Read Casuarina Coast Asmat MATIUS 16 Bible Online

MATIUS 16 - Casuarina Coast Asmat bible

MATIUS 16

¹Emesare. Parisi owe anama Saduki owe Yesuspu ambaromes. Are Armat Ipit baempor aren. Erarawa are Yesus wonamo oup jinim bae pak ara baporomtam atakam ajanimes.

²Yesus ere, [“Jee asapiendaeto, tare atakam akoremakam, ‘Oup wonamo esakam taka. Erarawa to ju akot aemaptemarom.’ Emes atakam aesimemakam.

³Wanam tomnak ere, tanom, ‘Oup wonamo esakam anama jaka sesak. Erarawa waa ju pota oaemaptemarom.’ Emes atakam aesimemakam. Emesare, tare era wonamo oup pak tamsam. Tare ere, Allah waa bare aporomtammar pak tamsam apok.]

⁴Ara ajaniemmas owe, ere jaos owe. Are Allah awotapemmas. Erarawa are jinim bae pak bapor atakam ajanimmas. Allah ere, wan jinim bae pak, ara aemapes owe baporomtam apok aemtem. Are Yunus era aeme pak emes tamen jinim bae pak taka aporomtamtem.” Yesus emes atakam aesime. Emesare, Armat Ipit era owe beken ajiose. Ararawa, wan asan aoesose.

⁵Emesare, Yesus bajamkai owe poman ajires. Me, are banda pak batoomjuu bimak binip ajanimemes.

⁶Yesusam atakam era owe akorome. “Tanom banamek fiaka. Tare Parisi owe anama Saduki owe aroti eek turunaka.” Emes atakam aesime.

⁷Me abajamkai owerawa, atakam ajamkorames. “Armat Ipit dare banda pak batoomjuu apok apormar apeno.” Emes atakam aesimes.

⁸Yesusam era owe aatakam apore. “Tare eemnak Dera bamesemkorom apok aemmankum. Ere tare banda pak apok atakam ajamkorammakam, wama tamenem?

⁹Tare waa ajiire tamsam apok apaye? Tanom bimak binip etejanimemekem apaye? Tare era amos jise ban taka, era owe 5.000 sai asaietamekem, era andaeremtiies amos aotaajanimekem, ese wama tamen oweapomekem?

¹⁰Wanam, tare era amos jise poman ban jamnuk, era owe 4.000 sai asaietamekem, era amos aotaajanimekem, ese wama tamen oweapomekem?

¹¹Era akoremin atakam, banda paknak atakam apok. Tare ere, emes bapor apok wama tamenem? Emesare, tare era Parisi owe anama Saduki owe aroti eek turunaka.” Emes atakam aesime.

¹²Era owerawa, Yesus roti eeknak atakam apok apores. Yesus ere, Parisi owe anama Saduki owe aememtamemas atakam, atakam akore. Era owerawa, emes apores

¹³Emesare. Yesus Kaisarea Filipi tapirmi ambareme. Ambaremerawa, abajamkai owe ajatepore. “Asamot Anakot Ajaoreme Ipit ta Ipitim? Owe wama tamen atakam koremas?” Emes atakam aesime.

¹⁴Era owerawa, “Wan oweam, Are Yohanes Owe Bwi Bakupimtaer Ipit. Wan ere, ‘Are Elia.’ Wan ere, ‘Are Yeremia apaye, wan Allah atakam bakoretam ipit apaye.’ Emes atakam aesimes.” Era owe emes atakam aesimes.

¹⁵Me Yesus arawa, “Tare ere, wama bimak binipim? Dere ta ipitim?” Emes atakam aesime.

¹⁶Simon Petrus arawa, “Wore Allah Aeremtaere Ipit. Wore jiine Allah Andep.” Emes atakam aesime.

¹⁷Me Yesus arawa, “Simon! Wore Yona andep. Asamot owe era akoremarem atakam wora batetam apok. Me Surga oup Deritipit era bimak binip wora atetamen. Erarawa wore asan akot aemapmarem.

¹⁸Denom atakam wora akorommin. Petrus. Wore daytu eka tamen. Me Dera basitim bajarisiap owe, tame tamen. Denom era tame ara eka bitit ten aepomtamtemin. Era dambir owe asan fiak bii takes, era owe baemekumimosom asan apok.

¹⁹Dere Allah Ai Tapirmi kunci wora atetamtemin. Wore ara aemansa tapirmi atii atetem pak, Allaham era pak Surga oup atii atetem. Wore ara aemansa tapirmi akot aportem pak, Allaham era pak Surga oup akot aportem.” Yesus emes atakam aesime.

²⁰Armat Ipit arawa, atakam fiak abajamkai owe asakamtame. “Dere Allah Aeremtaere Ipit, Derare. Tare ere, emes atakam owe boesimtam bas.” Emes atakam aesime.

²¹Emesare. Era bare ajiire, Yesus era aemto pak, atakam basonak abajamkai owe akoroma ajaie. “Dere Yerusalem aesostemin. Era duturu oweam, Allah Tame pak baem owe daytuam, Musa Basakamtam Atakam baememtam oweam, Dera bajurusum daytinak aemtemanis. Are Dera atatiitemanis. Bare bamintep arawa, Allah Dera ajaoromwasumtumteman.” Emes atakam aesima ajaie.

²²Emesare, Petrus, Yesus, adamopu setep, ban atapimtaere. Are Yesus ajatemotaere. “Tuhan! Allah wore emes baem batetam apok!” Emes atakam aesime.

²³Yesus arawa, asepbanep ajiome. Asepbanep ajiomerawa, atakam Petrus akorome. “Bii Kapar Ipit! Wonom te! Me debipu baemem bas. Wore Dera kekemmanim. Era bimak binip atetarammarem pak, ere asamot bambi bimak binip. Ere Allah bimak binip atetarammar pak jipu apok.” Emes atakam aesime.

²⁴Wanam, Yesus atakam abajamkai owe akorome. “Owe Dera bajamkai akot ajitanis, are aapak bimak binip bajanimomem bas. Are asalib bataatetertas, wanam bajamkaitanis.

²⁵Owe, bajorem jak aseseromemtas, are bajorem apoknak aemtemas. Wan owe ere, karai Dera aetamtemanis. Era owe dambir emes karai damon atetas, are ajoremtemas.

²⁶Owe ara aemansa tapirmi pak takes ataatkoromtas apaye, me, are bajorem apok aemtas apaye, ere are asan akot baemeemap asan apok. Owe, ajiine baememaar pak, pak baemejitit asan apok.

²⁷Emesare, Asamot Anakot Ajaoreme Ipit, ere Aritipit fiaknak pak aptam andaetem. Me amalaikat oweam takan ajamdaetemas. Armat Ipit arawa, oweo aememayes era aemaaris pak jipu, biti ajitem.

²⁸Atakamnak, asep bare, Asamot Anakot Ajaoreme Ipit, atakam, owe takes aoomeptem. Emesare, wan ara aememes owe, era bare ajiire, dambir baem apok aemtemas.” Yesus emes atakam aesime.