Read Casuarina Coast Asmat MATIUS 14 Bible Online

MATIUS 14 - Casuarina Coast Asmat bible

MATIUS 14

¹Emesare. Era bare ere, Herodes Antipas Yesus atakam jane ajien. Me Herodes Galilea tapirmi owe baomep ipit takakopeen.

²Armat Ipit atakam akarai baetam owe akoromen. “Yesus ere, Yohanes Owe Bwi Bakupimtaer Ipit. Me Yohanes etejaorwasite. Erarawa are era jinim bae pak daytu aememe.” Emes atakam aesimen.

³Bonaknak ere, Herodes, areot juas Filipus aremo aotaeten. Me aremo juas Herodiasen. Yohanesam atakam Herodes akoroma ajaien. “Wore era taot aotaetmarem, ere Musa Basakamtam Atakam aoomarem.” Emes atakam aesima ajaien. Herodesam, emes apore ere, are owe Yohanes bajipirtaer, ban banam bajikapom, buji tame bomon bajiitaapomam, emes atakam asakamtamen.

⁵Me Herodes, Yohanes batatii, akot ajien. Me, are owe tanane ombare aememen. Era owe tanane abimak binip ere, “Yohanes, Allah atakam bakoretam ipitkor.” Emes bimak binip atetaramesen.

⁶Me Herodes ajisamse bare, owe pakambwi aemesen. Me Herodias arerepam era pakambwi jaki owe bipu di andien. Herodes arawa, era di andie akotnak aporen.

⁷Are era taot ataaji aeetamen. “Pak atakam ajaniman. Dere era pak wora batetam.” Emes atakam aesimen.

⁸Arsoot arawa, atakam arerep akoromen. Me arerep arawa, arsoot atakam jipu, Herodes aokoromen. “Yohanes Owe Bwi Bakupimtaer Ipit akuus, aone bomon ara asan ombo tetaman.” Emes atakam aesimen.

⁹Emesare, raja era taot atakam ajanime pak jane ajien. Ararawa, jak pota daytu aemapen. Me, are era ataaji aee pak aporen. Are pakambwi jaki owe aporen. Erarawa are owe era pak era taot batetam atakam asakamtamen.

¹⁰Are owe Yohanes kuus buji tame bomon basakamtaer atakam asakamtamen.

¹¹Owerawa, era kuus aone bomon era pakambwi tame atoomjiiesen. Atoomjiies arawa, era taot atetamesen. Era taotam era kuus arsoot aotetamen.

¹²Me Yohanes ajamkaies owerawa, bino ambartaeresen. Are era bino awuapomesen. Ararawa, Yesus ambaromes, wanam era pak atakam aesimtames.

¹³Yesus emes atakam jane ajie, Are era asan beken ajiose. Are ti andaejuue, wanam tame apok asan apa aesose. Owe tananeam emes atakam jane ajies. Are akota poreesosa ajaies. Are tamao Yesus fe asep asarames.

¹⁴Emesare, Yesus asokue. Asokuerawa, Are era owe tananenak apore. Are era owe seis akot aoorpore. Wanam, Are era owe damon, damo pota owe ajaoromtaere.

¹⁵Emesare, ju atie. Ju atierawa, Yesus bajamkai owe Armat Ipit ambaromes. “Ara asan tame apok asan. Juam emetiar. Ara owe tanane baesos atakam asakamtamey. Are ara samaniin samaniin, banda pak bajitittaan baesostas.” Emes atakam aesimes.

¹⁶Yesus arawa, “Era owe baesos bas. Tare banda pak era owe tamba atetamay.” Emes atakam aesime.

¹⁷Era owerawa, “Dare ere, ara asan amos jise ban taka kopeam, enamo jamnuk kopeam, atoomarom.” Emes atakam aesimes.

¹⁸Armat Ipit arawa, “Emesare era pak dera toomdaetamani.” Emes atakam aesime.

¹⁹Armat Ipit arawa, era owe takapin ten bandaepakiapteter atakam asakamtame. Are era amos jise ban takaam, era enamo jamnukam, ataere. Are banamek wonamo oup apemtemeteme. Are terima kasih atakam Allah akorome. Wanam, era amos akookome. Amos akookomerawa, Are era amos abajamkai owe atetame. Me abajamkai owerawa, era amos, era owe tanane asaietames.

²⁰Emesare, era owe takes era amos andes. Are jak andatukuapteteres. Oweam era andaeremtiies amos, ese 12 aoweapomes.

²¹Era amos andes oorey owe, ere 5.000 apayeen. Are tapes anama jii bajititimar apok.

²²Emes aemes arawa, Yesus atakam abajamkai owe, ametesakamtamen. “Tanom poman bonak ajiriteay. Dere asep bajinao.” Emes atakam aesimen. Armat Ipit arawa, era owe tanane tame poreesosa bajie atakam asakamtame.

²³Are era owe tanane tame baesos atakam asakamtamerawa, atakam Allah apa bajanim, fami oup atemete. Ere jee asapiepue, Armat Ipit apa aemapen.

²⁴Me abajamkai owe ere, itimbup aemeses. Buiam ti timen awotapeme. Erarawa woam era ti afaumjuume.

²⁵Eamnak arawa, Yesus era owepu ajinaome. Are bwi ten ajare.

²⁶Me abajamkai owe, Armat Ipit bwi ten bajar apores. Ararawa, ombarenak aemeses. “Jake tasir ipit!” Emes atakam aesimes.

²⁷Yesusam atakam era owe ametekorome. “Jak fiaka! Dere Yesus. Ombare bas.” Emes atakam aesime.

²⁸Petrus arawa, “Tuhan! Wora apaye, ere, dere era bwi ten wopu bajar, atakam basakamtaman.” Emes atakam aesime.

²⁹Yesus arawa, “De!” Emes atakam aesimen. Emesare. Petrus era ti aesoondae. Ararawa, Yesuspu bwi ten ajare.

³⁰Me, are bui daytu apore ere, ombare aememe. Are bwi ajurpuuerawa, wanam atakam daytu afaketaere. “Tuhan! Dere bajortaeran!” Emes atakam aesime.

³¹Yesus arawa, aban ametejiraomdaeme. Are armat ipit ban ajimompe. “Wore eemnak Dera bamesemkorom apok. Wore apa ombareem?” Emes atakam aesime.

³²Era ipit amnuk arawa, ti asojuuemis. Ti asojuuemis arawa, bui akarie.

³³Era ti bomon aemeses oweam Yesus asitimes. “Atakamnak! Wore Allah Andep.” Emes atakam aesimes.

³⁴Emesare, are poman apiiresen. Poman apiires arawa, Genesaret tapirmi ajirites.

³⁵Me era asan oorey owe, Yesus amsam. Era oweam, era tapirmi takes damo pota owe bajate, atakam asakamtames. Owerawa. Era damo pota owe takes Yesuspu atoomtines.

³⁶Are era damo pota owe Yesus baju aip ban taka bakurum, atakam Armat Ipit ajanimes. Emesare, era baju aip ban bi akuruma ajaies owe takesam, ajaorema ajaies.