Read Caribbean Javanese 1 Samuèl 11 Bible Online

1 Samuèl 11 - Caribbean Javanese bible

1 Samuèl 11

¹Nahas, ratu ing Amon ngluruk perang lan ngedekké tarup, ngepung Yabèsy-Giléad. Sakkèhé wong Yabèsy terus ngomong marang Nahas: “Kula njaluk nggawé perjanjian karo kula, lan kula bakal teluk marang sampéyan.”

²Nanging Nahas, ratu ing Amon, ngekèki tembungé marang wong kuwi: “Saraté enggonku nggawé perjanjian karo kowé mengkéné: saben wong mripaté tengen bakal tak tyuplak; karo tyara mengkono aku bakal nggawé wirangé sakkèhé wong Israèl.”

³Tembungé para pinituwané wong Yabèsy: “Kula njaluk waktu pitung dina, supaya kula bisa nyebar kongkonan marang sak kabèh kuta lan désané Israèl kabèh; yèn ora ana wong siji waé sing ngluwari kula, kula bakal metu pasrah bongkokan marang sampéyan.”

⁴Bareng para kongkonan tekan ing Gibéa-Saul lan ngomongké perkara kuwi marang bangsa kuwi, bangsa kuwi terus pada nangis kelara-lara.

⁵Saul ijik waé teka sangka kebon lan lunga nggiring sapiné, terus takon: “Kena apa sebabé wong-wong pada nangis?” Wong-wong terus pada ngekèki kabar wong Yabèsy kuwi.

⁶Bareng Saul krungu kabaré mau, terus kedunan karo Rohé GUSTI, nganti terus muntab nesuné.

⁷Terus njupuk sapi sak rakit, ditengkel-tengkel; tengkelané dikirimké lantaran para kongkonan ing sak tanah pangwasané Israèl kabèh karo paweling: “Sapa sing ora mèlu bareng Saul lan Samuèl, sapiné bakal digawé kaya mengkéné iki.” GUSTI terus nekakké rasa wedi marang bangsa kuwi, nganti pada bareng maju.

⁸Waktu Saul nitipriksa suradaduné ing Bèsèk, ketemu ana wong Israèl 300.000 lan wong Yéhuda 30.000.

⁹Para kongkonan kuwi pada diomongi mengkéné: “Iki omongna marang para wong Yabèsy-Giléad: Sésuk ing wayah panas-panasé srengéngé bakal tekané pitulungan.” Waktu para kongkonan bali lan ngekèki kabar marang wong-wong Yabèsy, kabèh pada bungah banget.

¹⁰Wong Yabèsy terus pada ngomong marang Nahas: “Sésuk ésuk kula pada bakal metu pasrah bongkokan; sampéyan bisa nindakké marang kula, apa waé sing sampéyan pikir apik.”

¹¹Esuké Saul ngedum balané dadi telung grombolan. Kuwi pada nerjang ing sak tengahé tarup-tarupé mungsuh ing wayah ésuk mruput lan merangi wong Amon sak durungé awan, lan wong sing bisa utyul pating slebar, ora ana wong loro sing ijik kumpul.

¹²Bangsa mau terus ngomong marang Samuèl: “Sapa sing ngomongké: Mokal Saul bisa dadi ratu kita, dipasrahké mréné wongé, bakal kula patèni!”

¹³Nanging Saul ngomong: “Ing dina iki aja ana wong sing dipatèni, awit ing dina iki GUSTI wis ngekèki keslametan marang Israèl.”

¹⁴Samuèl terus ngomong marang bangsa kuwi: “Hayuk pada budal menyang ing Gilgal ngresmèkké Saul dadi ratu ing kana.”

¹⁵Wong sak bangsa kabèh terus pada budal menyang Gilgal lan ndadèkké Saul dadi ratu ing kono ing ngarepé GUSTI ing Gilgal, lan ing kono pada masrahaké kurban keslametan ing ngarepé GUSTI; Saul lan kabèh wong Israèl pada sukak-sukak ramé banget ing kono.