Read Casuarina Coast Asmat MATIUS 11 Bible Online

MATIUS 11 - Casuarina Coast Asmat bible

MATIUS 11

¹Emesare. Yesus atakam abajamkai owe 12 asakamtamkorome ere, Armat Ipit atakam baememtamam, bakoretamam, era setep kotaiin kotaiin aesose.

²Yohanesam buji tame bomon taojape, are Kristus aeme pak atakam jane ajie. Me Yohanes arawa, abajamkai owe, Armat Ipitpu ambirimemome.

³Era oweam Armat Ipit ajatepores. “Wore Allah ataendaemar Ipit apaye? Dare wan ipit bandae banamek bapeap apaye?” Emes atakam aesimes.

⁴Yesus arawa, “Tanom baesosay. Wanam era jane ajimakam pakam, era apormakam pakam, atakam Yohanes aesimtamay.

⁵‘Banamek kapie owe, banamek awaramemas. Bai kumiti owe ajaremas. owe ombare bamarem damo pitini potanak owe, damo asan akot aemememas. Jane bire owe, jane ajiemas. Dambir owe ajaorwasitemas. Owe Allah Akot Atakam, era pak apok owe akoretamemas.

⁶Me Yesus bajamkai bamompim apok owe, asan akot aemapemas.’ Emes atakam aesimay.” Yesus emes atakam aesime.

⁷Me Yohanes bajamkai owe aesoses ere, Yesus Yohanes atakam era owe tanane akorome. “Tare era tame apok asan, wama pak bapora asosekem? Tare, bui, firka bawawarim bapora esosekeme?”

⁸Tare wama pak bapora esosekem? pakaian akot ajiimome ipit bapora esosekeme? Baporay! Era pakaian akot ajiimomemas owe, owe baomep owe tame bomon aemapemas.

⁹Tare wama pak bapora esosekem? Allah atakam bakoretam ipit bapora esosekeme? Ijee! Tare ere, baporay! Allah atakam bakoretam owe, ere juas apok. Me Yohanes ere, juas aptam.

¹⁰Alkitab Armat Ipit emes atakam akorem: ‘Baporey! Dere deateman batam ipit bonak ambirimemomtemin. Wore ere asep are. Armat ipit ajartem bai asan akenemtiitem.’ Alkitab emes atakam akorem

¹¹Atakamnak, Yohanes Owe Bwi Bakupimtaer Ipit, ere juas aptam ipit. Me wan tapes ajisipetiies owe, juas apok. Me, Allah baomep juas apoknak owe, ere juas aptam owe. Me Yohanes ere, juas apok.

¹²Yohanes akoretame baream, waa ajiiream, jokoman owe Allah abaomep owe ajurusumaaris. Are era owe bakumimosom aemporaaris.

¹³Allah atakam bakoretam owe aeapomes buku takesam, Musa aeapome Basakamtam Atakamam, era ajinaotas pak atakam are. Era buku takes, Yohanes akoretame bare ajiire pak are.

¹⁴Era bukuiin Elia bajinao, atakam akores. Emesare, Yohanes ere, Elia. Tare era akores atakam bamesem apaye?

¹⁵Jane fero owe ara atakam jane bajitas.

¹⁶“Era ajitemaaris owe awar wama atakam akoretey? Emesare, ara aemapes owe, pasar asan baemap jii awar. Era jii, atee takan ajameamas jii, atakam daytu ajamkoramemas.

¹⁷‘Dare embe tare etekoromtamom. Tare ere, di bandie apoknak. Danom awan bate ambatamom. Tare ere, bate apoknak.’ Era jii emes aememas.

¹⁸Me Yohanes ajinaoe ere, are amos anama anggur bwi banda apok. Owe ere, ‘Era ipit jak bomon, ere bii.’ Emes atakam aesimemas.

¹⁹Asamot Anakot Ajaoreme Ipit andae ere, Are amos anama bwi andaarir. Owe ere, ‘Baporay! Era ipit amos paknam ipit. Are bir bwi banda jaytu ipit. Are pemerintah uang bataajanimtam karai owe anama era Yahudi agama pak tai aooes owe, ajoo owe.’ Emes atakam aesimemas. Allah bimak binip ere, baso taka. Owe Allah aemmar pak apormas apaye, are ara atakam, atakamnak apormas.”

²⁰Bonak ere, Yesus wan kota tanane, jinim bae pak daytu tanane aeme. Asep ere, Are era kota owe apota pak bamakem apok apore, Are era owe ajatemotaere.

²¹“Me takota Korasim owe ajirisaptemakam. Me takota Betsaida oweam ajirisaptemakam. Dere jinim bae pak daytinak taasan aemo. Me, owe emes jinim bae pak daytinak, kota Tirusam, kota Sidonam, aemes ere, era owe tarainak, apota pak takes etebakemes. Are kuusnak etejakuapes. Are se etejaramapes.

²²Tare ere, baporay! Me Allah, owe bajurusum bare aemamesto, Are Tirus oweam, Sidon oweam, kope ajurusumtem. Me, Are daytinak tara ajurusumteman.

²³Tare Kapernaum owee! Allah tara asitimtemane? Apoknak! Are tare danais aemteman. Dere jinim bae pak daytinak taasan aemo. Me, owe emes jinim bae pak daytinak kota Sodom aemes ere, era kota, waa ajiiream asinta.

²⁴Tare ere, baporay! Me Allah, owe bajurusum bare aemamesto, Are Sodom tapirmi owe kope ajurusumtem. Me, Are daytinak tara ajurusumteman.” Yesus emes atakam aesime.

²⁵Era baream, Yesus atakam akore. “Dot! Wore Surga oupam, ara tapirmiam, aemomemmarem. Wore ere, era pak bimak binip baso oweam, era amsam oweam, atukumomem, wanam era pak jii kope aporomtamem. Wonom emes baem akot ajiem. Emesare, Denom terima kasih atakam Wora aokorommin.” Emes atakam aesime.

²⁷Yesus arawa, “Allah Andep amsam owe, ere apoknak. Aritipit taka, ere Andep amsam. Aritipit amsam oweam, ere apoknak. Andep taka, ere Aritipit amsam. Me Andep Aritipit wan owe baporomtam, akot ajim. Me era oweam Aritipit amsam.

²⁸Tare wan owe, ere wuturu pak atoomemakam. Erarawa tare damo jip aememakam. Tanom Dera jinaomani. Denom kais banda tara atetamtemin.

²⁹Ere deatakam ji aeay. Dere ajamkaiani. Erarawa tare kais andetemakam. Emesare, Dere tayiakot Ipit. Denom Dema baemetemtem apok Ipit.

³⁰Doemomo owe, damo jip apok aemtemas. Dewuturu pak, ere faaro. Yesus emes atakam aesime.”