Read Caribbean Javanese 1 Samuèl 8 Bible Online

1 Samuèl 8 - Caribbean Javanese bible

1 Samuèl 8

¹Bareng Samuèl wis tuwa, anaké lanang diangkat dadi rèkteré wong Israèl.

²Jenengé anaké sing mbarep Yoèl lan sing nomer loro Abia, loro-loroné dadi rèkter ing Bèrsyéba.

³Nanging anaké kuwi mlakuné ora kaya bapaké, nguber untungé, nampani beselan lan ngénggak-ngénggoké pengadilan.

⁴Mulané para tuwa-tuwané Israèl pada ngumpul terus nemoni marang Samuèl ing Rama,

⁵lan ngomong: “Sampéyan wis tuwa lan anak-anaké sampéyan tindak-tanduké ora kaya sampéyan; mulané supaya sampéyan ngangkata ratu sing ngwasani kita kaya déné bangsa liyané.”

⁶Waktu pada ngomong: “Kita njaluk dikèki ratu sing ngwasani kita,” tembung kuwi ora dadi senengé Samuèl, mulané Samuèl terus ndedonga marang GUSTI.

⁷GUSTI ngetokké tembung marang Samuèl: “Turutana penjaluké bangsa kuwi ing bab kabèh perkara sing dikabarké marang kowé, awit duduk kowé sing ditampik, nanging Aku sing ditampik supaya aja ngratoni menèh marang bangsa kuwi.

⁸Ora béda karo sing ditindakké marang Aku, wiwit waktu Tak etoké sangka negara Egipte tekan sepréné, ya kuwi enggoné nyingkur marang Aku lan ngabekti marang allah liyané, mengkono uga sing ditindakké marang kowé.

⁹Mulané turutana penjaluké, mung waé élingna tenan lan dunungna kanggo wewenangé ratu, sing bakal ngwasani.”

¹⁰Lan Samuèl nglaporké kabèh tembungé GUSTI marang bangsa, sing pada njaluk ratu kuwi,

¹¹tembungé: “Iki sing dadi wewenangé ratu sing bakal ngwasani kowé: anak-anakmu lanang pada dijaluk didadèkké suradadu kréta lan jaran, lan bakal mlayu ing ngarepé kréta tumpakané;

¹²dèkné bakal ngangkat wong-wong kuwi dadi penggedéné perjurit 1000 lan penggedéné perjurit sèket; bakal pada nggarap tegalé lan ngenèni kanggo dèkné; nggawakké gaman lan pirantiné krétané.

¹³Anak-anakmu wadon bakal pada dijikuk dadi tukang nyampur bumbon wewangian, dadi tukang masak lan tukang ngolah panganan.

¹⁴Sak terusé sangka kebonmu, kebonmu anggur lan saitun bakal dijikuk sing apik déwé lan dikèkké marang para pegawéné.

¹⁵Jagung lan wohé kebonmu anggur bakal dijukuk sak prosepuluhé lan dikèkké marang para penggedé lan pegawéné ing kratoné.

¹⁶Peladènmu lanang lan wadon, kéwanmu sing apik déwé lan kimar-kimarmu bakal dijikuk lan dikongkon nyambutgawé.

¹⁷Wedus-wedusmu bakal dijaluk sing sak prosepuluhé, lan kowé déwé bakal pada dadi abdiné.

¹⁸Ing waktu kuwi kowé bakal pada sambat jalaran sangka ratu pilihanmu, nanging GUSTI ora bakal nyauri marang kowé.”

¹⁹Nanging bangsa kuwi ora gelem ngrungokké marang tembungé Samuèl, malah kewetu tembungé: “Ora kudu ana ratu sing ngwasani kita;

²⁰kita bisaa madani bangsa-bangsa liya; ratu kita bakal ngadili kita lan mimpin kita ing peperangan.”

²¹Sakwisé Samuèl krungu kabèh tembungé bangsa kuwi terus ngomong bab kuwi marang GUSTI.

²²GUSTI terus ngetokké tembung marang Samuèl: “Penjaluké turutana, lan ngangkata ratu kanggo wong-wong kuwi.” Samuèl terus ngomong marang wong Israèl: “Wis pada muliha, menyang kutamu déwé-déwé!”