Read Caribbean Javanese 1 Samuèl 19 Bible Online

1 Samuèl 19 - Caribbean Javanese bible

1 Samuèl 19

¹Saul ngomong marang Yonatan, anaké lan para pegawéné kabèh, yèn Daved kudu dipatèni. Nanging Yonatan, anaké Saul, trésna banget marang Daved,

²terus Yonatan ngomongké perkara kuwi marang Daved: “Bapakku mbudidaya bakal matèni sampéyan, mulané sésuk-ésuk kula omongi, sing ati-ati, sampéyan kula njaluk ing salah sijiné panggonan pangungsèn lan ndelik ing kono.

³Kula bakal metu ngetutké bapakku ing ara-ara ing panggonan ndelikké sampéyan kuwi. Kula bakal ngomongké bab sampéyan marang bapakku, lan kula ndelok kepriyé kahanané lan kula terus ngandani marang sampéyan.”

⁴Yonatan ngomongké bab kabetyikané Daved marang Saul, bapaké semauré: “Ratu aja nganti nindakké ala marang Daved, abdimu, awit dèwèké ora nindakké ala marang sampéyan, malah apa sing ditindakké kuwi apa ora apik banget, kanggo sampéyan.

⁵Wong kuwi wis nanggungké nyawané lan wis ngalahké wong Filistèn kuwi lan GUSTI wis ngekèki kemenangan marang wong Israèl kabèh. Sampéyan wis weruh lan seneng ing ati awit sangka kuwi. Kenèng apa sampéyan kok bakal nindakké ala marang getihé wong sing resik, bakal matèni Daved tanpa sebab?”

⁶Saul setuju karo tembungé Yonatan, lan terus sumpah: “Kanggo asmané GUSTI sing urip, Daved ora bakal dipatèni.”

⁷Yonatan terus ngomongi Daved lan ngomongké kabèh préntahé ratu. Yonatan terus nggawa Daved ing ngarepé Saul lan Daved terus nindakké kuwajipané kaya sing uwis-uwis.

⁸Bareng ana perang menèh, Daved maju nglawan bangsa Filistèn nganti nggawé kalahé mungsuh okèh lan pada mblayu sangka peperangan.

⁹Nanging rohé ala sing dikongkon GUSTI nyurupi Saul, waktu Saul njagong ing omahé, karo nggawa tumbaké; lan Daved mbeneri main siter.

¹⁰Saul ngupaya nantyepké Daved ing témbok karo tumbaké, nanging Daved ngéndani tumbaké, nganti mung ngenèngi témbok. Sakwisé kuwi Daved terus mblayu lan bisa utyul ing mbengi kuwi.

¹¹Saul terus kongkonan wong-wong menyang ing omahé Daved dipréntahké njaga lan matèni dèkné ing wayah ésuk. Nanging Mikal, bojoné Daved ngomongi Daved mengkéné: “Yèn sampéyan ora bisa utyul mbengi iki, sésuk mesti bakal dipatèni.”

¹²Mikal terus mbantu Daved medun sangka tyendéla lan Daved mblayu lan bisa utyul.

¹³Sakwisé kuwi Mikal njupuk retya disèlèhké ing ambèn, endasé didèkèki tenunan wulu wedus, terus dikemuli.

¹⁴Saul terus kongkonan marani Daved, nanging Mikal ngomong: “Ijik lara.”

¹⁵Sakwisé kuwi Saul kongkonan wong-wong nyatakké lan diomongi: “Daved terna mréné ing ambèné, supaya dipatèni!”

¹⁶Para kongkonan kuwi pada mlebu ing omahé lan kétok ana retya ing ambèn, endasé ketutupan tenunan wulu wedus.

¹⁷Saul ngomong marang Mikal: “Kenèng apa kowé ngapusi aku mengkono lan nulungi mungsuhku, nganti bisa utyul?” Nanging Mikal nyauri semauré: “Dèwèké omongan marang kula mengkéné: Aku arep lunga aja kok tyegat. Apa kowé njaluk tak patèni?”

¹⁸Sakwisé Daved mblayu lan utyul sangka bebaya, terus nemoni ing ngarepé Samuèl ing Rama lan ngomongké, kabèh apa sing ditindakké Saul marang dèkné. Daved terus diajak Samuèl menyang ing Nayot lan manggon ing kono.

¹⁹Waktu Saul dikèki kabar mengkéné: “Ngertènana, Daved ing Nayot, tyedaké Rama.”

²⁰Terus kongkonan wong-wong nyekel Daved. Nanging wong-wong mau weruh sak golongan nabi sing kebak Rohé, dipimpin karo Samuèl. Lan Rohé Gusti Allah manggon ing para kongkonan mau lan kuwi uga terus kebak kaya nabi.

²¹Perkara kuwi dikabarké marang Saul; Saul terus kongkonan wong-wong liyané, nanging wong-wong kuwi uga kedunan ing Rohé kaya nabi. Saul terus kongkonan wong-wong menèh, sing kaping teluné, lan wong-wong kuwi uga kedunan ing Rohé.

²²Terus Saul lunga déwé menyang ing Rama. Sak tekané ing sak tyedaké sumur gedé ing Seku, terus takon: “Samuèl lan Daved ing ngendi?” Semauré wong: “Ing Nayot, tyedaké Rama.”

²³Saul terus lunga mbrana menyang ing Nayot, ing sak tyedaké Rama lan dèkné uga kedunan Rohé Gusti Allah lan neruské mlakuné ya kebak Rohé kaya nabi, nganti teka ing Nayot, ing sak tyedaké Rama.

²⁴Saul uga ngutyuli sandangané lan uga nggelar kaweruh ing ngarepé Samuèl. Saul tiba ngglundung karo wuda tanpa sandangan sedina sewengi muput. Iki jalarané wong terus ngomong: “Apa Saul uga kepitung golongané para nabi?”