Read Caribbean Javanese 1 Samuèl 18 Bible Online

1 Samuèl 18 - Caribbean Javanese bible

1 Samuèl 18

¹Bareng wis rampung enggoné Daved ngomong marang Saul, atiné Yonatan gatuk marang Daved lan Yonatan nrésnani Daved kaya waé marang dèkné déwé.

²Ing dina kuwi Daved dikongkon mèlu Saul lan ora dililani mulih menyang omahé wong tuwané.

³Yonatan nganakké perjanjian karo Daved awit dèkné enggoné nrésnani Daved kaya waé marang dèkné déwé.

⁴Yonatan ngutyuli sandangané lan dikèkké marang Daved malah sandangané perang tekan pedang, panahé lan sabuké.

⁵Daved maju perang lan tansah menang, menyanga ngendi waé enggoné diutus karo Saul, mulané terus diangkat dadi komandané perjurit. Bab kuwi dianggep apik karo rayat kabèh lan para pegawéné Saul.

⁶Nanging waktu pada mulih, sak baliné Daved sangka enggoné ngalahké wong Filistèn kuwi, para wong wadon sangka sakkèhé kuta ing Israèl, pada metuk tekané Saul karo pada menyanyi lan jejogètan karo ngunèkké terbangan, pada seneng-seneng lan karo nabuh terbangan lan unèn-unèn musik liyané.

⁷Lan wong wadon sing pada menyanyi kuwi pada menyanyi saur-sauran, tembungé: “Saul ngalahké mungsuh éwon-éwon, nanging Daved puluhan éwon-éwon.”

⁸Saul muntab banget nesuné; tetembungan kuwi marakké nyusahké atiné, awit pikirané: “Marang Daved dinyanyèkké matèni puluhan éwon-éwon, nanging kanggo aku mung éwon-éwon, pungkasané kraton iki bakal tiba marang dèwèké.”

⁹Wiwit ing dina kuwi lan sak terusé Saul tansah sengit marang Daved.

¹⁰Esuké rohé ala sing sangka Gusti Allah kuwi nekani Saul, nganti kesurupan ing omahé; nanging Daved main siter kaya ing saben dinané. Nanging Saul nggawa tumbaké.

¹¹Saul nylorongaké tumbaké kuwi, awit pikirané: “Daved tak tantyepné ing témbok.” Nanging Daved ngéndani nganti dibalèni kaping pindo.

¹²Saul wedi karo Daved, awit GUSTI nuntun marang Daved, nanging Panjenengané wis ninggalké Saul.

¹³Mulané Saul ngedohi Daved sangka dèkné lan netepaké Daved dadi komendané suradadu 1000, nganti Daved tansah ing ngarepé suradadu.

¹⁴Daved tansah olèh gawé ing sak tindakké, awit GUSTI nunggal karo dèkné.

¹⁵Bareng Saul ngerti, yèn Daved banget enggoné tansah olèh gawé, Saul mundak wedi,

¹⁶nanging kabèh wong Israèl lan Yéhuda pada trésna marang Daved, awit Panjenengané mimpin sak obahé suradadu.

¹⁷Saul ngomong marang Daved: “Iki anakku wadon sing mbarep, Mérab; kuwi bakal tak kèkké marang kowé, dadi bojomu, mung waé dadia suradadu sing gagah lan rosa kanggo aku lan tandangana perangé GUSTI.” Awit Saul mikir: “Aja nganti tanganku sing nglawan, bèn ketaman karo tangané bangsa Filistèn.”

¹⁸Nanging Daved ngomong marang Saul: “Kula kuwi sapa ta lan sapa sanak sedulur kula, brayaté bapak kula, ing antarané wong Israèl, kok kula nganti dadi mantuné ratu?”

¹⁹Nanging dongé tekan ing waktuné ngekèkké Mérab, anaké wadon Saul mau, anak wadoné terus jebul dikèkké marang Adrièl, wong Méhola, dadi bojoné.

²⁰Nanging Mikal, anaké wadon Saul, gandrung marang Daved; waktu bab kuwi dikabarké marang Saul, dèkné nyetujoni.

²¹Awit Saul mikir: “Apik Mikal tak kèkké marang Daved, supaya dadi jiret kanggo Daved lan tangané wong Filistèn bèn nglawan dèwèké!” Saul terus ngomong marang Daved sing kaping pindoné: “Ing dina iki kowé tak jikuk mantu.”

²²Saul mréntah marang para abdiné: “Ngomonga marang Daved karo meneng-meneng mengkéné: ‘Sakjané Saul kuwi seneng marang sampéyan lan para pegawéné pada trésna marang sampéyan; mulané sampéyan gelem dijikuk mantu karo ratu.”

²³Para pegawéné Saul terus nglaporké tembungé Saul mau marang Daved, nanging Daved nyauri: “Dadi mantuné ratu kuwi pikir sampéyan apa èntèng? Kula kuwi apa ora wong mlarat tur wong tyilik.”

²⁴Pegawéné Saul terus ngekèki weruh marang Saul, semauré: “Mengkéné semauré Daved.”

²⁵Saul terus ngomong menèh: “Ngomonga marang Daved mengkéné: Ratu ora njupuk bayaran kanggo kawin, kejaba mung ikuté wong Filistèn 100 kanggo mbalesé marang mungsuh-mungsuhé ratu.” Karepé Saul patiné Daved lantaran wong Filistèn.

²⁶Bareng para abdiné Saul nglaporké tembungé mau marang Daved, Daved nyaguhi dadi mantuné Saul.

²⁷Durung nganti tekan waktuné, nanging Daved wis jaga-jaga, terus lunga karo suradaduné lan matèni wong Filistèn tyatyahé 200 lan ikuté pada digawa genep tyatyahé kabèh dipasrahké marang Saul, supaya Daved dadi mantuné. Saul terus masrahaké anaké wadon Mikal, dadi bojoné Daved.

²⁸Saul terus ngerti lan dunung yèn GUSTI nuntun marang Daved lan kabèh wong Israèl pada trésna marang Daved.

²⁹Saul mundak wediné marang Daved. Saul tetep dadi mungsuhé Daved ing sakjeké uripé.

³⁰Yèn ratuné wong Filistèn maju perang, saben-saben pada maju perang, Daved mesti olèh gawé ngungkuli para pegawéné Saul kabèh, nganti asmané terus kesuwur banget.