Ya kuwi bapaké Isai, bapaké Daved.

¹⁸Iki para tyedak turunané Pèrès, Pèrès duwé anak Hèsron.

¹⁹Hèsron duwé anak Aminadab,

²⁰Aminadab duwé anak Nahason, Nahason duwé anak Salmon,

²¹Salmon duwé anak Boas, Boas duwé anak Obèd,

²²Obèd duwé anak Isai, lan Isai duwé anak Daved.