Read Caribbean Javanese 1 Samuèl 3 Bible Online

1 Samuèl 3 - Caribbean Javanese bible

1 Samuèl 3

¹Wong enom Samuèl kuwi ngladèni marang GUSTI, diawat-awati imam Eli Ing waktu semono arang ana tembungé GUSTI, malah senajan wahyu ya mung sewaktu-waktu anané.

²Ing sakwijiné dina imam Eli, sing mripaté wis lamur lan ora bisa weruh tyeta, nalika turu ing ambèné.

³Dimaré omahé Gusti Allah durung mati. Samuèl wis turu ing omah sutyiné GUSTI, panggoné petiné Gusti Allah.

⁴GUSTI terus nyeluk: “Samuèl, Samuèl!” lan Samuèl semaur: “kula Bapak!”

⁵Samuèl terus mblayu marani imam Eli lan ngomong: “kula, Bapak, ana apa Bapak nyeluk kula?” Nanging imam Eli ngomong: “Aku ora nyeluk kowé, balia turu menèh!” Samuèl terus bali turu.

⁶Lan GUSTI nyeluk Samuèl menèh. Samuèl ya terus tangi, terus marani imam Eli lan ngomong: “kula, Bapak, apa Bapak nyeluk kula?” Nanging imam Eli ngomong: “Aku ora nyeluk, anakku, balia turu menèh!”

⁷Samuèl durung kenal karo GUSTI. Tembungé GUSTI durung tau ngétok marang Samuèl.

⁸Lan GUSTI nyeluk Samuèl menèh, sing kaping teluné. Samuèl ya terus tangi terus marani imam Eli lan ngomong: “kula, Bapak, apa Bapak nyeluk kula?” Imam Eli terus ngerti, yèn GUSTI sing nyeluk botyah kuwi.

⁹Mulané imam Eli ngomong marang Samuèl: “Mapana turu menèh lan yèn kowé dityeluk, ngomonga mengkéné: Duh GUSTI, Panjenengan supaya gelem ngomong, awit abdi-Mu iki ngrungokké.” Samuèl terus bali mapan turu menèh ing peturoné.

¹⁰GUSTI terus nekani ngadek ing kono lan nyeluk kaya sing uwis-uwis: “Samuèl, Samuèl!” Lan Samuèl ngomong: “Panjenengan supaya gelem ngomong, awit abdi-Mu ngrungokké.”

¹¹GUSTI terus ngomong marang Samuèl: “Ngertia, Aku bakal nindakké sakwijiné perkara ing Israèl, nganti saben wong sing krungu bakal gembrubuk kupingé loro-loroné pisan.

¹²Ing dina kuwi Aku netepi kanggo Eli, samubarang sing Tak omongké bab brayaté, sangka wiwitan tekan pungkasan.

¹³Awit wis Tak omongké yèn Aku bakal ngukum brayaté ing sak lawas-lawasé, awit sangka dosa sing dingertèni, ya kuwi enggoné anak-anaké ora ngajèni Gusti Allah nanging ora disenèni.

¹⁴Mulané Aku wis sumpah marang brayaté Eli yèn dosané brayaté ora bisa ditebus karo kurban sing dibelèh utawa kurban panganan nganti ing sak lawas-lawasé.”

¹⁵Samuèl enggoné turu nganti tekan ésuk; terus mbukakké lawangé omahé GUSTI. Samuèl pekéwuh ngekèki weruh bab wahyu kuwi marang imam Eli

¹⁶Nanging imam Eli nyeluk Samuèl, tembungé: “Samuèl anakku.” Semauré Samuèl: “kula Bapak.”

¹⁷Tembungé imam Eli: “Apa sing dipréntahké GUSTI marang kowé? Aja kok delikké marang aku. Kowé diganjar paukuman karo GUSTI mengkéné lan ditambah luwih okèh sangka kuwi, yèn kowé ndelikké sak tembung waé apa sing diomongké marang kowé.”

¹⁸Samuèl terus ngomongi kabèh mau marang imam Eli, ora ana siji waé sing didelikké. Imam Eli terus ngomong: “Panjenengané kuwi GUSTI, ya kelakona apa sing dianggep apik.”

¹⁹Samuèl wis mundak gedé lan GUSTI nunggal karo dèwèké, ora ana tembungé siji waé sing ora kelakon.

²⁰Wong Israèl kabèh wiwit ing Dan tekan ing Bèrsyéba pada ngerti, yèn Samuèl wis ditetepaké dadi nabiné GUSTI.

²¹Lan sak terusé GUSTI ngétoki marang Samuèl ing Silo karo tembungé.