Read Caribbean Javanese 1 Samuèl 7 Bible Online

1 Samuèl 7 - Caribbean Javanese bible

1 Samuèl 7

¹Para wong Kiryat-Yearim terus pada teka, marani petiné GUSTI lan diusung menyang ing omahé Abinadab ing puntuk-puntuk. Lan Eléazar, anaké disutyèkké, supaya njaga petiné GUSTI kuwi.

²Wiwit ing dina kuwi petiné ing Kiryat-Yearim, nganti suwé, ya kuwi rong puluh taun lan umat Israèl pada sambat kabèh marang GUSTI.

³Samuèl terus ngomong marang wong Israèl sak umat kabèh mengkéné: “Yèn kowé pada mratobat marang GUSTI karo sak kabèhé atimu, nyingkirké para allah liyané lan para Astorèt sangka tengahmu lan adepna atimu marang GUSTI lan mung ngabekti marang GUSTI; Panjenengané terus bakal mitulungi kowé sangka tangané wong Filistèn.”

⁴Wong Israèl terus pada nyingkirké para Baal lan Astorèt lan mung ngabekti marang GUSTI.

⁵Samuèl terus ngomong: “Wong Israèl pada klumpukna kabèh ing Mispa; aku bakal ndongakké kowé marang GUSTI.”

⁶Kadung wis pada ngumpul ing Mispa, terus pada nyiduki banyu lan disuntak ing ngarepé GUSTI. Uga pada pasa lan ngomong ing kono: “Kula wis pada nandangi dosa marang GUSTI.” Lan Samuèl terus ngadili wong Israèl ing Mispa.

⁷Kadung wong Filistèn pada krungu kabar, yèn wong Israèl pada ngumpul ing Mispa, para ratu-ratuné wong Filistèn pada maju ngluruk wong Israèl. Wong Israèl bareng krungu bab kuwi, terus pada wedi marang wong Filistèn kuwi.

⁸Wong Israèl terus ngomong marang Samuèl: “Aja mandek-mandek enggèn sampéyan ndongakké kita marang GUSTI, Gusti Allah kita, supaya Panjenengané mitulungi kita sangka tangané wong Filistèn kuwi.”

⁹Sakwisé kuwi Samuèl njupuk tyempé sing ijik nyusu lan dipasrahké kabèh marang GUSTI digawé kurban obongan. Lan bareng Samuèl ndongakké wong Israèl marang GUSTI, GUSTI nuruti penjaluké.

¹⁰Waktu Samuèl masrahaké kurban obongan kuwi, wong Filistèn pada maju perang, nglawan wong Israèl. Nanging ing dina kuwi GUSTI nekakké gluduk sing swarané ngidap-idapi ing sak nduwuré bangsa Filistèn lan nggègèrké wong-wong kuwi, nganti pada dikalahké karo wong Israèl.

¹¹Wong Israèl pada metu sangka Mispa, ngoyak wong Filistèn lan merangi wong-wong kuwi nganti tekan ing sak ngisoré Bèt-Kar.

¹²Samuèl terus njupuk watu lan didekké ing antarané Mispa lan Sen, dèkné ngekèki jenengé kuwi: Eben-Haéser, tembungé: “GUSTI wis mitulungi kita tekan ing kéné!”

¹³Mengkono wong Filistèn kuwi dikalahké lan ora mlebu ing panggonané Israèl menèh. Tangané GUSTI nglawan wong Filistèn sak suwéné uripé Samuèl

¹⁴lan kuta-kuta sing dikalahké karo wong Filistèn wis bali marang Israèl menèh, wiwit sangka Ekron tekan ing Gat; lan wong Israèl bisa ngrebut panggonan sak ubengé sangka tangané wong Filistèn. Wong Israèl karo wong Amori pada rukun.

¹⁵Samuèl dadi rèkteré wong Israèl sak suwéné uripé.

¹⁶Saben taun dèkné lunga ngubengi menyang Bétel, Gilgal lan Mispa lan ngwasani wong Israèl ing sakkèhé panggonan kono kuwi.

¹⁷Terus mulih menyang ing Rama, awit omahé ing kono, lan sangka kono enggoné ngwasani wong Israèl, lan ing kono dèkné nggawé mesbèh kanggo GUSTI.