Read Caribbean Javanese 1 Samuèl 6 Bible Online

1 Samuèl 6 - Caribbean Javanese bible

1 Samuèl 6

¹Sakwisé pitung sasi suwéné enggoné peti perjanjiané GUSTI ing panggonané wong Filistèn,

²wong Filistèn nglumpukké para imam lan tukang tenung, semauré: “Petiné perjanjiané GUSTI kuwi kudu dikapakaké? Kula njaluk sampéyan ngomongi kepriyé anggèné mbalèkké peti kuwi marang panggonané.”

³Semauré wong-wong kuwi: “Yèn bakal mbalèkké petiné Gusti Allahé Israèl kuwi, aja dibalèké karo tangan nglentung, sampéyan kudu masrahké tebusané kesalahan marang Panjenengané; sampéyan terus bakal pada waras lan bakal ngerti, apa jalarané, nanging tangan-Né ora mundur sangka sampéyan.”

⁴Wong-wong mau terus takon: “Tebusané kesalahan, sing kudu kula pasrahaké kuwi apa?” Semauré: “Pada karo tyatyahé ratu kita ing Filistèn, wudun emas lima, lan tikus emas lima, awit sing ditibakké marang sampéyan kabèh lan para ratu kita sampéyan kuwi tyilaka sing pada.

⁵Mulané nggawéa gambaran udun-udun sampéyan lan tikus, sing ngrusak lemah sampéyan, lan ngekèkana hurmat sampéyan marang Gusti Allahé Israèl. Menawa Panjenengané terus bakal ngundurké tangan-Né sing abot menet sampéyan, allah sampéyan lan sangka lemah sampéyan.

⁶Apa ta jalarané, sampéyan kabèh kok pada mangkotké ati, kaya wong Egipte lan Parao? Wong kuwi apa ora pada ngejarké waé, waktu bangsa kuwi lunga, ya kuwi waktu Panjenengané nggawé dolanan wong-wong kuwi?

⁷Mulané pada kula omongi jupuken lan nyawiské kréta gelis lan sapi sak rakit sing ijik nusoni, sing durung tau ditumpangi pasangan, sapi iki terus pada rakitna ing kréta kuwi, nanging pedèté gawanen mulih, supaya ora mèlu.

⁸Sakwisé mengkéné, petiné GUSTI diemotaké ing kréta. Barang-barang emas sing kudu dipasrahké marang Panjenengané kanggo tebusané kesalahan, kuwi dilebokké ing peti, terus dèkèkna ing sandingé petiné GUSTI kuwi. Peti kuwi terus ya bèn lunga.

⁹Banjur pada nggatèkké: yèn peti kuwi metu dalan sing nuju menyang ing panggonané, Bèt-Sémes, kuwi tegesé yèn Panjenengané sing wis nekakké kasangsarané sing medèni kuwi marang kita. Nanging yèn ora mengkéné, kita terus ngerti, yèn duduk tangan-Né sing nyerang kita; mung ketepakan waé bab iki ditibakké marang kita!”

¹⁰Wong mau ya terus nindakké mengkono. Pada njupuk sapi sing nusoni sak rakit, dirakitké ing krétané, nanging pedèté dityentyang ing omah.

¹¹Petiné GUSTI dimomotké ing kréta kuwi, uga peti sing isi tikus-tikusan lan gambaran wudun emas.

¹²Sapi-sapi kuwi terus pada metu ing dalan sing tekan ing Bèt-Sémes, ngliwati daratan gedé karo mbengok lan ora ménggok nengen utawa ngiwa, nanging para ratu-ratuné wong Filistèn kuwi pada lunga ngetutké mlakuné nganti tekan ing panggonané Bèt-Sémes.

¹³Para wong Bèt-Sémes ijik pada panèn jagung ing legokan. Bareng pada ndangak weruh peti mau lan pada bungah atiné.

¹⁴Krétané kuwi teka ing tegalé Yosua, wong Bèt-Sémes lan mandek ing kono. Ing kono ana watu gedé. Wong kuwi pada nyigari kayuné kréta mau lan sapiné dipasrahké kanggo kurban obongan marang GUSTI.

¹⁵Para wong Lévi pada ngedunké petiné GUSTI, uga peti ing sandingé sing isiné barang emas, terus ditumpangké ing watu gedé kuwi, lan ing dina kuwi para wong Bèt-Sémes pada masrahaké kurban obongan lan kurban sing dibelèh marang GUSTI.

¹⁶Bareng para ratuné kuta wong Filistèn lima mau pada ngerti perkara kuwi, ing dina kuwi uga pada mulih bali menyang ing Ekron.

¹⁷Nanging gambaran udun emas sing dipasrahké wong Filistèn marang GUSTI kanggo tebusané kesalahan: Sangka Asdod siji, sangka Gaza siji, sangka Askélon siji, sangka Gat siji, sangka Ekron siji.

¹⁸Mengkono uga tikus-tikusan emas, miturut tyatyahé kabèh kuta-kutané wong Filistèn, duwèké para ratu kuta lima kuwi, ya kuta sing dipageri watu ya désa-désané ing sak ubengé; nanging watu gedé sing ditumpangi petiné GUSTI ing tegalé Yosua, wong Bèt-Sémes mau, kuwi dadi seksi tekan sepréné.

¹⁹Lan Panjenengané ngukum pati wong Bèt-Sémes, awit pada nginguk ing njeruhné petiné GUSTI; Panjenengané matèni wong pitung puluh, rayat ing kono. Wong-wong ing kono pada kasusahan, awit GUSTI wis nibakké bebendu sing ngidap-idapi marang wong-wong kuwi.

²⁰Lan wong Bèt-Sémes pada ngomong: “Sapa ta sing betah adu-arep karo GUSTI, Gusti Allah sing sutyi kuwi? Menyang ngendi bakal mlakuné sakwisé ninggalké kita iki?”

²¹Terus pada kongkonan marani wong Kiryat-Yearim karo diweling mengkéné: “Para wong Filistèn wis mbalèkké petiné GUSTI; pada tekaa lan petiné gawanen menyang ing panggonanmu.”