Read Casuarina Coast Asmat MATIUS 20 Bible Online

MATIUS 20 - Casuarina Coast Asmat bible

MATIUS 20

¹“Allah aowe baomep atakam ere, tame armat ipit taka awar. Armat ipit, tomnak, aanggur kebun karai baetam owe atakam bajanim ajisen.

²Are, karai baetam oweam, gaji atakam ajamsakamamtiiesen. Era gaji ere, karai bare taka, uang perak taka tetama, taka tetama bajaren. Armat ipit arawa, era owe, aanggur kebun ambirimemomen.

³Emesare, tom ere, jam 9 apaye, armat ipit aojisen. Are wan owe, pasar asan bambi baemem aporen.

⁴‘Tanom era anggur kebun aesosay. Derarawa, gaji akot tara atetamtemin.’ Emes atakam aesimen.

⁵Emesare, era owe era kebun aesosesen. Me armat ipit arawa, jam 12 apaye, aojisen. Are emes taka aoemen. Wanam jam 3 apaye, emes taka aoemen.

⁶Are jam 5 apaye, aojisen. Are wan owe bambi baemem aporen. ‘Tare ara ju jirao, era asan bambi apa emememakam?’ Emes atakam aesimen.

⁷Era owerawa, ‘Owe karai ara baetam, atakam dara bajanim apok.’ Emes atakam aesimesen. Armat ipit arawa, ‘Emesare, tanom karai deanggur kebuna.’ Emes atakam aesimen.

⁸Emesare. Pore ere, era anggur kebun armat ipit, atakam, akarai baetam kapar ipit akoromen. ‘Era karai owe bajatey. Agaji basaietamteter. Wanam bonak afiares owe, agaji asep batetam.’ Emes atakam aesimen.

⁹Emesare, armat ipit, uang perak taka, jam 5 apaye afies owe atetamteteren.

¹⁰Me bonak afies owe atinaoes ere, are bimak binip atetaramesen. ‘Armat ipit, uang, dara aokaimtamtemaro apeno.’ Emes bimak binip atetaramesen. Me, armat ipit, era oweam, uang perak takakope atetamteteren.

¹¹Era karai owe uang ataetes, are itim era kebun armat ipit akeomesen.

¹²‘Me asep afiares owe, karai jam takakope aeares. Dare ere, karai tom aeememmarom, poro ju atimomarom. Jeeam damo asamtiiaro. Wore ere, era oweam, danom, gaji awar atetammaroam.’ Emes atakam aesimes.

¹³Armat ipit arawa, atep wan ipit taka ajiten. ‘Dere jaos pak wora baem apok. Emesare, woratin, wogaji uang perak taka, atakam ajamsakamamtiiarom.

¹⁴Me wopak bataerey. Wanam baesosey. Dere asep afiarem ipitam, wonom, gaji awar batetam akot ajimin.

¹⁵Dere depak, era akot apormin pak jipu baem, karao ape? Wore, dere pak sai ban se ipit apormanim, emes itim akemmarem apaye?’ Emes atakam aesimen.

¹⁶Emesare, era juas apok aemememas owe, juas aptam owe aememtemas. Era juas aptam aemememas oweam, juas apok owe aememtemas.” Yesus emes atakam aesime.

¹⁷Emesare. Yesus Yerusalem bimin ajieme. Era waut ere, are abajamkai owe 12, atakam apa akorome.

¹⁸“Baporay! Dare Yerusalem aesosmarom. Era asan ere, jipit taka Asamot Anakot Ajaoreme Ipit, Allah Tame pak baem owe daytu aotasimemomtamtem. Are Armat Ipit Musa Basakamtam Atakam baememtam owe aotasimemomtamtem. Era owerawa, Armat Ipit batatii atakam ajamsakamamtiitemas.

¹⁹Are Armat Ipit Yahudi apok saman owe aotasimemomtamtemas. Are, era owe, Armat Ipit wote bawotam, wusup batam, salib oup batatopomam, emes aotasimemomtamtemas. Bare bamintep ararawa, Allah Armat Ipit ajaoromwasumtumtem.” Emes atakam aesime.

²⁰Emesare. Sebedeus aremoam, andep amnukam, Yesus ambaromes. Armat taot Yesus bipu jindi andaepuape, wanam atakam Armat Ipit ajanime.

²¹Yesus arawa, era taot ajatepore. “Wore wama tamenem?” Emes atakam aesime. Armat taot arawa, “Wore owe aomeptem bare, detii jamnuk, wan wobo poman baemap, wan wotamo poman baemap, emes baemaptamis.” Emes atakam aesime.

²²Yesus arawa, “Era atakam ajanimmakam pak tamsam apok. Emesare, asep bare Dere ajirisemtemin. Tanom era ajirisemtey pak tamen bajirisem akot ape?” Emes atakam aesime. “Emesare, akot.” Emes atakam aesimemis.

²³Armat Ipitam, “Tare ajirisemtey pak emes tamen ajirisemtemakam. Me, dere debo poman baemap oweam, detamo poman baemap oweam, emes baeremtaer, ere depak apok. Me Deritipit era asan aokenemapome. Are era asan aemaptas owe aereremartaae.” Emes atakam aesime.

²⁴Me wan bajamkai owe ban amnuk, era ipit amnuk ajanimemis atakam, atakam jane ajies. Are jak ambap aememes, wanam atakam era ipit amnuk akoromes.

²⁵Yesus ere, era owe ajate, wanam atakam akorome. “Me Allah bajamkai amsam apok samaniin samaniin kapar owe, atakam daytinak era bambi owe asakamtamemas. Era owe aomepemas owe atakam fiaknak era bambi owe akoromemas. Tare emes tamsam.

²⁶Me tarmamon ere, emes bas. Me tarmamon wan owe, juas aptam owe baemem akot aportas, are takarai baetam owe baememtas.

²⁷Wanam, tarmamon wan owe, bonak owe baemem akot aportas, are bambi karai tara baetamtan.

²⁸Emesamare, Asamot Anakot Ajaoreme Ipit, owe karai Ara baetam bandae apok. Me, Are karai owe baetam andae. Are owe bajortaer dambir batemtam andae.” Emes atakam aesime.

²⁹Emesare, Yesus Yeriko aite ere, owe tanane afe asarames.

³⁰Banamek kapie ipit amnukam bokot dasman aemapemis. Are Yesus era asan baokorefe, atakam jane ajiemis. Era atakam jane ajiemis arawa, atakam afaketaaemis. “Tuhan! Daut Wurpise! Seekot aoorporaro!” Emes atakam aesimemis.

³¹Era owe tananerawa, era ipit amnuk ajatemotaeres. “Tanom atakam bas.” Emes atakam aesimes. Era ipit amnuk ere, atakam daytinak aofaketaaemis. “Tuhan! Daut Wurpise! Seekot aoorporaro!” Emes atakam aoesimemis.

³²Yesus arawa, aseme. Are era ipit amnuk ajate. Wanam, “Dere tare wama pak emtamtey?” Emes atakam aesime.

³³Era ipit amnuk arawa, “Tuhan! Dabanamek bandimemomtamaro.” Emes atakam aesimemis.

³⁴Emesare, Yesus era ipit amnuk seekot aoorpore. Are ban abanamek ataapome. Era ipit amnuk arawa, banamek ametewarememis. Are Armat Ipit ajamkaiemis.