Read Casuarina Coast Asmat MATIUS 17 Bible Online

MATIUS 17 - Casuarina Coast Asmat bible

MATIUS 17

¹Emesare. Bare poman ban taka aemapes. Bare poman ban taka aemapes arawa, Yesus, Petrusam, Yakobusam, Yakobus areot Yohanesam, oupnak fami apa atoomtemete.

²Are era owe bipu, wan bi ajaoremen. Me abi, jee tamen asaramemen. Me apakaianam bwer fasarnak tamen ambarampimen.

³Emesare, Musa anama Elia era owe bipu ajateomemisen. Are atakam Yesus ajamkoramesen.

⁴Petrus arawa, atakam Yesus akoromen. “Tuhan! Dare ara asan aememmarom, ere akotnak. Wore akot aportem, dere jise tame bamintep ara asan tara baeapomtam. Wan taka Wor. Wan taka Musa. Wan taka ere, Elia.” Emes atakam aesimen.

⁵Armat Ipit atakam taomekoremape, jisewonam fasarnak era owe ametepurimompen. Atakamam era fasarnak jisewonam bomon akoreisimen. “Ara aemema Ipit deTii. Dere Armat Ipit afaimommin. Dere Armat Ipit akotnak. Tanom aatakam jane pajiay.” Emes atakam jane ajiesen.

⁶Abajamkai owe emes atakam jane ajies ere, are bap andaebuamesteteresen. Are ombare daytinaken.

⁷Yesus arawa, era owe ambaromen. Are era owe ban akurumen. “Ombare bas.” Emes atakam aesimen.

⁸Abajamkai owerawa, Yesus banamek apemjatemesen. Are Yesus apa aporesen.

⁹Wanam, fami aendaes ere, Yesus atakam era owe asakamtamen. “Era aporakam pak, atakam owe boesimtam bas— Asamot Anakot Ajaoreme Ipit ajaorwasitto bare ajiire.” Emes atakam aesimen.

¹⁰Abajamkai oweam Armat Ipit ajateporesen. “Musa Basakamtam Atakam baememtam oweam, ‘Elia bonak ato takamjinaotem.’ Emes atakam aesimmas. Me, era owe emes atakam, ere wama tamenem?” Emes atakam aesimesen.

¹¹Armat Ipit arawa, “Elia bajinao, wanam era atakam takes bajasosotii are.

¹²Tare ere, jane pajiay! Elia, ere emejinaoe. Era owe ere, armat ipit amsam apok. Are armat ipit ajurusumes. Are armat ipit ajak asenomemes pak jipu aemes. Anom Asamot Anakot Ajaoreme Ipit emes taka ajurusumtemas.” Emes atakam aesimen.

¹³Yesus emes atakam akorerawa, era bajamkai owe, Are Yohanes Owe Bwi Bakupimtaer Ipit atakam akore aporesen.

¹⁴Emesare. Are era owe tananepu aofasies. Jipit takarawa, Yesuspu ambarome. Are Armat Ipit bipu jindi andaepuape.

¹⁵Ararawa, “Tuhan! Detii seekot aoorportaman. Are apieme. Are ajiriseme. Are jisam asapiepua, bwiam apiepua, emes aememe.

¹⁶Dere era jii wobajamkai owepu atoomtiney. Era owe ere, era jii baemejaoromtaer asan apok.” Emes atakam aesime.

¹⁷Yesus arawa, atakam abajamkai owe akorome. “Tare Dera bamesem apok ajaniemmakam owe. Tanom jaos owe. Dere tare takan wama tamen bare jamememtey? Dere jak jirao tara boem, wama tamen bare emtey? Emesare, era jii arapu atoomdaeay.” Emes atakam aesime.

¹⁸Yesus, era jii jak bomon bii, atakam fiak asakamtame. Era biirawa, era jii jak bomon ajise. Era jiiam, asan akot ameteememe.

¹⁹Wanam, abajamkai owe, Yesuspu apa ambaromes. “Dare era bii bamirimjisim aemporarom apok, ere wama tamenem?” Emes atakam aesimes.

²⁰Yesus arawa, “Tare eemnak Dera bamesemkorom apok. Erarawa tare era pak baemeem asan apok. Atakamnak, era kutukoser wus eek, ere kosernak. Me, tare defiak pak emes kosernak ambesemkoromtakam apaye, tanom era fami atakam bakorom ere, ‘Era asan aesosey.’ Emes atakam era fami akoromtakam, are era asan aesostem. Me tare baemeem asan apok pak, ere apoknak aemtem. [

²¹Me, owe banda pak bamase apok aemtas, wanam atakam Allah bajanim apok aemtas, are emes bii baemebirimjisim asan apok.]” Yesus emes atakam aesime.

²²Emesare. Yesusam, abajamkai oweam, Galilea tapirmi takan aemapes. Armat Ipit arawa, “Jipit taka Asamot Anakot Ajaoreme Ipit, jokoman owe aotasimemomtamtem.

²³Era oweam, Armat Ipit atatiitemas. Bare bamintep arawa, Allah, Armat Ipit ajaoromwasumtumtem.” Emes atakam aesime. Emesare, era owe jak potanak aemapes.

²⁴Emesare. Are Kapernaum ambaremes. Kapernaum ambaremes arawa, Allah tame uang bataajanim owe, Petrus ambaromes. “Me taguru, Allah asakamtame atakam Allah Tame uang, atetamemar apeno.” Emes atakam aesimes.

²⁵Petrus arawa, ‘Atetameme.’ Emes atakam aesime. Emesare, Petrus tame ajiie. Yesusam atakam bonak ara eekorome. “Simon! Ara aemansa tapirmi raja, owe, uang ara batetam atakam asakamtamemas. uang raja atetamtas owe ere, wama oweem? Asaman apaye? Kaaowe saman apaye? Wore wama bimak binip tetarammarem?” Emes atakam aesime.

²⁶Petrus arawa, “Kaaowe saman, uang, raja atetamemas.” Emes atakam aesime. Yesus arawa, “Emesare, raja asaman owe, uang, raja batetam apok aememas.

²⁷Me, dare Allah Tame uang bajanimtam owe, jak pota baemapom bas. Erarawa wore era jupima apendaey. Wonom bakik baemompey. Me bonak ajimtaertem enamo ataerey. Me enamo aokone bomon, uang taka aportemarem. Era uangam ataerey. Era owe atetamey. Era uang, deraye woraye Allah atakam asakamtame batetam uang erare.” Yesus emes atakam aesime.