Read Casuarina Coast Asmat MATIUS 19 Bible Online

MATIUS 19 - Casuarina Coast Asmat bible

MATIUS 19

¹Yesus emes atakam akorekorome, are Galilea tapirmi aesose. Are Yordan ju ajire, wanam Yudea tapirmi ambareme.

²Owe tananenakam Armat Ipit fe asarames. Armat Ipitam era asan damo pota owe ajaoromtaae.

³Parisi owerawa, Armat Ipit ambaromes. Are Armat Ipit jaos atakam bakore apaye baempor aren. “Oorey ipit aremo bambi atuumjisimto, are dabasakamtam atakam baoo ape?” Emes atakam aesimes.

⁴Armat Ipit arawa, “Bonaknak ere, era Ji Aereme Ipit, owe jipit anama taot akenemapome. Tare era atakam baca baem apoke?

⁵Me Ji Aereme Ipitam, ‘Emesare, jipit aritipit anama arsoot beken ajiostem, wanam aremotin takan aemaptemamis. Emesare, armo anama aremo, damo taka aememtemamis.’ Emes atakam aesime.

⁶Emesare, are owe jamnuk boemap apok aemtemamis. Are owe taka tamen aemaptemamis. Emesare, Allah era owe taka aemapomto, asamot owe, era owe batuumjisim bas.” Yesus emes atakam aesime.

⁷Era owerawa, “Musa, oorey ipit, batuumjisim buku aremo batetam, wanam era taot batuumjisim, emes atakam asakamtame ere, wama tamenem?” Emes atakam aesimes.

⁸Yesusam, “Musa tare jane sake owe aporen. Erarawa are tare tatapesti batuumjisim emes aemay ajietamen. Me, bonaknak ere, emes apok.

⁹Tare jane pajiay! Jipit aremo wan owe tamane banda apok aemto, me, armo ipit aremo atuumjisimto, wanam wan taot aotaetto, ere era ipit pere bambe ipit aememtem.” Emes atakam aesime.

¹⁰Me Yesus bajamkai owerawa, atakam Armat Ipit akoromes. “Armo Ipitam aremoam emes apaye, ere owe petae bajiem apok aemtas, asan akot aememtemas.” Emes atakam aesimes.

¹¹Armat Ipit arawa, “Wan owe era akoremakam atakam ji baemee asan apok. Allah era atakam ji bae jak atetammar owe, era pak aemmas.

¹²Emesare, wan owe petae baemejiem asan apok. Me wan owe, jak bomon aemomjises, are emes taka are. Owerawa, wan owe, jii baemefim asan apok pak aemapomes. Wan owerawa, Allah karai bae akot apormas. Erarawa are petae bajiem apok, atakam ama asakamtiies. Emesare, ara atakam ji bae akot owe, are atakam ji baetas.” Emes atakam aesime.

¹³Emesare. Owe, jii Armat Ipitpu atoomtines. Are Armat Ipit, ban, era jii damo ten bataetii anama atakam Allah ara bajanimtam akot ajies. Me Yesus bajamkai owe ere, emes atii ates.

¹⁴Yesusam, “Ara jii dedamopu emes batoomtinaotas. Atii bata bas. Ara jii tamen owe Allah aobaomep owe aememmas.” Emes atakam aesime.

¹⁵Emesare, Armat Ipit ban era jii damo ten ataetiie. Ararawa, era asan aesose.

¹⁶Emesare. Jipit taka Armat Ipitpu ambarome. Era ipit arawa, “Guru! Dere jiinenak baememaar akot. Derarawa wama akot pak emtey?” Emes atakam aesime.

¹⁷Me Yesusam, “Wore akot pak baem ajatepormanim ere, wama tamenem? Owe takakor ere akot. Wore jiinenak baememaar akot aportem, Musa Basakamtam Atakam ji takes aekoromey.” Emes atakam aesime.

¹⁸Era ipit arawa, “Me wama basakamtam atakamum?” Emes atakam aesime. Yesus arawa, “Owe tatiitem. Tani tamane bajamdamat bas. Wosom etem. Pote atakam koretem.

¹⁹Me wuritipit anama worsoot asitimaarey. Wanam, wojoo owe afaimey— wore womba afaimemarem tamen awara.” Emes atakam aesime.

²⁰Me ai ipit arawa, “Dere era pak ji takes aeaaru. Derarawa, wan pak wama oemtey?”

²¹Yesus arawa, “Wore turunak ipit baemem akot aportem, wonom baesosey. Wopak takes uang auumamtaatey. Era uang arawa, sai era pak apok owe asaietamey. Worarawa, Surga tapirmi pak anakotnak atoomemtemarem. Era pak aemtem, bofasiey. Wanam ajamkaiaaran.” Emes atakam aesime.

²²Era ai ipit ere, pak daytinak aemome. Erarawa are emes atakam jane ajie, are jak pota aememe, wanam aesose. Are pak daytinak aemome apore.

²³Yesusam atakam abajamkai owe akorome. “Atakamnak, pak daytu owe, Allah aobaomep owe baemem, ere asan pota daytinak.

²⁴Dere wan atakamam tara akorommin. Unta jarum, jafa bajii, ere asan pota kope. Pak daytu owe ere, Allah Ai Tapirmi bajii, ere asan pota daytinak.” Emes atakam aesime.

²⁵Me abajamkai owe emes atakam jane ajies, are jinim daytinak aees. Era owerawa, “Wama tamenem? Era ajoremtas owe, wama oweem?” Emes atakam aesimes.

²⁶Yesusam era owe banep ajiepore. “Asamot owe emes baemeem asan apok. Allah ere, era pak takes baem, ere aapak.” Emes atakam aesime.

²⁷Me Petrus arawa, atakam Armat Ipit akorome. “Danom dapak takes beken ajiom, wanam Wora ajamkaiom. Erarawa dare wama pak toomemtam?” Emes atakam aesime.

²⁸Yesusam atep ajite, “Atakamnak, Allah Ai Tapirmi, Asamot Anakot Ajaoreme Ipit aakotnak fe asan ten apakiaptem. Me Dera ajamkaimankum oweam, owe baomep fe asan 12 ten apakiaptemakam. Tanom Israel saman 12 atakam asakamtiitemakam.

²⁹Wan owe, atame apaye, areotais apaye, armasis apaye, arisare apaye, arereis apaye, akebun apaye, beken ajies. Are era pak takes karai dera baetam beken ajies. Era owe ere, era pak daytinak aotoomemtemas. Are jiinenak aememaartemas.

³⁰Emesare, juas aptam owe tanane, juas apok owe aoememtemas. Juas apok owe tananeam, juas aptam owe aoememtemas.”