Read Casuarina Coast Asmat MATIUS 12 Bible Online

MATIUS 12 - Casuarina Coast Asmat bible

MATIUS 12

¹Emesare. Era baream, Yesus gandum kebun ajare. Ere Yahudi Owe Samayen Bare. Me abajamkai oweam amosto aememes. Ararawa, gandum eek akokomtaaes, wanam andes.

²Me Parisi oweam emes apores. Ararawa, “Baporey! Wobajamkai owe, Yahudi Owe Samayen Bare aememas pak ere, Musa Basakamtam Atakam aoomas.” Emes atakam aesimes.

³Me Yesus ere, “Tare Daut aeapome atakam, baca bae apok apaye? Are era takan ajamememes oweam, amosto aememesen.

⁴Armat ipit Allah Tame ajiiemen. Ajiiemerawa, ere Allah bipu ataetiitames amos, ataenen. Emesare, armat ipitam, era takan ajamememes oweam, era amos andes, karao pak aemes. Era amos Allah Tame pak baem owe taka aobanda eraren. Daagama basakamtam atakam emes atakam are.

⁵Me Allah Tame pak baem oweam, Allah Tame bomon, era Yahudi Owe Samayen Bare atakam aoomas. Me, Allah, ‘Era pak dosa,’ emes atakam apok. Tare era atakam Musa aeapome Basakamtam Atakam bomon, baca bae apok apaye.

⁶Tare ere, baporay! Ara asan anakotnak Ipit taka aometa. Me Allah Tame ere, anakot kope.

⁷Alkitabam, ‘Dere, owe soro bajiomem, jak aseserommin. Dere ere, owe pak Dera bataetiitam, jak baseseromem apok.’ Tare ere, emes atakam tamsamnak apok. Erarawa tare atakam era turunak owe akoromekem. Tare owe jaos. Emes atakam aesimekem.

⁸Emesare, Asamot Anakot Ajaoreme Ipit, era Yahudi Owe Samayen Bare armat ipit aememem. Yesus emes atakam aesime.”

⁹Emesare. Yesus era asan aite. Ararawa, era owe asamayen tame ajiie.

¹⁰Era asan ere, ban tapip ipit aemape. Me era asan oweam, “Yesus pota pak aemum,” emes atakam bakore jak aseseromes. Erarawa are Yesus ajatepores. “Owe, damo pota owe, Yahudi Owe Samayen Bare damo ajaoromtaatas, are Musa Basakamtam Atakam aoomas ape?” Emes atakam aesimes.

¹¹Me Yesus arawa, “Tare wan ipit taka, domba taka aemomemtakam apaye, wanam era domba, Yahudi Owe Samayen Bare, tapirmi jafa bomon andaetakafiapto apaye, ere tare era domba, ban aosomtaeremakam, wanam era domba ajimtaeremakam.

¹²Asamot owe, ere anakotnak. Domba ere, anakot kope. Emesare, owe Yahudi Owe Samayen Bare, akot pak aemtas, are Musa Basakamtam Atakam baoo apok aemtemas.” Emes atakam aesime.

¹³Armat ipit arawa, atakam era ban tapip ipit akorome. “Ban bajiraomey.” Emes atakam aesime. Era ipitam aban ajiraome. Era ban arawa, era poman ban akotnak awar aememe.

¹⁴Emesare, Parisi owe ajises. Are Yesus batatii atakam ajamsakamamtiies.

¹⁵Yesusam emes atakam jane ajie. Ararawa, era asan beken ajiose. Owe tananeam Armat Ipit fe asarames. Armat Ipitam damo pota owe takes ajaoromtaae.

¹⁶Are atakam era owe asakamtame. “Owe baesimtam bas.” Emes atakam aesime.

¹⁷Ere Allah atakam bakoretam ipit juas Yesaya, era akoretame atakam jipu baem are. Era atakam:

¹⁸“Baporay! Ara aemema Ipit debamirimemom Ipit. Dere Armat Ipit afaimemin. Dere Armat Ipit, akot ajimin. Denom deJip Armat Ipit atetamtemin. Armat Ipitam atakam era tapirmiin tapirmiin owe, akoretamtem. ‘Allah era asakamtiimar atakam, ere turunak.’ Emes atakam aesimtem.

¹⁹Are owentakam atakam apok aemtem. Are atakam bafaketaer apok aemtem. Are bokotpu, atakam daytu bakore apok aemtem.

²⁰Are asan akot kumiti owe aemtem. Are jokoman pak jak pota owe baem apok aemtem. Are era jaos pak takes akumimosomkoromto bare ajiire, era pak aemtem.

²¹Owe takesam Armat Ipit jiirey taka aeetemas.” Yesaya emes atakam akoren.

²²Emesare, owe jipit taka Yesus ambaromes. Bii era ipit jak bomon aemapaarir. Erarawa era ipit, banamek kapie anama okor aememaarir. Emesare, Yesus era ipit ajaoromtaere. Erarawa era ipit atakam aptam aememe. Are banamek awareme.

²³Era owe takesam jinim daytu aees. “Ara aemema ipit Daut Wurpis apaye?” Emes atakam aesimes.

²⁴Parisi owe ere, era atakam jane ajies. Ararawa, “Beelsebul, bii takes akapar ipit. Are fiak pak ara aemema ipit atetamum. Era ipit bii emes taka ambirimjisimeme.” Emes atakam aesimes.

²⁵Yesusam era owe bimak binip amsam. Ararawa, atakam era owe akorome. Samane taka jii armamon ajamomtas apaye, are ajaniostemas. kota owe apaye, tame owe apaye, jii armamon ajamomtas apaye, are apatakuostemas.

²⁶Wanam, Bii Kapar Ipit, arereis ambirimjisimto apaye, ere owentakam armamon ajamomtemas. Erarawa Bii Kapar Ipitam, ajoo oweam, apatakuostemas.

²⁷Tare ere, ‘Beelsebul afiak pak ara aemema ipit atetamum. Erarawa era ipit bii ambirimjisimum.’ Tare Dere emes atakam akorommankum. Me, tabajamkai oweam bii ambirimjisimemas. Me bii bamirimjisim fiak pak era owe tao tetame? Emesare, tabajamkai owe, era akoremakam atakam, atakamnak apok aporomtammas.

²⁸Me, Allah Jip, era bii bamirimjisim fiak pak Dera atetamman. Emesare, Allah taasan wan owe baomep tair.

²⁹Owe, fiak ipit tame bajii, wanam aapak tasa baetaer, ere emes baemeem asan apok. Are era fiak ipit ban ato takamjikapomtas, are atame pak tasa baetaer, ere erare.

³⁰Me Dera bajamkai apok owe, deatakam aoomas. Owe wan owe Dera bajamkai baememtam apok aemtas, are owe apatakumosomtemas.

³¹Emesare, Dere atakam tara akorommin. Allah, owe adosa takesam, era tame atemas atakam takesam, bimak binip ajanimemtamtem. Me, owe tame Allah Jip atetas, Allah era dosa bimak binip bajanimemtam apoknak aemtem.

³²Owe, atakam pota, Asamot Anakot Ajaoreme Ipit akoromtas apaye, Allah era dosa bimak binip ajanimemtamtem. Me, owe, Allah Jip atakam pota akoromtas apaye, Allah era dosa, waaam, era asepnak baream, bimak binip bajanimemtam apoknak aemtem.

³³“Wus akot, eekam akot apeomteptem. Wus pota, eekam pota apeomteptem. Owe, era wus eek apormas, are era wus, wus akot apaye, pota apaye, emes aporemas.

³⁴Amber jiie! Tare jokoman. Owe atakam ajak bomon pak jipu taka akoreemas. Erarawa tare atakam akot baemekore asan apok.

³⁵Akot owe, ajak bomon, akot pak aemomemas. Erarawa are atakam akot akoreemas. Pota owe, ajak bomon, pota pak aemomemas. Erarawa are atakam pota akoreemas.

³⁶Tare ere, baporay! Bare taka, Allah, owe dosa, atakam asakamtiitem. Era bare, owe, era pota atakam akoreaaris atakam takes, atakam Allah amba aokoretetertemas.

³⁷Allah, era akoreaarukum atakam, akot aporto, are tare turunak owe, emes atakam asakamtiitem. Are era akoreaarukum atakam, pota aporto, Are tare owe jaos, emes atakam asakamtiitem.” Yesus emes atakam aesime.

³⁸Emesare, wan Allah atakam baememtam oweam, Parisi oweam, atakam Yesus ajanimes. “Guru! Dare, Wore jinim bae pak baem bapor.” Emes atakam aesimes.

³⁹Yesus arawa, atep era owe ajite. “Ara ajaniames owe, ere jaos owe. Are Allah awotapememas. Erarawa are jinim bae pak bapor atakam ajanimemas. Allah ere, wan jinim bae pak, ara aemapares owe baporomtam apok aemtem. Are Allah atakam bakoretam ipit juas Yunus era aeme pak emes tamen jinim bae pak taka aporomtamtem.

⁴⁰Me Yunus, bare bamintep enamo jak bomon aemansen. Emesare, Asamot Anakot Ajaoreme Ipit bare bamintep se bomon aemamesten.

⁴¹Me Niniwe oweam, Yunus akoretame atakam jane ajies, wanam adosa ambakemesen. Anom Allah atakam ji aeesen. Me Yunus ere, juas apok. Ara asan ere, juas aptam ipit aometa. Emesare, Allah ara ajaniemmas owe adosa atakam basakamtii bare aemamesto, era Niniwe oweam awasittemas, wanam atakam ara owe akoromtemas. Tare owe jaos, emes atakam aesimtemas.

⁴²Me selatan tapirmi raja taotam, Solomo bimak binip baso atakam jane bajie, setep apok tapirmi aejinaoen. Me Solomo, ere juas apok. Ara asan ere, juas aptam ipit aometa. Emesare, Allah, ara ajaniemmas owe, adosa atakam basakamtii bare aemamesto, era taotam awasittem, wanam atakam ara owe akoromtem. Tare owe jaos, emes atakam aesimtem.”

⁴³“Bii, owe jak bomon ajisto, wasen afafasiejarem. Are kais banda asan andimarem. Me, are kais banda asan baporomtaer apok aemum.

⁴⁴Ararawa, ‘Dere era ajiso tame aojiiaptemin.’ Emes atakam aesimum. Era asan aofasito, are era jak bomon ajise ipit, tame awar aporem. Era tame, ere fie. Oweam era tame bomon fie aemtiies. Are era tame pak takes akenemapomes.

⁴⁵Me biirawa, aoesoseme, wanam wan bii poman ban jamnuk ametetoomjinaoeme. Era bii poman ban jamnuk, ere jokoman daytinak. Me bonak bii ere, jokoman daytu apok. Emesare, era bii takes era ipit jak bomon ajiiemas. Are era asan aemapemas. Era ipit arawa, asan potanak aemapeme. Bonak ere, asan pota kope emes aemapaarir. Are ara ajaniemmas jaos owe, emes taka aemmas.” Yesus emes atakam aesime.

⁴⁶Yesus emes atakam era owe taoemekoromape, arsoot anama areotais tasan aememes. Are atakam Armat Ipit bajamkoram are.

⁴⁷Jipit takarawa, atakam Armat Ipit akoromen. “Baporey! Worsoot anama woreotais tasana. Are atakam wora bakoromen.” Emes atakam aesime.

⁴⁸Yesus ere, atakam era aesimtame ipit akorome. “Dere dersoot tanam? Dereotaisam tanam?” Emes atakam aesime.

⁴⁹Armat Ipitam, abajamkai owe ban akanime. “Ara aemapes owe deritapes anama dereotais.

⁵⁰Surga oup Deritipit akot aporemar pak jipu baem owe, ere dereotais, derpitais, deritapes, aememmas.” Emes atakam aesime.