Read Caribbean Javanese 1 Samuèl 21 Bible Online

1 Samuèl 21 - Caribbean Javanese bible

1 Samuèl 21

¹Daved teka ing Nob nemoni imam Akimèlèk. Imam kuwi metuk Daved karo kagèt, tembungé marang Daved: “Kenèng apa teka sampéyan kok dèwèkan lan ora ana sing ngetutké?”

²Semauré Daved marang imam Akimèlèk: “Kula dikèki penggawéan karo ratu karo diweling: Sapa-sapa ora kena weruh perkara sing dadi perluné kowé tak utus lan sing tak préntahké marang kowé kuwi. Mulané wong-wong kula pada kula kongkon menyang ing salah sijiné panggonan.

³Nanging saiki sampéyan nduwé apa? Kula sampéyan sangoni roti lima iji utawa apa waé sing ana.”

⁴Semauré imam Akimèlèk marang Daved: “Kula ora nduwé roti lumrah, sing ana mung roti sutyi; anggeré wong-wong sampéyan pada njaga ora nggepok wong wadon.”

⁵Semauré Daved marang imam kuwi: “Pantyèn kula pada ora kenèng ngumpuli wong wadon kaya waktu mbiyèn-mbiyèné, yèn kula pada maju perang. Awaké wong kula pada sutyi, senajan mung lelungan lumrah, luwih menèh ing dina iki. Siji-sijiné pada sutyi awaké.”

⁶Imam Akimèlèk terus ngekèkké roti sutyi, awit ing kono ora ana roti liyané kejaba roti kurban; roti kuwi adaté dilorot sangka ngarepé GUSTI, supaya ing dina kuwi diganti roti anyar menèh.

⁷Ing dina kuwi uga ing kono ana sakwijiné pegawéné Saul, sing dipiji ngladèni GUSTI, jenengé Doèg, wong Edom, pimpinané para pangoné Saul.

⁸Daved ngomong marang imam Akimèlèk: “Ing kéné sampéyan apa ora nduwé tumbak utawa pedang? Awit pedang utawa gaman kula ora kula gawa, awit préntahé ratu dadakan.”

⁹Tembungé imam mau: “Pedangé Goliat wong Filistèn sing sampéyan patèni ing legokan wit Terbantin kuwi ing kéné, dibuntel karo mori, ing sak mburiné éfod kuwi. Yèn bakal sampéyan jikuk, kono sampéyan njupuk; liyané ora ana, mung kuwi.” Tembungé Daved: “Ora ana sing madani kuwi, sampéyan kèkké marang kula.”

¹⁰Daved terus tata-tata lan budal ing dina kuwi uga mblayu sangka ngarepé Saul; mlakuné wis teka ing pangwasané Akis, ratu-kuta ing Gat.

¹¹Para pegawéné Akis ngomong marang ratu: “Apa kuwi duduk Daved ratuné negara kuwi? Apa ora kuwi wongé sing kanggo menyanyi saur-sauran karo jejogètan mengkéné: Saul ngalahké mungsuh éwon-éwon, nanging Daved nganti puluhan éwon-éwon?”

¹²Daved nggatèkké marang tembung kuwi, nganti dèkné wedi banget marang Akis, ratu-kuta ing Gat kuwi.

¹³Mulané terus étok-étok dadi wong sing édan sangka ngarepé wong-wong kuwi lan étok-étok édan ing sak tyedaké wong-wong kuwi; dèkné nggrawuti lawangé gapura lan ileré diumbar dlèwèran ing jénggoté.

¹⁴Akis terus ngomong marang para pegawéné: “Apa kowé pada ora weruh, yèn kuwi wong édan? Apa perluné wong kuwi kok gawa mréné?

¹⁵Apa aku kekurangan wong édan, nganti wong iki kok adepké marang ing ngarepku, apa supaya mamèrké édané marang aku? Apa pantes wong sing kaya mengkono mlebu ing kratonku?”