Read Casuarina Coast Asmat MATIUS 15 Bible Online

MATIUS 15 - Casuarina Coast Asmat bible

MATIUS 15

¹Emesare. Parisi oweam, Musa Basakamtam Atakam baememtam oweam, Yerusalem aesoses, wanam Yesus ambaromes.

²Are atakam Armat Ipit akoromes. “Me wobajamkai owe, darfais owe pak tai ataitiostamtetereroes atakam, jipu baem apok. Amos andemas, are ban bwi bonak batakameosom apok aememas. Ere wama tamenem?” Emes atakam aesimes.

³Yesus arawa, “Tare tarfais owe era ataitiostamteteren pak jipu aemakam, wanam Musa Basakamtam Atakam aooemakam. Ere wama tamenem?

⁴Me Allah atakam asakamtame, ‘Wuritipit anama worsoot asitimaarey.’ Wanam, ‘Owe, tame atakam, aritipit apaye, arsoot apaye, akoromtas, era tame atakam owe batatiiay.’ Allah emes atakam aesimen.

⁵Me, era aememtamemakam atakam ere, ‘Owe, atakam aritipit apaye, arsoot apaye, akoromtas, “Dere wora batetam aemtey uang, Allah emetetamo,” emes atakam aesimto,

⁶era ipit, pak arisare batetam apok baemto.’ Emes atakam aesimemakam. Erarawa tare tarfais owe era ataetiostamen atakam jipu aemakam, wanam Allah atakam ajanimosomemakam.

⁷Tare pir bae owe! Bonaknak ere, Yesaya era aemtakam pak atakamnak akore:

⁸‘Allaham: “Are owe tere irpitin taka eommanis. Me, ajak bomon ere Dera bajamkai apoknak.

⁹Are bambi tere eommanis. Era aememtammas atakam, ere asamot basakamtam atakam taka. Ere dosakamtamo atakam apok.” Allah emes atakam aesima.’ Yesaya emes atakam akoren.” Yesus emes atakam aesime.

¹⁰Emesare. Yesus era owe tanane ajate. Wanam atakam era owe akorome: “Ara akoremin atakam jane feroa. Emesare, ara atakam jane bajikoromay.

¹¹Banda pak, owe okone ajiito, era owe dosa baem pak apok. Me, okone ajisto pak, era owe dosa baem pak.” Emes atakam aesime.

¹²Era bajamkai owerawa, Armat Ipit ambaromes. “Me Parisi owe, era akoremarem atakam jane ajiares ere, are jak ambap apumapares.” Emes atakam aesimes.

¹³Yesus arawa, “Era Surga Oup Deritipit, aobajapom apok pak akene takes, bimi aptam asusumtaatem.

¹⁴Emesare, era owe emes baemaptas. Are banamek kapie owe emes tamen are. Are wan banamek kapie owe atoomatmas emes tamen are. Emesare, banamek kapie ipit, wan banamek kapie ipit atoomatto, era ipit amnuk takes, jafa takan andaetakafiaptemamis.” Emes atakam aesime.

¹⁵Me Petrus arawa, “Era baetaa atakam akoretammarem, wama tamenem? Atakam okoretamaro.” Emes atakam aesime.

¹⁶Yesusam, “Waa ajiire, tanom era atakam jane bajiekorom apoke?

¹⁷Emesare, banda pak okone ajiito, jak bikini bomon ajiim, wanam aojisim. Tanom emes tamsam apoke?

¹⁸Me, era okone ajisto pak, era owe abimak binip jipu pak are. Era pak era owe dosa baem are.

¹⁹Owe abimak binip jipu pak ere, pota pak. Erarawa era owe, wan owe atatiiemas. Are tani tamane ajamdamatemas. Wan asan pota pakam aememas. Are pak wosom aeemas. Pote atakamam akoreemas. Tame atakamam akoreemas.

²⁰Era atakam, owe dosa baem pak erare. Me, owe ban bwi bonak batakameosom apok aemtas, wanam pak andetas, ere era pak era owe dosa baem pak apok.” Yesus emes atakam aesime.

²¹Emesare. Yesus era asan beken ajisose. Wanam are kota Tirus anama kota Sidon, era apakaiose tapirmi aesose.

²²Kanaan tapirmi taotam, era asan aemape. Are Yesus ambarome. Wanam, “Dot! Daut Wurpise! Seekot aoorporan. Bii dererep jak bomon aemapem. Erarawa dererep asan potanak aemapem.” Emes atakam aesime.

²³Armat Ipit ere, atep bajit apok. Me abajamkai owerawa, Armat Ipitpu ambaromes. “Era taot baesos, atakam asakamtamey. Are dara saramomatmaro, wanam atakam afakeem,” Emes atakam aesimes.

²⁴Me Yesus arawa, “Allah Dere Israel owepu taka ambirimemomen. Era owe, apakapiosmas domba emes tamen are.” Emes atakam aesime.

²⁵Emesare, era taot ambarome, wanam Armat Ipit bipu bi fop andaejiape. “Dot! Pi pajatan!” Emes atakam aesime.

²⁶Yesus arawa, “Dejii amos, juuri bakorompirimtam, ere pota.” Emes atakam aesime.

²⁷Era taot ere, “Dot! Era akoremarem atakam, ere atakamnak. Me, juuri armat owe aamos bimisi bap ajondaeto, juuriam amos bimisi andeemas.” Emes atakam aesime.

²⁸Yesusam atakam era taot aokorome. “Wore eemnak ambesemkorommanim! Erarawa Dere era jak aseseromemarem pak jipu aemmin.” Emes atakam aesime. Armat Ipit arawa, era taot arerep ametejaoromtaere.

²⁹Emesare. Yesus era asan beken ajiose. Ararawa, Galilea jupima ajare. Are fami oup atemete, wanam apakiape.

³⁰Owe tananenakam Armat Ipitpu ambaromes. Are kam oweam, kamtan tapip oweam, banamek kapie oweam, okor oweam, wan owe tananeam, Yesus bipu ataapomes. Armat Ipit arawa, era owe ajaoromtaae.

³¹Emesare, era okor owe atakam akorea ajaies. Era kamtan tapip oweam kamtan akot aemema ajaies. Era kam oweam bai ajara ajaies. Era banamek kapie oweam apora ajaies. Era asan aememes owe tananeam emes apores. Ararawa, Israel owe aAllah asitimes.

³²Wanam, Yesus abajamkai owe ajate. “Dere ara aemapes owe tanane seis akot aoorpormin. Are bare bamintep dare takan aemapmarom. Are amos apok aemapmas. Me wan owe aites asan setep apok. Erarawa Dere era owe amos banda apok baemosom potanak. Are waut damo tumur bajatos-ombar.” Emes atakam aesime.

³³Era bajamkai owerawa, atakam Armat Ipit akoromes. “Dare tame apok asan aememmarom. Dare ara owe tanane jak batukuap amos, ete asana taatam?” Emes atakam aesimes.

³⁴Me Yesus arawa, “Era atoommakam amos jise wama tamenem?” Emes atakam aesime. Era owerawa, “Dare amos jise poman ban jamnuk anama enamo koser bamintep atoommarom.” Emes atakam aesimes.

³⁵Emesare, Armat Ipit era owe tanane bap bandaepakiap atakam asakamtame.

³⁶Armat Ipit arawa, era amos jise poman ban jamnuk anama enamo ataere. Wanam, Are terima kasih atakam Allah aokorome. Ararawa, era amos akookome. Akookomerawa, Are era amos abajamkai owe atetame. Me abajamkai owerawa, era amos, era owe tanane asaietames.

³⁷Era owe takesam era pak andes. Are jak andatukuapteteres. Me Yesus bajamkai owerawa, era andatiies banda pak ajaresisimes wanam ese poman ban jamnuk aoweapomes.

³⁸Era pak andes oorey owe, 4.000. Wanam tapes anama jii are.

³⁹Emesare, Yesus era owe baesos, atakam asakamtame. Ararawa, ti andaejuue, wanam Magadan tapirmi ajire.